Uvani Hittamiunmi, Qiqaijaluarvia 16, ukua Nunavunmi Igluliqijiirjuat (NHC) ukualu Kitikmeot Inuit Katimajiit (KitIA) tuhaqtitijut havaqatigiingnikkut angirutinik havagiangini tunihilutiklu nutaanik pinahuarutinik taijaujuq Nunavunmi Apqutikhaq Nanminiqaqtunun Hivuliqpaaq Havaamun Pinahuarut (NPHO) hamani Kitikmeot Aviktungniani.

Havaqatigiingnikkut Angirut attautimuktitijuq ajuittiarnirmik ukua NHC ukualu KitIA tikinahuarutaa amigaiqjuumiqlugit nanminiqaqtut iglunik Nunavunmi uqautigilugit ihariagijaujut ihuarnikhaanun, hivitujumik-kikliqaqtuq iglutigut ihuaqhainahuarut. Hivuliqpaaq havaaq havaktauhimajuq tunihijaami ilaujunun pijakhanik qajangnaitumik tigudjutikhamik akiligahamik mikhaanun niuvirnirmun iglumik unalu pijaarnirmun maniliqivikkut maniliqdjunmik.

Nunavunmi Apqutikhaq Nanminiqaqtunun Hivuliqpaaq Havaamun Pinahuarut atapkaijuq akhuungnaqtunik ajuqhautinik igluqpinikkut aulahimaarnirinun qitqani iglutigut nanminiqarnirmunlu," uqaqtuq Lorne Kusugak, Minista munaqhijuq Nunavunmi Igluliqijiirjuatkunik. “Imaa havaqatigiliqlugit KitIA tunihijaami maniliqinikkut taiguarnirmun ukualu nanminiqarnirmun ajuiqhautinun ilihaidjutinik tapkua pidjutiqaqtut Inuit Qaujimajatuqangit hivunikhaliurutainun, nakuutqiatigut ikajuutikhaat nanminiqaqtut, ikajuqlugillu inmi apqutikhainun nanminiqarnirmun.”

Hivuliqpaaq havaakhaq ilaujut hitamat Inuit ilagiit Iqaluktuutiamin. Attautit tunijauniaqtut akiligahamik igluqpangmik nutaaq napaqtiqtaujuq hitamat-atajut, akiliqtuilutik tatqirhiutitigut hapkununga NHCkunun, ilaulutik ihuaqhaqhimajukkut maniliqinikkut taiguanik ukualu nanminiqarnikkut ajuiqhautinun pinahuarutinun hivitunia pingahut ukiut. Iniqtirumik ilihaijutitik, pijaaqtut ilaujut pijakhaqarniaqtut niuviqlutik nanminiqarnirmn iglunik tunijaulutiklu NPHOkunin aituunmik imaa $30,000mik mikhaanun inmi iglumik niuviriangini.

“KitIA ilitarijait akhuurutait nanminiqarnirmun hapkununga avatiini aviktungnia quviahuktut havaqatigilugit NHCkut tunihinirmun nutaamik hivuliqpaamik havaaqmik pinahuarunmik," uqaqtuq Robert Greenley, Angijuqaanga Kitikmeot Inuit Katimajiit. “Ikajuqhugit Inuit piumajut inmi iglukhamingnik qiniqhiajullu pijakhanik nanminiqarnirmun ikajuutauniaqtut ihuaqhijuumiqnirmun inuuhiqattiarnirmun ilagiit aviktungniani”.

NHCkut aulahimaaqtumik qiniqhiajut qanuriliurutikhanik ikiklijuumiqnirmun ajuqhautit nanminiqaqtunun kangiqhipkaiblutik nutaamik uvalu nutaat iglukhat ukualu nanminiqarnirmun pinahuarutit. Kangiqhittiarumaguvin aalanun pinahuarutinun piinarialingnun, takulugu Nunavunmi Igluliqijiijuatkut qaritaujaliqivia.