Ublumi, havaktiit igluliqijikkut katimajiinnik piniaqhimaliqtun nunallaani takujaqturutikhanik tamaani nunaptingni ilaudjutaani uumani Igluliuqatigiingniq unaluunniit Nunavut 3000. Katimajun takujaqturniaqtait qulit nunallaat miitiqatigijaami Nunallaani Igluliqijiit haamlatkullu kangiqhittiariami tamainni nunallaani upalungaiqhimaniinni ukununga iglukhanun pivallianirnun upalungaiqhimadjutikkut uumunga tikittukhami inungnun iglukhanik igluliurutainnun.

“Hapkuat nunallaani takujaqturutit akhuurnaqtun ilaujun kavamapta parnaqutaani amigaiqtijuummirnirmun Nunavutim iglukhaitigun piqarniinnik talvuuna 3,000kut iglukhanik tikitinnagu 2030,” uqaqtuq Maligaliuqti Lorne Kusugak, Ministaujuq munarijuq uuminga Nunavumi Igluliqijirjuatkunni (NHC). “Hapkuat takujaqturutit nakuuqpiaqtuqn uuktuqvikhat tuhaajaami taapkunanga nunamiittun tamainni nunallaani pijaamilu uqaqatigiigutikkut ihariagijaujuni hivumuudjutainni hivunikhaptingni amigaiqtijuummirlugillu inungnun iglukhat piqarutait ihuaqtumik”.

Nunallaami takujaqturutit ilaqarniaqtuq katimajinik NHCkunnin, Nunalingni Kavamatkunillu Havagvianin (CGS), NCC Development Ltd (NCCD) unalu Land for Homes, (L4H) piniaqhimadjutit hivumuudjutiniaqtuqlu ukunanga 17nin nunallaani takujaqturutainnin pivaktun uvani ukiakhami 2023mi.

“Nunallaani hivunikhaliurniq aularaanginnaqtuq, aallanguqtiraanginnaqtluq havagutit pipkaidjutiqaqtuq havaqatigiigutikhanik ukunani tigummidjutiqaqtunin imaalu uqautainnik nunallaamiutanin,” uqaqtuq NHC Atanngujaq Angijuqqaangalu, Eiryn Devereaux. “Takujaqturniit tamaita nunallaat hivuagun uumannga inungnun iglukhainnun nappaqtirniinnin, ilitturijaaqtugun tamainnin haamlatkunnin nunallaani hivunikhainnik, qaujiharlugin hailihimajun upalungaiqhimadjutaillu nunami, naunaijaqlugin pijaarnirniit naliinni tuqhuakhait/alrujakhait/imaqtautait havagutaillu naunaiqlugillu hailihimadjutait ihariagijaujun tamajakhanik, imaatun ujaraliatun.”

Una 2024 takujaqtuqvia piniaqtuq uvani Julai 2-19, 2024, hapkunanilu nutqaqattarniaqtuq:

Kangiqliniq, Julai 2-5

Arviat, Julai 5-8

Qaminittuaq, Julai 8-10

Kugluktuk, Julai 11-12

Iqaluktuuttiaq, Julai 11-12

Uqhuqtuuq, Julai 12-13

Taloyoak, Julai 13-15

Ikpiarjuk, Julai 15-17

Pangnirtung, Julai 17-18

Kinngait, Julai 18-19

Ilitturipkaidjutit katitiqhimajun takujaqtuqnirniinnin ilitturipkarniaqtait pidjutainni tikittukhani inungnun iglukainnun nappaqtirutainni 2025mi uvanilu 2026mi ikajurniaqtulqu ihuaqtumik kiudjutinik ajurnavjaktuni uuktuqvikhanilu pidjutainnik iglukhatigun turaangajainnun piliuqhimajun tamainnun nunallaanun.

Aallanik ilitturipkaidjutikhanunk uumani Igluliuqatigiingniq uvanilu iglukhaitigun pinahuarutinun hailihimajun NHCkunnin, takulugu una NHC qaritaujakkuurutaa.