Iqaluit, Nunavut (January 31, 2024) – Nunavunmi Ikluliqiyiryuat Kuapuriissat (NHC) taapkualu NCC Hanavalliayit Limatit (NCCD) quviahuktut naunaiqhitiyaamik taimaa atiliqhimayunik taapkuninnga 2024-mi Ukiuq Tamaat Aviktuiyut Niuviqtullu Angirutait (hanayaghaliuqlutik-hanalutiklu kaantulaanik) hanayaamik 166-nik nutaanik ikluqpaghanik – 146 inuit ikluqpaghait 20-niklu havaktit ikluqpaghait – talvani 17-nguyunit Nunavunmi nunalaarnit.

“Aullaqtittiyut hapkuninnga kaantulaanik atauttikkuuqtuq tautugumayainik talvanngat Igluliuqatigiingniq Nunavut 3000 ilittuqhitiupluni aklivaalliqtumik ukiuq tamaat ikluqpaghat nutaat ihariagiyauqpiaqtut aviktuqhimayumi tamaat,” uqaqtuq Eiryn Devereaux, CEO-nguyut Angayuqqaangupluni Nunavunmi Ikluliqiyiryuat Kuapuriissanit. “Atauhiq ikkuaqtuutigivagait ikayuqtigiighutik angirutainit NCCD-kullu taimaa ilittuqhitilutik akighalluanik maniutainut ikluqpaghaliuqpalliagutigiplugu nutaanik.”

Hananiaqhimayut ukiaghami hapkunani nunallaarnit: • Ikluligaaryuk (8-nik ikluqpaghanik) • Kangirlugaapik (8-nik ikluqpaghanik) • Salliq (12-nik ikluqpaghanik) • Auhuittuq (6-nik ikluqpaghanik) • Iklulik (20-nik ikluqpaghanik) • Kimmirut (6-nik ikluqpaghanik) • Kinngait (20-nik ikluqpaghanik) • Kuugaaryuk (8-nik ikluqpaghanik) • Qurluqtuq (12-nik ikluqpaghanik) • Nauyaat (8-nik ikluqpaghanik) • Pangniqtuuq (16-nik ikluqpaghanik) • Mittimatalik (8-nik ikluqpaghanik) • Qauhuittuq (6-nik ikluqpaghanik) • Qikiqtaryuaq (6-nik ikluqpaghanik) • Hanirayak (8-nik ikluqpaghanik) • Sanikiluaq (8-nik ikluqpaghanik) • Tikiraryuaq (6-nik ikluqpaghanik).

Naallugit kaantulaak akighaliik taimaa $134,728,616-taalamik – taimaalu $670-taalamik atauhiq itigak aktinianik aghuuqtumik hanayut akighaigut.

2024-mi Ukiuq Tamaat Aviktuiyut Niuviqtullu Angirutait ilittuqhitiuyut aippaanik ukium angirutainik talvanngat 10-nik ukiunik aulayughamik ikayuqtigiiktut angirutait NHC-kut atiliqhimayait NCCD-kullu naatkutigiigahuaqhugit niuvigait ikluqpangnut manighiuriamiklu ihumagiyat inittiariamik talvanngat Igluliuqatigiingniq.

Hivulliqmi ukiumi, NCCD-kut hanaliqhimayut 150-nik nutaanik inuit ikluqpaghainik. Tamangnik ikluliurutighat tikihimaliqtut, hanaliqhutiklu amigaitqiyanit nunallaarnit. NCCD-kut hanavighaanik ininnuaqhimaliqtut 150-nguyunik ikluqpangnik 12-nit atuqtughanit tatqiqhiutinit.

“Timiqutivut atuqpallianiaqhimayait Inuit-nanminiutainik Ukiuqtaqtumiuniklu pivighanik hanayaamik aimavighanik Nunavunmiunit Nunavunmiunut,” uqaqtuq NCCD-kut atanilluangat aulapkaiyiryuaq angayuqqaaqlu Clarence Synard. “Taamna Nunavut 3000 Havaaghaq amihunik ihuaqtuniklu ilihaitjutighaqaqtut taimaa hivuliqtuiyaamnik hanavalliayunik ilihimattiaqtunik Inungnik havaaghaqarumayut hanayinit. Taimaalluaq, ihumagiyaqaqtugut taimaa Inuinnaqnik hanayiqariamik 30%-mik angirutaaqhimayaptingnit ikayuqtigiiktumik kaantulaaptingnit inuit ikluqpaghautainik taimaalu hapkua ihumagiplugit ilihaivalliayaamik havaktighaliuriamiklu Inuinnaqnik hanayit havaaghainit.”

Naallugu akighait taapkua Ikluliuqatigiingniq Nunavut 3000 Havaaghait taimaittuq $2.57 pilian-taalat hanayaamik 3,000-nik ikluqpaghanik aviktuqhimayumi tamaat 2030-nguqtinnagu, ihumagiplugulu taapkua $890 milian-taalat (35% avighugu) nanminilgit ikluqpaghait taimaalu $1.68 pilian-taalamik (65% avighugu) inuit ikluqpaghainut.

Naunaittiarumaguffi hapkua mighaagut Igluliuqatigiingniq Nunavut 3000 Havaaghait, pulaaqlugu taamna https://www.igluliuqatigiingniq.ca