Nunavut Kavamanga (GN) tunijuq ikajuutimingnik taapkununga tamainnun hulaqutijauhimajunun ikualaarnirmin uvani 1088 Noble House Iqalungni. Ikualaaruti pidjutijuq iglukhairutiplugin 36ngujuq ilagiiktut qaffiujullu havagvigijaujun.

Nunavunmi Iglulirqijirjuatkut (NHC) hivulliuqtait GNkut havagutait ikajurnikkut havaktimingnik igluiqhimaliqtuni. Havaktiit havakpiaqhimmaaqtun pipkaijaami tamaita igluqaqtuugaluat tadja itiqtiqhimajun hiniktarvingni nuutiqhimajullu aallanun iglukhanun, havaqatigihimajullu ukununga Northview pijaami hivituniqaqtuni iglukhatigun ihuaqhaidjutinik qilamik. NHC niriuktun nuutiqtipkailunik ilanginnik igluqhaiqtaujun ukuinung aallanun iglukhanun uvani havangnairutimi.

Iglukhaiqtun nuutiqtauhimaittun hiniktarvingnun unnuaq apirijaujun uqaqatigijakhaa Lana Drouillard uvani 867-975-7210 uvaniluunniit ldrouillard@gov.nu.ca, Michaela Smith uvani 867-975-7204 uvaniluunniit msmith11@gov.nu.ca, unaluunniit amigarniaqhijukkut uqaqatigivikhaq hivajauti uvani 867-222-1304 ihuaqhaihimakpata aallanik tadja najuqvikhamingnik, ihariagigumik hinitarvingmik, ihariagijulluunniit aallanik ikajuutikhanik.

Tamaita havagviit pivigijaujullu ihuaqhaqhimajait aturutikhat pipkaijaami havaqatigiit Nunavunmiullu nakuuhijaanginnik uumanga ajurnaqtumin hunakhairutimin.

Pujurnin Aktuutinin (Anniaqtailinirmut)

Aanniaqtailinirmut Havagvia itqaumaqujait Iqalungmiutat qajagijukhat pujunik. Inuit uumatikkut puvakkulluunniit aanniarutilgit, puvakluktun, inirnikhat, nutaqqat hingaihimajullu arnat qajagijukhat pujunik. Upaguiqlugu tahamna ikualaaqtuq iglumiiraanginnahuaqlutin ukkuat igalaallu ukkuaqhimalugin. Inuit takujaqtukhat munaqhitkunnik mihingnaqhigumik imaatun ajurnaqhikpat aniqhaaktariami imaaluunniit hukatirnirnik hatqami.

Amigarnarnirnin Havaguiqhimallangniq Havaktinun (Havaktiliqijikkut)

Havaktiit hulaqutigijauhimajun ikualaarnirmin pittaaqtun Amigarnarnirnun Havaguiqhimallangnirnik talvunga Januali 19mun. Una havaguiqhimallangniq hulaqutingittuq tahamaniittunik havaguiqhimallangnikkut ikaarniinnun. Havaktiit ihumagumik pijukhat aallaniklu havaguiqhimallangnirnik qaangiutaanun Januali 19mi, uqaqatigidjavan atanngujat unalu/unaluunniit HRkunni atanngujauq uqautigilugin qanuriliurutikhat. Akhuuqtavun taapkuat hulaqutigijauhimajut pilutik havaguiqhimallangnikkut aturutikhat pipkainirnun inuuhirittiarutikhainnun uvani ajurnarnirmi.

Amigarnarnikkut Ikajuuhiarutikkut (Ilagiiktunun Havagvia)

Amigarnarnikkut Ikajuuhiarutikkut ikajuqtaaqtut pipkailutik ihariagijaujunik hunanik imaatun aannuraanik, halummadjutikhanik, niqikhanik, biibit maamautainnik milukhainniklu, aallaniklu ihariagijaujunik.

Amigarnarnikkut Ikajuuhiarutikkut hailihimajun tamainnun Nunavunmiunnun atuqhimajun hunairutinik ingmi piutimingnik iglukhainikluunniit, humaangittumik naliak tadja Ikajuuhiarnirnun ilaukpata.

Akhuuqtavun tamaita hulaqutihimajun tahamaniittut tukhiqlutik ikajuutikhanik pijukhaukpat:

• Uqaqatigilugu nunallaarni Ikajuuhiarutikkut havagvia.
• Iqalungni, takujaqtuqlugu Ikajuuhiarutikkut Havagvia uvani Building 607mi.
• Iqalungmiutat hulaqutihimajuq uvani Building 1088 ikualaarnirmin hivajaqtaaqtullu (867) 975-5278mun qaritaujakkut titiqqilugilluunniit AOqallak@gov.nu.ca ikajuutikhanun.

Ihumakkut Ikajuutikhat (Aanniaqtailinirmut)

Akhuurnaqtuq pidjutaanik ihumagittiarnirnun ihumaptingnik inuuhirittiarutiptingniklu. Ilvin kinamikluunniit ilihimajarnik ajuqhaliqqata, ilihimalutin avaliingaangittutin. Uqaqatigijumagungni uqaudjiujumik, hivjaqlugu 867-975-5900. Uqaudjijit hailihimajun hivajautikkut takujaqtuqlutilluunniit ihaqhilutin takujaqtuqvikhamik. Aallanullu aturutikhanun, takuglugu https://www.gov.nu.ca/en/health/mental-health-resources.

Havaktinun Ilagiiktunullu Ikajuutikhani Pinahuaruti (Havaktuliqijikkut)

Una Havaktinun Ilagiiktunullu Ikajuutikhani Pinahuaruti (EFAP) hailihimajuq hiamitiqtilimaittunik, pijumajunik uqaudjinik havagutinik piliuqhimajun ikajuriamingnik ilingnik munaridjutikharnun ajuqharnirmi ihumaalungnirmilu ihuaqtumik. Pijaami uqaudjinik havagutinik, havaktiit ilagijaillu hivajaqtaaqtun uvunga 1-800-663-1142.

Kinaujaakharnik Naunaijarutainnik Himmautikhat (Pivalliadjutikkut Ingilradjutikkullu)

Kitkulli tammakhimajait akhaluutikkut laisimingik kinaujaakhamingnikluunniit naunaijarutainnik ikualaarnirmi takujaqtuqtaaqtait Akhaluuhiqijikkut havagvia uvani 1104C pijaamingnik titiraqhimajunik itquumajumik aajjiliuqhimajun hapkuninga titiqqanik aturiamingnik imaatun kavamatkunnin-tunijauhimajun piksaliuqhimajun inuup naunaitkutaanik talvunga himmautikhaq tikidjutikhaanun.

Canadian Red Cross-min Ikajuutikhat (Nunalingni Kavamatkunnilu Pivikhaqautikkut)

Nunavut Kavamanga ikajuqtaa Nunalipaujaa Iqaluit havaqatigiingnikkut una Canadian Red Cross-kut. Qujaginnaq ilagiiktun hulaqutijauhimajun uumanga ikualaarnirmin apirijaujun pijukhat atiliuqtauhimalutik uvani Nunalipaujaami Iqaluit pijaami Red Cross-kut tunijaujaanginnik ihuaqtunik uqaqatigivikhakkut naunaitkutainnik pipkaijaami inungnik naunaijaqlugin kitunik ikajuutikhanik hailihimaajaaqtun taapkununga.

Inuit apirijaujun hivaqujauplutik Nunalipaujaami Iqaluit hivajautaa uvani 867-979-5650 tunilutiklu:

• Igluqpaup nampaa.
• Qaffiujun inuit iglungni.
• Ukiungit tamainni iglumiutarijarni.

GNkut NHCkullu qujagijun ikajuutingnik aulahimmaaqtillutik kiudjutikkut qanuriliurutimi.