Ublumi, Minista munarijuq Nunavunmi Igluliqijirjuakkut (NHC) Lorne Kusugak ilauqatigijaa Minista munarijuq uvunga Nunavunmi Ilihariaqpaalivingmi (NAC) Karen Nutarak unalu aulapkaiji uvani Atoskiwin Training and Employment Centre Inc. (ATEC) unalu Pewapun Construction Limited katimavingmi ilaujuq Jim Moore, sainiriami paannariilirnikkut angirutimik.

Una angiruti pipkailiqtuq hivulliqpaamik havaktakhamik Kangiqlinirmi amigaijarumaplugin piqarnikhait akitungittuni ilihaqtunun iglukhainnik tunilunil ilatarutinik hananikkut ajuiqharniinnik uuktuqvikhanik ukununga NACmi ilihaqtunun.

"Pewapun-kut tautukhimaniaq ikajurinikkut hakugikharnikkullu nunallaami ilihaqtun talvunga ajuiqhaqhutik-havaktillugik ajuiqharnirnun uukturvighanik quviagijara talvunga tautuktipkainikkut, Kangiqlinirmiinnaungittumi, kihimi tamaani Nunavunmi,” uqaqtuq Minista Kusugak. “Pijaami nappaqtirnirnik iglukhanik, piliuqtukhaujugun nunallaami angummadjutikhanik. Aajjikkuhiurnia Pewapun-niup ajuiqharnirnik iliharnirnullu atugakhaa piliunginnaqhimaittuq angummadjutikhanik kihimi tuniniaqtuqlu akhuurhaidjutinik inulrammiinnun ihumagijun havagumaniit hananikkut havagviinni.”

Hivulliqpaaq havaktakhaq, aullaqtiqtukhaq July 2024mi, piliurniaqhimajuq siksiujunik nutaanik pingahunik-igluaqaqtunik akittungittuni igluqpakhanik ilihaqtunun ilagiiktuni Kangiqlinirmi, pijukhaq iglugijaulirlutik aujami 2025mi. Pewapun tuniniaqtuq $3 million tamajakhainni ukunanilu ihuaqhaqtauqpiaqhimajuni ikajuutikhanik nappaqtiqtillugin, iglukhait nappaqtiqtauniaqtun ilihaqtunin ilihaijinillu NACkut ajuittuni hananikkut havaktiinni pinahuaritini.

"Havaqatigiigutivun uvani Pewapun Construction pipkaijuq havaklirnikkut-tunnganiqarutikkut ajuiqharutinik ukununga 20-40 ilihaqtunun ilaujun uvani hananikkut pinahuarutiptingni," uqaqtuq Minister Nutarak. "Una uuktuqvikhaq pipkaijait ilihaqtun piinnangidjutaanik qaujihimanirnik, ajuiqhimanirnik ikajuutikhat inuuhidjutimingi havagnikkullu angiklijuummirutikhainnun, kihimilu ilauqpiarlunilu nunallaani pivalliadjutainnun. Una qanuriliurniq nalaumajuq turaangadjutainnun Nunavunmi Ilihariaqpaallirvingmi.”

Piniaqhimadjuti turaangajuq piuluni aajjikkuhiuqtakhamik aallanun hivulliqpaangujunun pinahuarutikhanun hivumuudjutini. Ikajuqhugin ilihaqtun talvuuna havaktillutik-ajuiqharutini, taimaittun pinahuaruti angiklihaqtaaqtaa Nunavutim ajuittun havaktikhat angiliharlugillu igluqpaitigun ikajuutikhat nunallaanun tamaani nunaptingni.

“Quviahukpiaqtugun uvuuna aallanguqtirutikkut pijaataarutikkut paannaqatigiidutikkut Nunavunmi, piliuriami nakuujunik aallanguqtirutinik,” uqaqtuq Jim Moore. “Pidjutaani havaqatigiingnikkut atauttikkullu, piliuqtugun igluinnauntittunik, kihimi hivunikhamik. Paannariigutikkut atauttikkullu havagutikkut, hakugikhaqtavun inulrammiit, pivallianirnun hanadjutikkut angummadjutikhanik, tuninikkullu aularaanginnaqtunik iglukhaitigun ihuaqhaidjutikhanik. Atauttikkut, piliuqtugun nakuuniqarnirmun aqagukhamik, atauhillaakkut nunallaanik.”

Pewapun Construction Limited inungni havagvik piliuqhimajuq 2016mi ukunanga Nisichawayasihk Cree Nation Manitoba-mi piliuqatigiiktaupluni havagviujuq uvunga ATEC. Pewapun-niup turaangania piliuriami aularaanginnaqtukhanik inuuhirmi-havaakhani ukununga Nunaqaqqaaqhimajunun inungnun talvuuna tuninikkut ajuiqharnirnik, iliharnirnik, havalirnirnik, ukunanilu imikkullu-havaakhanun uutuqvikhanun.

NHC qiniqhimaaqtuq qanuqtun ikiklilaaqtirnahuaqhugin ungummidjutit igluqpanik naminirijakhainnun talvuuna pipkaidjutainni nutaani nutaanguqtiqhimajunilu amigaittuni iglukhani ukunanilu nanminiriajukhani iglukhanik pinahuarutini. Aallanik ilitturipkaidjutikhanik aallani pinahuarutini hailihimajuni, takulugu una Nunavunmi Igluliqijirjuakkut qaritaujakkurutaa.