Maligaliuqti Lorne Kusugak, Minista munarijuq Nunavunmi luliqijirjuatkunni (NHC), uqaqtait aallanguqtirniit ilaujuni uvani kuapuriisitkut aulapkaijiinni katimajiinni.

Talvanga Maatsi 1min, 2024, Derek Elias Iqaluktuuttiamin unalu Annie Aningmiuq Iqalungnin tikkhuaqtauhimajuk aulapkaijiuplutik, tamarmik havangniaqtuk hivitunirmik pingahunik ukiunik.

“Quviahuutigijumajatka tikkuaqtaulihaaqtuk aulapkaijiik,” uqaqtuq Minista Lorne Kusugak. "Mr. Elias amigaittunik hivulliuqtiunikut ajuiqhimajuq, pipluni 17nik ukiunik havakpagutaanik NHCkunni havakpakhimajuqlu miijauvakpakhimajuq Iqaluktuuttiami. Ms. Aningmiuq aallatkiinik ilihaqpakhimajuq aallatkiinik ajuiqpakhimajumik havagutiminin qaffiujunin Inuit havagviinnin tadjalu tukliujuq angajuqqaangupluni uvani Nunasi Kuapuriisitkunni. Ajuiqhimaijait atuqpakhimajaillu aturutiqarniaqtun hivulliurutiani kuapuriisitkut parnaqutikhakkut hivulliurutaani, pipkalugu NHCkut tuniniani nakuujunik pittaarutinik aallakkiingni akituvallangittunik iglukhaitigun qanurittunik ilagiiktunun inungnullu.”

John Apt aulahimaniaqtuq havaamini ikhivautaliupluni, taimaalu Peter Tapatai, John Hussey, unalu Allan Rumbolt havakhimmaarniaqtun katimajiinni. Siksiujun saivanin katimajikhani katimajiinni aulapkaijiinni inuqaliqtut.

“Qujagijatka taimaaqhimaliqtun katimajiit George Qulaut Iglulingmin, Patrick Tagoona Kangiqlinirmin, unalu Emma Pauloosie Uqhuqtuumin havagutainnun nakuujuniklu tuniudjutainnin kuapuriisitkunnun,” uqaqtuq Minista Kusugak.

Nutaat NHC katimajiit miitirniaqtun April 23-25, 2024mi ihumaliuriamingnik kina havaarilirniaqtaa tuklik-ikhivautalik hivumuudjutimi.