ᐱᔾᔪᑎᓕᒃ
ᐱᔾᔪᑎᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂᑦ
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ (NHC) ᓴᖅᑭᑎᑕᐅᓚᐅᖅᓯᒪᕗᖅ 2000-ᒥ ᐅᕘᓇ ᓄᓇᕗᒻᒥ ᒪᓕᒐᓕᐊᒧᑦ ᓄᓇᑦᓯᐊᕐᒥ ᐃᒡᓗᓕᕆᔨᕐᔪᐊᒃᑯᓐᓂ (ᓄᓇᕗᑦ) ᒪᓕᒐᕐᒧᑦ. ᐱᓕᕆᐊᒃᓴᕆᔭᕗᑦ ᐃᓄᓕᒫᓄᑦ ᐱᓕᕆᔨᐅᓪᓗᑕ ᓄᓇᕗᒻᒥ ᒐᕙᒪᒃᑯᓐᓄᑦ (GN) ᓴᖅᑭᑎᑦᑎᓂᕐᒧᑦ, ᐊᐅᓚᑦᑎᓂᑉᒧᑦ ᐊᒻᒪᓗ ᑲᒪᒋᔭᖃᕐᓂᕐᒧᑦ ᐃᒡᓗᓕᕆᔨᒃᑯᓐᓄᑦ ᐱᓕᕆᐊᒃᓴᓂᑦ ᑐᓂᓯᔪᓐᓇᕐᓂᐊᕋᑦᑕ ᓈᒻᒪᑦᑎᐊᖅᑐᒥ ᐊᑐᐃᓐᓇᖃᕐᓂᕐᒥᑦ ᐊᔾᔨᒌᙱᕈᓘᔭᖅᑐᓂ ᐊᑭᑐᓗᐊᙱᑦᑐᓂ ᐃᒡᓗᖃᕐᓂᕐᒧᑦ ᓂᕈᐊᒐᒃᓴᐅᔪᓂᑦ ᐃᓚᒌᓄᑦ ᐊᒻᒪᓗ ᐃᓄᑐᐃᓐᓇᓄᑦ ᓄᓇᕗᒻᒥ.
ᑕᐅᑐᙳᐊᖅᑕᕗᑦ
ᑕᑯᓐᓇᙳᐊᖅᑕᕗᑦ ᐃᒡᓗᖃᖅᑎᑦᑎᓂᕐᒥᑦ ᓄᓇᕗᒻᒥ ᐃᓚᒌᖕᓄᑦ ᐊᒻᒪᓗ ᐃᓄᑐᐊᕐᓄᑦ ᐊᑲᐅᔪᒥᒃ ᐊᑐᐃᓐᓇᖃᑦᑎᐊᕐᓗᑎᒃ ᐊᔾᔨᒌᙳᕈᓘᔭᖅᑐᓂᑦ ᐊᑭᑐᓗᐊᙱᑦᑐᓂᑦ ᐃᒡᓗᓂᒃ ᓂᕈᐊᕈᓇᖁᓪᓗᒋᑦ
ᑐᕌᒐᒃᓴᕗᑦ
ᐱᕕᒃᓴᖃᕐᑎᑎᔪᓇᖁᓗᒋᑦ ᑕᒪᐃᓐᓂᓕᒫᖅ ᓄᓇᕗᒻᒥᐅᓂᒃ ᐊᖏᕋᖃᖁᓪᓗᒋᑦ ᐋᓐᓂᐊᖃᕐᓇᖏᑐᓂᒃ, ᐱᕐᕈᓗᐊᕿᓐᓇᖏᑐᓂᒃ, ᐃᒻᒥᓂᖅᓱᕈᓐᓇᕐᓗᑎᒃ ᐃᓅᓯᕐᒥᓂᓪᓗ ᐅᐱᒋᓂᕐᓴᐅᓕᕈᓐᓇᕐᓗᑎᒃ ᐊᖅᑯᑎᒋᔭᐅᓗᑎᒃ ᐱᓕᕆᖃᑎᒋᓗᒋᑦ ᓄᓇᖅᑲᑎᖏᑦ ᐱᓕᕆᔨᐅᔪᓐᓇᕐᓯᓂᐊᕐᒪᑕ ᐃᒻᒥᓂᒃ ᐃᓪᓗᓕᕆᓂᕐᒥᑦ ᓄᓇᕗᒻᒥ.
ᐅᒃᐱᕆᔭᐅᔪᑦ
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ (NHC) ᐅᒃᐱᕈᓱᖕᒪᑕ ᐊᒻᒪᓗ ᑐᕌᒐᖃᖅᖢᑎᒃ ᐅᑯᓂᖓ ᐅᒃᐱᕆᔭᐅᔪᓂᑦ:
ᐃᓕᓯᓂᖅ ”ᐃᓄᖁᑎᖏᓐᓂᒃ” - ᐃᖅᑲᓇᐃᔭᖅᑎᖁᑎᖏᑦ, ᓄᓇᓕᖕᓂ ᐃᒡᓗᓕᕆᔨᐅᔪᑦ ᑎᒥᖁᑎᖏᑦ (LHO) ᐱᓕᕆᖃᑎᒋᔭᐅᔪᑦ, ᐃᒡᓗᖃᖅᑎᑕᐅᔪᑦ ᐊᒻᒪᓗ ᐱᔨᑦᑎᖅᑕᐅᔪᑦ - ᓯᕗᓪᓕᐅᔾᔭᐅᖃᑦᑕᕐᓗᑎᒃ ᐃᒡᓗᓕᕆᓂᕐᒧᑦ ᐋᖅᑭᒍᑎᒃᓴᓂᒃ ᐃᓱᒪᒃᓴᖅᓯᐅᕈᑎᖃᖅᑎᓪᓗᒋᑦ ᓄᓇᕗᒥᐅᓕᒫᓄᑦ;
ᐃᓕᓴᕆᓪᓗᒍ ᐃᑲᔪᕐᓂᖃᕐᓂᖓ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᒻᒪᓗ ᓄᓇᓕᖕᓂ ᐃᒡᓗᓕᕆᐅᔨᐅᔪᑦ ᐃᖅᑲᓇᐃᔭᖅᑎᖏᓐᓂᑦ ᓄᓇᕗᒻᒥ ᐊᒻᒪ ᐃᖅᑲᓇᐃᔭᕐᕕᖃᑦᑎᐊᑎᓪᓗᒋᑦ ᐱᓕᕆᕝᕕᖃᑦᑎᐊᓂᐊᕐᒪᑕ ᐊᒻᒪ ᐱᓕᕆᔾᔪᑎᖃᑦᑎᐊᑎᓪᓗᒋᑦ ᐃᑲᔪᕈᓐᓇᕐᓂᓕᒫᒥᒍᑦ ᐃᑲᔪᕈᓐᓇᖃᑦᑕᕐᓂᐊᕐᒪᑕ;
ᐱᐅᔪᒥᒃ ᐊᒃᑐᐃᓯᒪᓂᖃᖃᑕᐅᓪᓗᑎᒃ ᐃᒡᓗᐃᑦ ᐱᐅᓂᖏᓐᓄᑦ ᐊᒻᒪᓗ ᐊᑭᑐᓗᐊᖏᓐᓂᒃᓴᖏᓐᓄᑦ;
ᓇᓗᓇᐃᔭᐃᓂᖅ ᐱᐅᑦᑎᐊᖅᑐᒥ ᐅᖃᐅᔾᔨᓂᐅᔪᒥᑦ, ᐃᑲᔪᕐᓂᕐᒥᑦ ᐊᒻᒪᓗ ᐃᑲᔪᖅᓱᐃᓂᕐᒥᑦ ᓄᓇᓕᖕᓂ ᐃᒡᓗᓕᕆᔨᐅᔪᑦ ᑎᒥᖁᑎᖏᓐᓄᑦ, ᐊᓯᖏᓐᓄᑦ ᐱᔨᑦᑎᖅᑕᐅᔪᓄᑦ ᑲᑐᔾᔨᖃᑎᒌᖑᔪᓄᑦ ᐊᒻᒪᓗ ᐱᓕᕆᔨᐅᔪᓄᑦ ᐊᒻᒪᓗ ᐃᓄᑐᐃᓐᓇᕐᓄᑦ;
ᓇᓗᓇᐃᔭᐃᓂᖅ ᐱᐅᑦᑎᐊᖅᑐᒥ ᐱᖁᑎᓕᕆᓂᕐᒥᑦ ᐱᔨᑦᑎᕋᕐᓂᕐᒥᑦ ᓄᓇᕗᒻᒥ ᐃᓄᓕᒫᓄᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᐃᒡᓗᖃᖅᑎᑦᑎᓂᕐᒧᑦ;
ᐱᑦᑎᐊᕐᓂᖏᓐᓂᑦ ᐃᒡᓗᖁᑎᒋᔭᐅᔪᓂᑦ ᐱᖁᑎᒋᔭᓂᓪᓗ ᑲᒪᑦᑎᐊᕐᓂᕐᒥᑦ;
ᐊᑐᕐᓂᕐᒥᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐃᓱᒪᓕᐅᕐᓂᖃᖅᐸᓪᓕᐊᑎᓪᓗᒋᑦ;
ᓴᓇᓗᑎᒃ ᐱᓕᕆᖃᑎᒌᑦᑎᐊᕐᓂᕐᒥᑦ ᐊᓯᖏᓐᓂ ᒐᕙᒪᒃᑯᓐᓂ ᑎᒥᖁᑎᐅᔪᓄᑦ, ᐱᓕᕆᕕᓄᑦ ᐊᒻᒪᓗ ᑕᒪᒃᑭᓂ ᓄᓇᓕᖕᓂ ᐊᒻᒪᓗ ᐃᓄᖕᓂ ᑲᑐᔾᔨᖃᑎᒌᖑᔪᓄᑦ.
ᐊᐅᓚᑦᑎᓂᖅ
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ (ᐃᒡᓗᓕᕆᔨᕐᔪᐊᒃᑯᑦ) ᐃᓄᓕᒫᓄᑦ ᐱᔨᑦᑎᖅᑑᓪᓗᓂ ᑎᒥᐅᕗᖅ ᑎᓕᔭᐅᓯᒪᓪᓗᓂ ᓄᓇᕗᒻᒥ ᒐᕙᒪᒃᑯᓐᓂᑦ (GN), ᐱᙳᖅᑎᑕᐅᓯᒪᓪᓗᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ () ᒪᓕᒐᖓᓐᓂ. ᑕᐃᒪᐃᑦᑑᓪᓗᓂ ᑎᒥᐅᔪᖅ, ᓲᕐᓗ ᑯᐊᐳᕇᓴᐅᓪᓗᓂ ᑕᓕᕆᔭᐅᕗᖅ ᓄᓇᕗᑦ ᒐᕙᒪᖓᓐᓄᑦ, ᐊᐅᓚᓂᒃᓴᖓ ᐊᕙᓗᓕᐅᖅᑕᐅᓯᒪᓪᓗᓂ ᑕᐃᑲᓂ ᓇᓗᓇᐃᖅᑕᐅᓯᒪᔪᑦ ᐃᓚᖓᓐᓂ IX ᑮᓇᐅᔭᓕᕆᓂᕐᒧᑦ ᐊᐅᓚᑕᐅᓂᖓᓂ ᒪᓕᒐᕐᒥ, ᐃᓗᐊᓂ ᑖᓐᓇ ᒪᓕᒐᖅ ᐱᔾᔪᑎᖃᓗᐊᕐᒪᑦ ᐃᓄᓕᒫᓄᑦ ᐱᔨᑦᑎᖅᑐᓄᑦ ᑎᒥᐅᔪᑦ ᐊᐅᓚᓂᒃᓴᖏᓐᓄᑦ.
ᐃᒡᓗᓕᕆᔨᕐᔪᐊᒃᑯᑦ ᐅᓂᒃᑳᕆᐊᖃᓲᖑᕗᑦ ᒪᓕᒐᓕᐅᕐᕕᖕᒧᑦ, ᒥᓂᔅᑕᐅᑎᑦ ᑲᑎᒪᔨᖏᑦ ᐊᒻᒪᓗ ᓄᓇᕗᒥᐅᓄᑦ ᐊᖅᑯᑎᒋᓪᓗᒍ ᐊᖓᔪᖅᑳᖓᑦ ᐊᒻᒪᓗ ᒥᓂᔅᑕᐅᔪᖅ ᑲᒪᒋᔭᖃᖅᑐᖅ ᐃᒡᓗᓕᕆᔨᕐᔪᐊᒃᑯᓐᓄᑦ. ᑕᐃᒪᐃᖃᑦᑕᖅᑎᓪᓗᒋᑦ ᒥᓂᔅᑕᐅᔪᖅ ᐱᔪᓐᓇᖅᑕᒥᒍᑦ ᐱᒡᒍᔫᑎᑦᑎᓂᖃᕐᒪᑦ ᐃᒡᓗᓕᕆᔨᕐᔪᐊᒃᑯᓐᓂᑦ ᐅᓪᓗᒥ ᐃᓄᖕᓄᑦ ᐱᔨᑦᑎᖅᑕᖏᓐᓄᑦ ᐊᒻᒪᓗ ᓯᕗᓂᒃᓴᑦᑎᓐᓄᑦ ᐋᖅᑭᒃᓱᐃᑦᑎᐊᕈᓐᓇᐅᑎᒋᓪᓗᒍ.
ᐃᓕᓴᕆᔭᐅᓂᖓᓂ ᐃᓄᓕᒫᓄᑦ ᐱᔨᑦᑎᖅᑐᓄᑦ ᐊᒥᓱᓂᒃ ᐱᕕᒃᓴᖃᕐᓂᐅᔪᓂᑦ, ᐃᓚᖃᖅᖢᓂ:
- ᐱᔪᓐᓇᕐᓂᕐᒥᑦ ᐃᓯᖃᑎᖃᕐᓂᕐᒥᑦ ᐊᓯᐊᓐᓂᒃ ᑮᓇᐅᔭᖅᑖᕋᓱᒍᓐᓇᕐᓂᖓ ᐱᓕᕆᖃᑎᖃᕐᓗᑎᒃ, ᐱᓪᓗᐊᖅᑐᒥᒃ ᑲᓇᑕᒥ ᓇᖕᒥᓂᖃᕐᓂᕐᒧᑦ ᐊᑭᓕᐅᑎᓄᑦ ᐊᒻᒪᓗ ᐃᒡᓗᓕᕆᔨᕐᔪᐊᒃᑯᑦ (CMHC). ᑕᒪᓐᓇ ᑐᑭᖃᖅᑐᖅ ᓄᓇᕗᒻᒥ ᐊᐅᓚᔾᔪᑎᒃᓴᓄᑦ ᒐᕙᒪᑐᖃᒃᑯᓐᓂ ᑮᓇᐅᔭᐃᑦ ᖃᐃᑕᐅᖃᑦᑕᖅᑐᑦ ᐊᒃᑐᐃᔪᓐᓇᖏᑦᑐᑦ ᐃᒡᓗᓕᕆᔨᕐᔪᐊᒃᑯᑦ ᑮᓇᐅᔭᖅᑖᕈᑎᒋᓲᖏᓐᓂᒃ.
- ᐱᔪᓐᓇᕐᓂᖃᕐᓂᖓ ᑮᓇᐅᔭᓂᒃ ᐊᒥᐊᒃᑯᖃᑐᐊᖅᐸᑦ ᐊᕐᕌᒍᒧᑦ ᐃᑳᕐᕕᒋᕋᑖᖅᑕᖓᓄᑦ ᓇᒃᓴᕈᓐᓇᕐᓂᖓ, ᑕᒪᒃᑯᐊ ᐃᒡᓗᓕᕆᓂᕐᒧᑦ ᑐᕌᖓᔪᑦ ᑮᓇᐅᔭᖅᑖᕈᑎᒋᓯᒪᔭᖏᑦ ᐊᑑᑎᖃᕐᕕᒋᒋᐊᓕᖏᓐᓄᑦ ᐊᑐᖅᑎᑕᐅᔪᓐᓇᓚᕿᓲᖑᔪᑦ
- ᑎᒍᒥᐊᖅᑎᐅᓂᖏᓐᓄᑦ ᑮᓇᐅᔭᖏᓐᓂᒃ ᐊᑭᑐᔫᑎᓂᑦ ᐊᒻᒪᓗ ᐊᐅᓚᔾᔪᑎᖏᑦ ᐊᒻᒪ ᐋᖅᑭᐅᒪᐃᓐᓇᕈᑎᖏᓐᓄᑦ ᑲᑎᙵᓂᐅᔪᑦ, ᑐᓂᓯᔪᓂ ᐃᒡᓗᓕᕆᔨᕐᔪᐊᒃᑯᓐᓂ ᑕᒪᐃᑎᒍᑦ ᐱᔪᓐᓇᕐᓂᐊᕐᓂᕐᒥᑦ ᑐᓂᓯᓂᕐᒧᑦ ᐃᒡᓗᖃᖅᑎᑦᑎᓂᕐᒧᑦ ᐱᒋᐊᕈᑕᐅᔪᓂᑦ.
ᐊᐅᓚᑦᑎᓂᖅ
ᐃᒡᓗᓕᕆᔨᕐᔪᐊᒃᑯᑦ ᐊᑐᐃᓐᓇᖃᖅᑎᑦᑎᕗᖅ ᖃᔅᓯᒐᓚᖕᓂ ᐃᒡᓗᑖᕐᓂᕐᒧᑦ ᓂᕈᐊᒐᒃᓴᐅᔪᓂᑦ ᐃᓚᖃᖅᖢᓂ ᑐᓂᓯᓂᕐᒥᑦ ᐃᓕᓐᓂᐊᕐᓂᕐᒥᑦ, ᐱᓕᒻᒪᒃᓴᓂᕐᒥᑦ ᐊᒻᒪᓗ ᐃᑲᔪᖅᓱᐃᓂᕐᒥᑦ ᓄᓇᓕᖕᓂ ᐃᒡᓗᓕᕆᔨᒃᑯᑦ ᑲᑐᔾᔨᖃᑎᒌᖏᓐᓄᑦ (ᓄᓇᓕᖕᓂ ᐃᒡᓗᓕᕆᔨᒃᑯᑦ ᑲᑐᔾᔨᖃᑎᒌᖑᔪᓂᑦ) ᐅᑯᓇᓂ ᐊᓪᓚᕕᓕᕆᓂᕐᒥᑦ, ᑮᓇᐅᔭᓕᕆᓂᕐᒥᑦ, ᐱᓕᕆᐊᒃᓴᓄᑦ ᑐᓂᓯᓂᕐᒥᑦ ᐊᒻᒪᓗ ᐋᖅᑭᐅᒪᑎᑦᑎᓂᕐᒥᑦ; ᑐᓂᓯᓪᓗᑎᒃᐊᖏᕐᕋᒥᒃ ᓇᖕᒥᓂᖃᕐᓂᕐᒥᑦ ᐱᔨᑦᑎᕋᕐᓂᐅᔪᓂᑦ ᐅᑯᓇᓂ ᑮᓇᐅᔭᓕᕆᓂᕐᒧᑦ ᐊᒻᒪᓗ ᐱᓪᓗᑯᒋᐊᓕᖅᑎᒍᑦ ᐃᑲᔪᖅᓯᒪᒍᑏᑦ ᐊᒻᒪᓗ ᐊᐅᓚᑦᑎᓂᕐᒥᑦ ᐃᒡᓗᖃᖅᑎᑦᑎᓂᕐᒧᑦ ᐱᔾᔪᑎᓕᖕᓂ ᐃᑲᔪᖅᓱᐃᓂᕐᒧᑦ ᐊᒃᓱᕈᕈᑕᐅᔪᓂᑦ ᑭᒡᒐᖅᑐᐃᓪᓗᑎᒃ ᓄᓇᕗᒻᒥᐅᑕᓕᒫᓄᑦ. ᑕᒪᒃᑯᐊ ᐱᓕᕆᓂᐅᔪᑦ ᐋᖅᑭᒃᓱᖅᑕᐅᕙᒃᐳᑦ ᑎᓴᒪᓂ ᓇᓗᓇᙱᑦᑎᐊᖅᑐᓂ ᐱᓕᕆᐊᒃᓴᒧᑦ ᑐᓂᓯᓂᐅᔪᒥᑦ: ᐃᓄᓕᒫᓄᑦ ᐃᒡᓗᖃᖅᑎᑦᑎᓂᖅ, ᐃᖅᑲᓇᐃᔭᖅᑎᓄᑦ ᐃᒡᓗᖃᖅᑎᑦᑎᓂᖅ, ᐃᒡᓗᒥᒃ ᓇᖕᒥᓂᖃᕐᓂᖅ, ᐊᒻᒪᓗ ᐊᖏᕐᕋᖃᙱᓐᓂᐅᔪᓄᑦ.
ᐊᐅᓚᑦᑎᓂᕐᒧᑦ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᐊᒃᓴᖏᓐᓂ, ᒥᑭᑦᑐᒥ ᑎᒥᐅᔪᒧᑦ ᑲᑎᙵᓂᐅᔪᓂᑦ 100-ᓂ ᐃᒡᓗᓕᕆᔨᒃᑯᓐᓂ ᖃᐅᔨᒪᔨᕐᔪᐊᓂᑦ ᐱᓕᕆᖃᑎᒌᒃᐳᑦ ᓴᓇᓂᕐᒧᑦ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᓂᕐᒧᑦ ᑐᕌᖓᔪᒥᑦ ᐱᔨᑦᑎᕋᕐᓂᕐᒥᑦ ᑐᓂᓯᔨᐅᔪᓂᑦ ᑎᒥᐅᓪᓗᑎᒃ. ᐋᖅᑭᒃᓱᖅᑕᐅᓯᒪᓪᓗᓂ ᑕᓪᓕᒪᓄᑦ ᐊᕕᒃᑐᖅᓯᒪᔪᓂ ᑎᑎᕋᕐᕕᓂᑦ, ᑕᒪᓐᓇ ᖃᐅᔨᒪᑦᑎᐊᖅᑐᓂ ᑲᑎᙵᓂᐅᔪᑦ ᐃᑲᔪᖅᓯᖅᑕᐅᒃᑲᓐᓂᖅᐳᑦ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᑦ 25-ᖑᔪᓂ ᓄᓇᓕᖕᓂ ᐃᒡᓗᓕᕆᔨᒃᑯᑦ ᑲᑐᔾᔨᖃᑎᒌᓂᑦ ᑐᓂᓯᕙᒃᑐᓂ ᐱᒻᒪᕆᐅᔪᒥᑦ ᐋᔩᖃᑎᒌᖕᓂᐅᔪᒥᑦ ᑲᑎᙵᓂᖃᕐᓂᐅᔪᒥᑦ ᓄᓇᕗᒻᒥᐅᓂ ᐊᒻᒪᓗ ᓄᓇᓕᖏᓐᓂᑦ.
ᑲᑎᒪᔨᖏᑦ
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ (NHC) ᐱᒋᐊᖅᑎᑦᑎᓚᐅᖅᐳᑦ ᑲᑎᒪᔨᐅᔪᓂᑦ ᐅᑭᐊᒃᓵᒥᑦ 2011-ᒥᑦ. ᑕᐃᒪᐃᓐᓂᖓᓂ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᑐᓕᖅᑎᑦᑎᓚᐅᖅᐳᑦ ᐊᔾᔨᐸᓗᖓᓂ ᐋᖅᑭᒃᓯᒪᓂᐅᔪᒥ ᐊᓯᒋᔭᖏᓐᓂ ᑎᓴᒪᓂ ᓄᓇᕗᒻᒥ ᒐᕙᒪᒃᑯᓐᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂᑦ.
ᑲᑎᒪᔨᖏᑦ ᓇᓗᓇᐃᖅᓯᕗᑦ ᐃᒡᓗᓕᕆᔨᕐᔪᐊᒃᑯᑦ ᐱᔪᓐᓇᕐᓂᖃᕐᓂᖓᓂ ᓇᐅᑦᑎᖅᓱᕐᓂᕐᒥᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑕᒪᐃᑎᒍᑦ ᐱᓕᕆᐊᕆᕙᒃᑕᒥᓂᑦ ᐅᖓᑖᒍᑦ ᖃᐅᑕᒫᖅᓯᐅᑎᓂᑦ ᐊᐅᓚᑕᒥᓂᑦ, ᑲᒪᒋᔭᖃᖅᖢᑎᒃ ᑎᒥᖁᑕᐅᔫᑉ ᐅᓗᕆᐊᓇᕐᓂᖓᓂ ᐊᐅᓚᑕᐅᓂᖏᓐᓂ ᐱᓕᕆᐊᖏᓐᓂᑦ ᐊᒻᒪᓗ ᐱᔪᓐᓇᖅᑎᑦᑎᓪᓗᑎᒃ ᑕᒪᐃᑎᒍᑦ ᑐᕌᖓᓂᖃᖅᑐᒥᑦ ᐋᖅᑭᒃᓯᓂᕐᒧᑦ ᐃᒡᓗᓕᕆᔨᕐᔪᐊᒃᑯᑦ ᐸᕐᓇᒃᑕᐅᓯᒪᓪᓗᓂ ᑐᑭᒧᐊᕈᑎᓕᐅᕐᓂᖓᓂ; ᑲᑎᒪᔨᖏᑦ ᐱᓕᕇᓐᓇᖅᐳᑦ ᐅᖃᓪᓚᒍᔾᔨᓂᕐᒧᑦ ᐱᒻᒪᕆᐅᔪᓄᑦ ᓇᖕᒥᓂᓕᖕᓄᑦ ᐊᒻᒪᓗ ᐃᓄᓕᒫᓄᑦ ᑮᓇᐅᔭᖃᖅᑎᑦᑎᓂᕐᒥᑦ.
ᒫᓐᓇ ᑲᑎᒪᔨᐅᔪᑦ ᐋᖅᑭᒃᓱᖅᓯᒪᕗᑦ ᑕᓪᓕᒪᓂ ᑐᑭᒧᐊᖅᑎᑦᑎᔨᓂᑦ ᐊᔾᔨᒌᙱᕈᓘᔭᖅᑐᓂ ᐊᑐᕐᓂᑯᓕᖕᓂᑦ ᐊᒻᒪᓗ ᐱᓕᕆᓕᒪᓂᖃᖅᖢᑎᒃ ᐅᑭᐅᖅᑕᖅᑐᒥ ᐃᒡᓗᓕᕆᓂᕐᒥᑦ, ᐃᓄᓕᒫᓄᑦ ᐊᑐᐊᒐᓂᑦ, ᑮᓇᐅᔭᓕᕆᓂᕐᒥᑦ, ᐱᓕᕆᐊᒃᓴᒥ ᐱᕙᓪᓕᐊᑎᑦᑎᓂᕐᒧᑦ, ᐱᖁᑎᓕᕆᓂᕐᒧᑦ/ᐱᕙᓪᓕᐊᑎᑦᑎᓂᕐᒥᑦ, ᐃᓅᖃᑎᒌᖕᓂᕐᒧᑦ ᐱᓕᕆᐊᒃᓴᒥᑦ ᐱᕙᓪᓕᐊᑎᑦᑎᓂᕐᒥᑦ, ᐊᒻᒪᓗ ᒪᓕᒐᑎᒍᑦ ᐊᑲᐅᙱᓕᐅᕈᑕᐅᔪᓂᑦ. ᑲᑎᒪᔨᖏᑦ ᐃᒡᓗᓕᕆᔨᕐᔪᐊᒃᑯᓐᓄᑦ ᓴᓇᓯᒪᔭᕆᐊᖃᖅᐳᑦ ᐅᓄᙱᓐᓂᖅᓴᐅᙱᑦᑐᓂ ᑕᓪᓕᒪᓂᒃ ᑐᑭᒧᐊᖅᑎᑦᑎᔨᓂᑦ, ᑭᓯᐊᓂ ᐅᓄᕐᓂᖅᓴᐅᙱᑦᑐᓂ 7-ᓂᑦ. ᑐᑭᒧᐊᖅᑎᑦᑎᔨ ᑲᑎᒪᔨᐅᕗᖅ, ᐃᓱᒪᖅᓱᕐᓗᓂ, ᐊᑯᓂᐅᑎᒋᔪᒥᑦ ᐊᕐᕌᒍᓄᑦ ᐱᖓᓱᓄᑦ. ᑲᑎᒪᔨᑦ ᑐᕌᕐᓂᖃᖅᐳᑦ ᑕᖅᑭᑕᒫᒥ ᐅᖃᓘᑎᒃᑯᑦ ᑲᑎᒪᓂᐅᔪᓂ ᐊᒻᒪᓗ ᑲᑎᖃᑎᒌᒃᐸᒃᖢᑎᒃ ᑕᖅᑭᑦ ᐱᖓᓱᑦ ᐊᓂᒍᕌᖓᑕ.
ᐃᒃᓯᕙᐅᑕᖅ
ᔮᓐ ᐋᑉᑦ
ᔮᓐ ᐋᑉᑦ ᑐᑭᒧᐊᖅᑎᑦᑎᔨᐅᓯᒪᔪᖅ ᑲᑎᒪᔨᓄᑦ ᑕᐃᒪᙵᓂ 2014-ᒥ ᒫᓐᓇᐅᔪᓪᓗ ᐃᒃᓯᕙᐅᑕᕆᔭᐅᓪᓗᓂ. ᐃᑲᔪᖅᑎᓪᓗᐊᑕᐅᓯᒪᕗᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᐃᒃᓯᕙᐅᑕᐅᓂᑰᓪᓗᓂ ᑕᒻᒪᖅᓯᒪᔪᖅᓯᐅᖅᑏᑦ ᑲᑎᒪᔨᕋᓛᖏᓐᓄᑦ ᑐᑭᒧᐊᖅᑎᑦᑎᓪᓗᓂᓗ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᖁᑦᑎᖕᓂᖅᓴᒦᑦᑐᓄᑦ ᐊᐅᓚᑦᑎᔨᓄᑦ. ᔮᓐ ᐊᕐᕌᒍᒐᓴᖕᓄᑦ ᐱᓕᕆᓂᑰᕗᖅ ᐊᖏᖅᓯᒪᓂᖓᓂ ᐊᒻᒪᓗ ᐱᓕᕆᑯᑖᓂᕆᔭᖓᓂ ᑕᒻᒪᖅᓯᒪᔪᖅᓯᐅᑎᒻᒪᕆᐅᑉ ᑲᓇᑕᒥ. ᑮᓇᐅᔭᓕᐊᖑᕙᒃᑐᓄᑦ ᖃᐅᔨᓴᐃᓂᐅᔪᒥᑦ ᐊᖓᔪᖅᑳᖑᓂᕐᒧᑦ, ᔮᓐ ᐱᔭᒃᓴᖃᖅᑎᑕᐅᓚᐅᖅᐳᖅ ᑮᓇᐅᔭᓕᐊᖑᕙᒃᑐᓄᑦ ᖃᐅᔨᓴᐃᓂᐅᔪᒥᑦ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪᓗ ᑐᑦᑕᕕᓪᓗᐊᑕᖏᓐᓂᒃ ᐃᓱᓕᑦᑎᓚᐅᙱᑎᓪᓗᒍ 2012-ᒥ. ᑐᕌᒐᖃᖅᐳᖅ ᐃᑲᔪᑦᑎᐊᕈᒪᓪᓗᓂ ᐱᐅᓛᑦᑎᐊᒃᑯᑦ ᐃᒡᓗᓕᕆᓂᕐᒧᑦ ᓄᓇᕗᒻᒥᐅᓄᑦ, ᑮᓇᐅᔭᕐᓂᒃ ᐅᔾᔨᖅᓱᑦᑎᐊᓯᓐᓈᑦ.
ᑲᑎᒪᔨ
ᔮᓐ ᕼᐊᓯ
ᓅᕙ ᓯᑰᓯᐊᒥᐅᑕᒃᓴᐅᔭᐅᓪᓗᓂ, ᔮᓐ ᓄᓇᕗᒻᒥᐅᑕᐅᓕᖅᑐᖅ ᑕᐃᒪᙵᓂ ᒪᐃ 2001-ᒥ. ᐃᖅᑲᓇᐃᔭᖅᓯᒪᔪᖅ ᓄᓇᓕᐸᐅᔭᒃᑯᓐᓄᑦ ᐃᖃᓗᓐᓂᑦ, ᕼᐋᒻᒪᓚᒃᑯᓐᓄᑦ ᐃᓪᓗᓕᒻᒥᑦ, ᐸᓐᓂᖅᑑᒥᑦ, ᕼᐋᒻᒪᓚᒃᑯᓐᓂᑦ ᑭᙵᕐᓂᑦ, ᐃᑉᐱᐊᕐᔪᒻᒥᑦ ᖃᖓᑦᑎᐊᓵᕐᓗ ᐊᕐᕕᐊᑦ. ᖃᐅᔨᒪᓂᕐᔪᐊᓕᒃ ᕼᐋᒻᒪᓚᒃᑯᓐᓂᒃ ᐊᐅᓚᑦᑎᓂᕐᒥᑦ ᐊᒻᒪ ᑮᓇᐅᔭᓕᕆᔾᔪᓯᕐᓂᒃ ᐃᓚᐅᓂᑰᓪᓗᓂᓗ ᐊᒥᓱᓂᒃ ᑲᑎᒪᔨᓂᒃ ᐊᒻᒪ ᑲᑐᔾᔨᖃᑎᒌᓂᒃ ᐊᒻᒪ ᐃᓛᓐᓂᒃᑯᑦ ᐊᖓᔪᖅᑲᐅᑎᓂᒃ ᐃᓂᖃᕐᓂᑰᓪᓗᓂ. ᐱᔨᑦᑎᕋᖅᓯᒪᕗᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᑲᑎᒪᔨᐅᔪᓂ ᑕᐃᒪᙵᓂ 2019-ᒥ. ᑎᒃᑯᐊᖅᑕᐅᓚᐅᙱᑎᓪᓗᒍ ᒪᕐᕈᐃᖅᓱᖅᖢᓂ ᑲᑎᒪᔨᐅᓚᐅᖅᑐᖅ ᐃᖃᓗᐃᑦ ᐃᒡᓗᓕᕆᔨᒃᑯᑦ ᑲᑎᒪᔨᖏᓐᓂ.
ᑲᑎᒪᔨ
ᐲᑕ ᑖᐸᑕᐃ
ᐲᑕ ᐱᒋᐊᖅᑎᑦᑎᔨᐅᓯᒪᔪᖅ ᐊᒻᒪᓗ ᐊᖓᔪᖅᑳᖑᓪᓗᓂ ᖃᒪᓂᑦᑐᐊᕐᒥ ᑐᙵᕕᖃᖅᑐᒥ ᐲᑕᐅᑉ ᐊᒃᓯᐸᑕᐃᑎᖕ ᓕᒥᑎᑦᒥ, ᐊᐅᓚᓂᖃᖅᓯᒪᔪᖅ ᐊᕙᑎᑦ ᐊᕐᕌᒍᐃᑦ ᐅᖓᑖᓄᑦ. 100 ᐳᓴᓐᑎᒥᒃ ᓇᖕᒥᓂᕆᔭᐅᔪᖅ ᐊᐅᓚᑕᐅᓪᓗᓂᓗ ᐃᓄᖕᓄᑦ. ᐲᑕ ᐃᓅᓯᓕᒫᒥᓂᒃ ᑭᕙᓪᓕᕐᒥᐅᑕᐅᓯᒪᔪᖅ ᑕᑯᓯᒪᓪᓗᓂᓗ ᐋᒡᓃᑯ ᐄᒍ ᐊᐳᖅᑎᓐᓈᖅᑐᒥᑦ ᐅᔭᕋᖕᓂᐊᕐᕕᐅᑉ ᐱᕙᓪᓕᐊᑎᑕᐅᓂᖓᓂ ᑕᐃᒪᙵᓂ ᓄᓇᒥᙶᖅᑐᓂᑦ ᕿᓂᕐᓂᖃᖅᑎᓪᓗᒋᑦ ᑕᐃᑯᖓ ᓴᖅᑭᑎᑦᑎᕙᓪᓕᐊᓂᕐᒧᑦ. ᐱᓕᕆᓯᒪᑦᑎᐊᖅᑐᖅ ᐅᓄᖅᑐᓂᒃ ᐊᕕᒃᑐᖅᓯᒪᔪᓄᑦ ᐱᓕᕆᐊᒃᓴᓄᑦ, ᐊᒻᒪᓗ ᓴᖅᑭᔫᓪᓗᓂ ᓂᐱᖁᑎᒋᔭᐅᓯᒪᕗᖅ ᐱᕈᒃᑲᓐᓂᕈᓐᓇᖅᑐᓂᒃ ᑲᒪᑦᑎᐊᕐᓂᕐᒥᑦ ᐊᑐᓕᖅᑕᖏᑦᑐᓄᑦ ᐃᑲᔪᕈᑎᒃᓴᓄᑦ ᓄᓇᕗᒻᒥ ᐊᒻᒪ ᑮᓇᐅᔭᓂᒃ ᐱᕈᖅᑎᑦᑎᓇᓱᖕᓂᕐᒧᑦ ᑐᖅᑯᖅᓯᓂᕐᒥᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᐃᒡᓗᓕᕆᓂᕐᒧᑦ ᐊᒻᒪ ᐱᓕᒻᒪᒃᓴᐃᓂᕐᒧᑦ. ᖃᐅᔨᒪᑦᑎᐊᖅᑐᖅ ᐃᒡᓗᓕᕆᓂᐅᑉ ᐱᕙᓪᓕᐊᑎᑕᐅᓂᖓ ᐱᒻᒪᕆᐅᓂᖓᓂ ᒪᑭᒪᑎᑕᐅᔾᔪᑕᐅᓂᐊᕐᓂᖓᓄᑦ ᓄᓇᕘᑉ ᓯᕗᓂᒃᓴᖓᓂ. ᐲᑕ ᑐᓂᔭᐅᓯᒪᔪᖅ ᐃᓅᓯᓗᒃᑖᖓᓄᑦ ᐃᓕᓴᕆᔭᐅᓪᓗᓂ ᐃᓚᒋᔭᐅᓂᕐᒧᑦ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ ᐅᔭᕋᖕᓂᐊᕐᕕᑦ ᑲᑎᒪᔨᖏᓐᓂᒃ, ᐃᓕᓴᕆᔭᐅᓯᒪᔪᖅ ᑭᕙᓪᓕᕐᒥ ᓇᖕᒥᓂᖃᖅᑎᐅᓂᕐᒧᑦ ᐊᕐᕌᒍᓕᒫᒧᑦ ᐊᒻᒪᓗ ᒐᕙᒪᑐᖃᒃᑯᑦ ᓵᖏᓐᓂᒃ ᐅᖃᓪᓚᓐᓂᑰᕗᖅ ᐅᔭᕋᖕᓂᐊᕐᓂᐅᑉ ᐊᑦᑐᐃᓂᖃᕐᓂᐊᕐᓂᖓᓂᒃ ᓄᓇᕘᒥ. ᑲᓇᑕᒥ 150 ᐅᔭᒥᒃᑕᐅᓂᑰᓪᓗᓂ 2017-ᒥ ᐊᒻᒪ 2020-ᒥ ᑐᓂᔭᐅᓂᑰᓪᓗᓂ ᐃᓕᓴᕆᔭᐅᔾᔪᑎᒻᒪᕆᖕᒥᒃ ᓄᓇᕘᒥ.
ᑲᑎᒪᔨ
ᐋᓚᓐ ᕋᒻᐳᑦ
ᑎᒃᑯᐊᖅᑕᐅᓪᓗᓂ ᓄᕕᐱᕆ 2022−ᒥ, ᐋᓚᓐ ᕋᒻᐳᑦ ᓇᒃᓴᖅᑐᖅ ᐊᕐᕌᒍᓄᑦ ᖃᔅᓯᒐᓚᖕᓄᑦ ᐃᒡᓗᓕᕆᔨᒃᑯᓐᓂ ᐊᒡᒐᒥᓄ ᐱᓕᕆᓂᑰᕕᓂᕐᓂ ᓴᓇᓂᕐᒥ ᓄᓇᓖᑦ ᖁᓕᕇᖕᓂᖏᓐᓂ. ᐋᓚᓐ 1987−ᒥ ᐱᒋᐊᖅᖢᒍ ᐅᑭᐅᖅᑕᖅᑐᒥ ᓄᓇᖃᖅᓯᒪᔪᖅ, ᓯᕗᓪᓕᐹᓪᓗ 8 ᐊᕐᕌᒍᑦ ᐱᓕᕆᔨᐅᓯᒪᓪᓗᓂ ᓂᐅᕕᕐᕕᖕᒥ ᓂᐅᕕᖅᑎᒃᑯᓐᓂ ᓄᓇᓕᖕᓂ ᐅᓄᖅᑐᓂᒃ. 1995−ᒥ 2005−ᒧ, ᐋᓚᓐ ᓴᓇᔨᐅᓚᐅᖅᑐᖅ ᐃᒡᓗᓕᕆᔨᒃᑯᓐᓄ ᐊᐅᓚᑦᑎᔨᐅᓪᓗᓂ ᓴᓂᑭᓗᐊᖅ ᓄᓇᓕᖓᓂ ᕼᐋᒪᓚᒃᑯᓪᓄᓪᓗ ᑲᑎᒪᔨᐅᓪᓗᓂ ᐊᕐᕌᒍᓄᑦ ᒪᕐᕉᖕᓄ (2). 2008−ᒥ, ᐋᓚ ᓂᕈᐊᖅᑕᐅᓚᐅᖅᑐᖅ ᒪᓕᒐᓕᐅᖅᑎᐅᓂᕐᒧ (MLA) ᓴᓂᑭᓗᐊᖅ ᑭᒡᒐᖅᑐᖅᖢᓂᐅᒃ, ᐊᑯᓂᐅᓂᖓ ᐱᖓᓱᓄᓪᓗ (3) ᒪᓕᒐᓕᐅᖅᑎᐅᓪᓗᓂ. ᒪᓕᒐᓕᐅᖅᑎᐅᑎᓪᓗᒍ, ᐋᓚᓐ ᐃᒃᓯᕙᐅᑕᐅᓚᐅᖅᑐᖅ ᖃᔅᓯᒐᓚᖕᓂ ᑲᑎᒪᔨᕋᓛᓂᒃ ᐊᒻᒪᓗ ᐅᖃᖅᑎᑦᑎᔨᒧ ᑐᒡᓕᕆᔭᐅᓪᓗᓂ ᐊᒻᒪᓗ ᐅᖃᖅᑎᑦᑎᔨᐅᓪᓗᓂ ᒪᓕᒐᓕᐅᕐᕕᖕᒥ. ᐋᓚᓐ ᒫᓐᓇᐅᔪᖅ ᓴᓂᑭᓗᐊᒥ ᓄᓇᖃᖅᑐᖅ ᐃᕐᓂᖓᑕ ᓇᖕᒥᓂᖁᑎᖓᓂᒃ ᐊᐅᓚᑦᑎᓪᓗᓂ.
ᑲᑎᒪᔨ
ᑎᐅᕆᒃ ᐃᓚᐃᐊᔅ
ᑎᒃᑯᐊᖅᑕᐅᓚᐅᖅᖢᓂ ᑲᑎᒪᔨᓄᑦ ᒫᑦᓯ 2024−ᒥ, ᑎᐅᕆᒃ ᐃᓚᐃᐊᔅ ᓇᒃᓴᖅᐳᖅ ᓯᕗᑐᔪᒥᒃ ᓯᕗᑲᑦᑕᖅᑎᐅᓂᑰᓂᕐᒥᓂᒃ, ᐱᓕᕆᐊᒃᓴᓂᒃ ᐊᐅᓚᑦᑎᔨᐅᖃᑦᑕᕐᓂᕐᒥᓂᒃ ᐊᒻᒪᓗ ᐃᒡᓗᓕᕆᖃᑦᑕᕐᓂᑰᓂᕐᒥᓂᒃ ᖃᓄᐃᓕᐅᖃᑦᑕᕐᓂᐊᕐᓂᕆᔭᒥᓄᑦ. ᑎᐅᕆᒃ ᒫᓐᓇᐅᔪᖅ ᐃᖅᑲᓇᐃᔮᓕᒃ ᓇᖕᒥᓂᖅ ᐱᓕᕆᕝᕕᓕᖕᓄᑦ ᐱᕙᓪᓕᐊᑦᑎᔨᐅᓪᓗᓂ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ ᐊᒻᒪᓗ ᐊᕐᕌᒍᓂᒃ 17−ᓂᒃ ᐅᖓᑖᓂ ᐃᓗᓕᑯᓘᔭᕐᓄᑦ ᐱᓕᕆᔨᐅᓂᑰᓪᓗᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᕿᑎᕐᒥᐅᓄᑦ ᐊᕕᒃᑐᖅᓯᒪᔪᒧᑦ ᐊᓪᓚᒡᕕᖓᓂ. ᑎᐅᕆᒃ ᒪᐃᔭᒋᔭᐅᓚᐅᖅᑐᖅ ᐊᒻᒪᓗ ᓄᓇᓕᖕᒧᑦ ᑲᑎᒪᔨᒋᔭᐅᓚᐅᖅᖢᓂᓗ ᐃᖃᓗᒃᑑᑦᑎᐊᕐᒧᑦ ᐊᒻᒪᓗ ᓯᕗᓂᐊᓂ ᓄᓇᕗᒻᒥ ᓄᓇᓖᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᒧᑦ ᑐᒡᓕᒋᐅᓚᐅᖅᖢᓂ, ᓯᕗᑲᑦᑕᖅᑎᐅᓂᑰᒋᓪᓗᓂ ᑲᑎᒪᔨᐅᓂᕐᒥᒍᑦ ᐃᖃᓗᒃᑑᑦᑎᐊᕐᒥ ᐃᒡᓗᓕᕆᔨᕋᓛᖏᓐᓄᑦ ᐊᒻᒪᓗ ᖃᒡᒋᐊᕗᒃᑯᓐᓄᑦ. ᑎᐅᕆᒃ ᐃᖃᓗᒃᑑᑦᑎᐊᕐᒥᐅᑕᐅᔪᖅ ᐃᓚᒋᔭᐅᖃᑕᐅᓪᓗᓂᓗ ᓄᓇᕗᑦ ᑐᙵᕕᒃᑯᑦ ᐃᓄᐃᑦ ᐃᒡᓗᖏᓐᓄᑦ ᐊᒻᒪᓗ ᓄᓇᓖᑦ ᓇᐸᔾᔪᑎᖏᑦᓄᑦ ᐃᓗᓕᑯᓘᔭᖏᓐᓄᑦ ᐱᓕᕆᖃᑎᒌᒃᑐᓄᑦ, ᐃᓚᒋᔭᐅᓪᓗᓂᓗ ᑕᒪᐃᓐᓄᑦ ᐃᖃᓗᒃᑑᑦᑎᐊᑉ ᐃᑯᐊᓚᔪᓕᕆᓂᕐᒧᑦ/ᐃᑲᔪᕐᓂᕐᒧᑦ ᐱᓕᕆᕝᕕᖓᓄᑦ ᐊᒻᒪᓗ ᖃᖓᓲᒃᑯᑦ ᕿᓂᖅᑏᑦ ᑲᑐᔾᔨᖃᑎᒌᖏᑦ ᓄᓇᕗᒻᒧᑦ.
ᑲᑎᒪᔨ
ᐋᓂ ᐊᓂᖕᒥᐅᖅ
ᐋᓂ ᐊᓂᖕᒥᐅᖅ ᐃᓚᒋᔭᐅᖃᑕᐅᓕᓚᐅᖅᑐᖅ ᑲᑎᒪᔨᓄᑦ ᒫᑦᓯ 2024−ᒥ ᐊᔾᔨᒌᙱᑦᑑᑎᓂᒃ ᐃᓕᓐᓂᐊᕐᓂᑰᓪᓗᓂ ᖃᓄᐃᓕᐅᖃᑦᑕᕐᓂᑰᓪᓗᓂᓗ ᓴᖅᑭᔮᕈᑕᐅᔪᓂᒃ ᑕᒪᐃᓐᓂᒃ ᓯᕗᑲᑦᑕᖅᑎᐅᓂᕐᒥᓂᒃ ᐊᒻᒪᓗ ᐱᔪᒪᓂᖃᓪᓚᕆᖕᓂᕐᒥᓂᒃ. ᐃᖃᓗᖕᒥᐅᑕᐅᓪᓗᓂ, ᒫᓐᓇᐅᔪᖅ ᐋᓂ ᐊᖓᔪᖅᑳᒧᑦ ᑐᒡᓕᒋᔭᐅᔪᖅ ᓄᓇᓯ ᑯᐊᐸᕇᓴᒃᑯᓐᓄᑦ, ᐃᒃᓯᕚᖃᑕᐅᓪᓗᓂ ᓄᓇᕗᑦ ᓯᕗᓂᒃᓴᕗᑦ ᐊᒻᒪᓗ ᐴᓚ ᕕᓴᓐ ᓕᒥᑦ ᑲᑎᒪᔨᖏᓐᓂ, ᐊᒻᒪᓗ ᐊᑎᓕᐅᖅᑕᐅᓯᒪᓪᓗᓂ ᑯᐊᐸᕇᓴᓄᑦ ᑐᑭᒧᐊᒃᑎᑦᑎᔩᑦ ᐃᓕᓐᓂᐊᕐᕕᖓᑕ (ICD)−ᕌᑦᒪᓐ ᑐᑭᒧᐊᒃᑎᑦᑎᔨᐅᓂᕐᒧᑦ ᐱᓕᕆᐊᒃᓴᖓᓂ. ᓯᕗᓂᐊᓂ ᒫᓐᓇᐅᔪᖅ ᖃᓄᐃᓕᐅᖃᑦᑕᕐᓂᕆᔭᖓᑕ, ᐊᐅᓚᑦᑎᔨᐅᓚᐅᖅᑐᖅ ᐊᑐᐊᒐᓕᕆᓂᕐᒧᑦ ᐊᒻᒪᓗ ᑐᓴᐅᒪᖃᑦᑕᐅᓕᕆᓂᕐᒧᑦ ᑲᓇᑕᒥ ᑲᑐᔾᔨᖃᑎᒌᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᐊᑐᐊᒐᓕᕆᓂᕐᒧᑦ ᐊᒻᒪᓗ ᐊᕕᒃᑐᖅᓯᒪᓅᖓᔪᓄᑦ ᐅᖃᐅᔾᔨᔨᐅᓚᐅᖅᖢᓂ ᑭᖕ ᑭᒡᒐᖅᑐᖅᑎᖓ−ᓄᓇᖃᖅᑳᖅᓯᒪᔪᓕᕆᓂᖅ ᐊᒻᒪ ᐃᓄᓕᕆᔨᑐᖃᒃᑯᑦ ᑲᓇᑕᒥ, ᐊᒻᒪᓗ ᐱᓯᒪᑦᑎᓪᓗᓂ ᖃᓄᐃᓕᐅᖃᑦᑕᕐᔪᐊᕐᓂᑰᓂᕐᒥᓂᒃ ᐊᓯᖏᓐᓂ ᑲᒪᒋᖃᑦᑕᓚᐅᖅᑕᒥᓂᑦ ᑲᓇᑕᒥ ᓄᓇᕐᔪᐊᕐᒥ ᒪᒃᑯᒃᑐᓄᑦ, ᓄᓇᓖᑦ ᑐᙵᕕᖏᑦ ᑲᓇᑕᒥ, ᐃᓄᐃᑦ ᑕᐱᕇᑦ ᑲᓇᑕᒥ, ᓄᓇᕗᑦ ᑐᙵᕕᒃ, ᐊᒻᒪᓗ ᐃᖅᑲᓇᐃᔭᖃᑎᒋᓪᓗᓂᐅᒃ ᒪᓕᒐᓕᐅᖅᑎᕐᔪᐊᖓ ᓄᓇᕗᒻᒧᑦ. ᐃᖅᑲᓇᐃᔮᕆᖃᑦᑕᕐᓂᕆᔭᖓᑕ ᐅᖓᑖᓂ, ᐃᖅᑲᓇᐃᔮᖃᓚᐅᖅᐸᒃᑐᖅ ᐃᓄᐃᒃᑎᑐᒻᒧᑦ ᐅᖃᐅᔾᔨᔨᐅᓂᕐᒧᑦ ᐊᒻᒪᓗ ᐃᓕᓴᐃᓂᕐᒧᑦ, ᐅᒥᓱᐃᖅᓱᖅᖢᓂ ᑎᑎᕋᐅᓯᕆᔭᐅᖃᑦᑕᖅᓯᒪᓂᑰᓪᓗᓂ ᐅᖃᓕᒫᒐᕐᓂ, ᑲᑕᔾᔭᕐᓂᑰᓪᓗᓂ ᑲᓇᑕᐅᑉ ᓯᓚᑖᓂ, ᐊᒻᒪᓗ ᓇᖕᒥᓂᖅ ᐃᖅᑲᓇᐃᔭᕐᕕᖃᖅᖢᓂ ᑎᒥᒧᑦ ᑕᑭᒥᓇᓕᐅᕐᓂᕐᒧᑦ.
ᑲᑎᒪᔨ
ᐃᒪ ᐸᐅᓘᓯ
ᐃᒪ ᐸᐅᓘᓯ, ᒫᓐᓇᐅᓂᖓᓂᑦ ᐅᖅᓱᖅᑑᕐᒥᐅᑕᖅ, ᐅᑭᐅᓄᑦ 27−ᓂ ᐃᓕᓐᓂᐊᕈᑎᒃᓴᓂᑦ ᐱᓕᕆᓯᒪᓂᑰᓕᖅᑐᖅ ᐃᒡᓗᓕᕆᔨᒃᔪᐊᒃᑯᑦ ᑲᑎᒪᔨᖏᓐᓄᑦ. ᐱᔭᕇᕈᓯᐊᖅ ᓯᕗᓪᓕᕐᒥᑦ ᐃᓕᓐᓂᐊᕐᓂᓕᕆᓂᕐᒧᑦ ᓯᓚᑦᑐᖅᓴᕐᕕᒡᔪᐊᒥᑦ ᕆᔭᐅᓇᒥᑦ, ᐱᓕᕆᖃᑎᖃᖅᓯᒪᔪᖅ ᐃᓐᓇᕐᓂᑦ ᓇᑦᑎᓕᒃ ᐊᕕᒃᑐᖅᓯᒪᔪᓂᑦ, ᐱᕙᓪᓕᐊᑎᑦᑎᓪᓗᓂ ᐱᒻᒪᕆᐅᔪᓂᑦ ᐊᒡᓚᕕᓕᕆᓂᕐᒧᑦ ᐊᐅᓚᑦᑎᔪᓐᓇᕐᓂᕐᒥᑦ. ᐸᐅᓘᓯ ᐱᓕᕆᐊᖃᓪᓚᕆᒃᓯᒪᕗᖅ ᐃᓄᐃᖅ ᖃᐅᔨᒪᔭᑐᖃᖏᓐᓂᑦ, ᑖᓐᓇᓗ ᑕᓯᐅᖅᓯᒪᓪᓗᓂ ᐃᓱᒪᒃᓴᖅᓯᐅᓂᕐᒧᑦ ᐃᑲᔪᖅᐸᒃᖢᓂᓗ ᑲᑎᒪᔨᓂᑦ. ᓄᓇᕗᒻᒥᑦ ᐃᓅᓪᓗᓂ ᐊᖓᔪᖄᖑᓪᓗᓂᓗ ᖁᖅᓲᓐ ᐃᓕᓐᓂᐊᕐᕕᖕᒥᑦ ᐅᖅᓱᖅᑑᒥᑦ, ᐸᐅᓘᓯ ᑐᕌᕆᔭᖃᖅᑐᖅ ᐱᔪᒃᓯᑎᑦᑎᓂᕐᒧᑦ ᐊᓯᖏᓐᓂᒃ, ᐱᓗᐊᖅᑐᒥᑦ ᐃᓄᐃᑦ ᐊᕐᓇᐃᑦ, ᓯᕗᓕᖅᑎᙳᕆᐅᖅᓴᔪᓂᒃ ᐱᓕᕆᖃᑕᐅᖁᓪᓗᒋᑦ.
ᐊᐅᓚᑦᑎᔩᑦ ᐊᒻᒪᓗ ᐊᖓᔪᖅᑲᐅᕕᖓᑦᑕ ᑐᖅᑲᖅᑕᕐᕕᐊ
ᐊᐅᓚᑦᑎᔨᖏᑕ ᑲᑎᒪᔨᕋᓛᖏᑦ ᑲᒪᒋᔭᖃᖅᐳᑦ ᐃᒡᓗᓕᕆᔨᕐᔪᐊᒃᑯᓐᓂᑦ ᓇᓗᓇᐃᖅᓯᓂᕐᒥᑦ ᒪᓕᑦᑎᐊᕐᓂᖏᓐᓂ ᑕᒪᒃᑭᓄᑦ ᐱᓕᕆᐊᖏᓐᓂᑦ ᓄᓇᕗᒻᒥ, ᐃᓚᖃᖅᖢᓂ ᐊᑐᓕᖅᑎᑦᑎᓂᕐᒥᑦ ᐊᑐᐊᒐᓂᑦ, ᒪᓕᒃᑕᐅᔭᕆᐊᓕᖏᓐᓂ ᐊᒻᒪᓗ ᐱᓕᕆᔾᔪᓯᐅᔪᓂᑦ, ᐊᒻᒪᓗ ᑐᓂᓯᓂᕐᒥᑦ ᐱᓕᕆᐊᒃᓴᖏᓐᓂᑦ. ᑲᒪᒋᔭᖃᕆᕗᑦ ᐱᕙᓪᓕᐊᑎᑕᐅᓂᖓᓂ ᐊᑯᓂᐅᔪᒃᑯᑦ ᐸᕐᓇᒍᑎᓂᑦ, ᐊᑐᐊᒐᓂᑦ, ᐊᒻᒪᓗ ᐊᐅᓚᑦᑎᓂᕐᒧᑦ ᒪᓕᒋᐊᓕᖕᓄᑦ ᐊᖓᔪᖅᑲᐅᕕᖓᑕ ᐱᓕᕆᐊᖑᔪᓂᑦ ᑲᑎᒪᔨᖏᓐᓄᑦ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ , ᐊᒻᒪᓗ ᓯᕗᓕᖅᑎᑦ ᑲᑎᒪᔨᓄᑦ (ᒪᓕᒐᓕᐅᕐᕕᖕᒥᑦ). ᖄᒃᑲᓐᓂᐊᒍᑦ, ᓇᓗᓇᐃᖅᓯᕗᑦ ᐱᓕᕆᐊᒃᓴᐅᔪᑦ ᑐᓂᔭᐅᓂᖏᓐᓂ ᒪᓕᒡᓗᑎᒃ ᐃᒡᓗᓕᕆᔨᕐᔪᐊᒃᑯᑦ ᑮᓇᐅᔭᖃᖅᑎᑕᐅᓂᕐᒧᑦ ᐊᖏᕈᑎᓂᑦ ᑲᓇᑕᒥ ᓇᖕᒥᓂᖃᕐᓂᕐᒧᑦ ᐊᑭᓕᐅᑎᓄᑦ ᐊᒻᒪᓗ ᐃᒡᓗᓕᕆᔨᕐᔪᐊᒃᑯᑦ (CMHC).
ᐊᖓᔪᖅᑲᐅᕕᖓᑦᑕ ᐊᑐᐊᒐᓄᑦ ᐊᒻᒪᓗ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑲᑎᙵᔪᑦ ᐱᓕᕆᕙᒃᐳᑦᐱᕙᓪᓕᐊᑎᑦᑎᓂᕐᒥᑦ ᐊᖓᔪᖅᑲᐅᕕᖓᑦᑕ ᐊᑐᐊᒐᓄᑦ, ᑲᒪᔾᔪᑎᓂᒃ ᐸᕐᓇᖕᓂᕐᒧᑦ ᐊᒻᒪᓗ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐱᔾᔪᑎᓕᖕᓂ ᐱᒻᒪᕆᐅᔪᓂ ᐱᓕᕆᐊᒃᓴᐅᓂᐅᔪᓂᑦ. ᑐᓂᓯᕙᒃᐳᑦ ᐃᑲᔪᖅᓱᐃᓂᕐᒥ ᒥᓂᔅᑕᒧᑦ, ᐊᖓᔪᖅᑲᐅᕕᖓᑦᑕ ᐊᐅᓚᑦᑎᔨᖏᓐᓄᑦ ᐊᒻᒪᓗ ᐊᕕᒃᑐᖅᓯᒪᔪᓂ ᑎᑎᕋᕐᕕᖏᓐᓄᑦ.
ᐊᖓᔪᖅᑲᐅᕕᖓᑦᑕ ᑐᖅᑲᖅᑕᕐᕕᐊ ᐊᐅᓚᑦᑎᕗᑦ ᐸᕐᓇᐃᓂᖓᓂ, ᓇᐅᑦᑎᖅᓱᕐᓂᕐᒥᑦ ᐊᒻᒪᓗ ᐅᓂᒃᑳᕆᓂᕐᒥᑦ ᐊᖓᔪᖅᑲᐅᕕᖓᑦᑕ ᐱᓕᕆᐊᒃᓴᖏᓐᓂᑦ. ᑐᓂᓯᕙᒃᑭᕗᖅᑕᐅᖅ ᐃᑲᔪᖅᓱᐃᓂᕐᒥ ᐊᕕᒃᑐᖅᓯᒪᔪᓂ ᑎᑎᕋᕐᕕᖏᓐᓂᑦ ᐱᓕᕆᓂᐅᔪᓂ ᐱᓕᕆᐊᒃᓴᓄᑦ, ᑳᓐᑐᕌᒃᓯᓂᕐᒥᑦ, ᐱᓕᕆᐊᒃᓴᒧᑦ ᐊᐅᓚᑦᑎᓂᕐᒥ, ᐊᒻᒪᓗ ᐱᔭᕆᑐᔪᓄᑦ ᓴᓇᔭᐅᓂᖓᓂ ᐊᒻᒪᓗ ᑲᔪᓯᑎᑦᑎᓂᐅᔪᓂᑦ.
ᐊᕕᒃᑐᖅᓯᒪᔪᓂ ᑎᑎᕋᕐᕕᖏᑦ
ᐃᒡᓗᓕᕆᔨᕐᔪᐊᒃᑯᑦ ᐊᕕᒃᑐᖅᓯᒪᔪᓂ ᑎᑎᕋᕐᕕᖏᑦ ᐊᐅᓚᑦᑎᕗᑦ ᐊᒻᒪᓗ ᑐᓂᓯᓪᓗᑎᒃ ᐃᑲᔪᖅᓱᐃᓂᕐᒥᑦ ᑐᓂᓯᓂᐅᔪᒥᑦ ᐱᓕᕆᐊᒃᓴᓂᑦ ᐊᒻᒪᓗ ᐱᔨᑦᑎᕋᕐᓂᕐᒧᑦ ᓄᓇᓕᖕᓄᑦ. ᐊᕕᒃᑐᖅᓯᒪᔪᓂ ᑎᑎᕋᕐᕕᖏᑦ ᐋᖅᑭᒃᓱᐃᕙᒃᐳᑦ ᐊᕕᒃᑐᖅᓯᒪᓂᐅᔪᓄᑦ ᓯᕗᓪᓕᐅᔾᔭᐅᖁᔭᐅᔪᓂ ᐊᒻᒪᓗ ᐱᓕᕆᖃᑎᖃᖅᖢᑎᒃ ᓄᓇᓕᖕᓂ ᐃᒡᓗᓕᕆᔨᒃᑯᑦ ᑲᑐᔾᔨᖃᑎᒌᖑᔪᓂᑦ ᐊᒻᒪᓗ ᐃᓄᑐᐃᓐᓇᓂᑦ ᐱᓕᕆᔾᔪᔾᔭᐅᕙᒃᑐᓂ ᓇᓗᓇᐃᖅᓯᓂᕐᒧᑦ ᐱᓕᕆᐊᒃᓴᓂᒃ ᑐᓂᔭᐅᓂᖏᓐᓂᑦ ᓈᒻᒪᑦᑎᐊᕋᓗᐊᕐᒪᖔᑕ ᐊᑐᕆᐊᓕᖏᓐᓂ ᐅᕘᓇ ᓇᐅᑦᑎᖅᓱᕐᓂᒃᑯᑦ ᐊᒻᒪᓗ ᖃᐅᔨᓴᕐᓂᒃᑯᑦ ᐊᕕᒃᑐᖅᓯᒪᔪᓂ ᑎᑎᕋᕐᕕᖓᑦ ᑲᒪᒋᔭᖃᖅᐳᖅ ᓇᓗᓇᐃᔭᐃᓂᕐᒥᑦ ᓴᓇᔭᐅᓂᖓᓂ ᐱᓕᕆᐊᒃᓴᖓᑦ ᐱᓕᕆᔭᐅᑦᑎᐊᕋᓗᐊᕐᒪᖔᑕ ᐊᕕᒃᑐᖅᓯᒪᓂᐅᔪᓂᑦ. ᑲᒪᒋᔭᖃᕆᕗᖅ ᑐᓂᓯᓂᕐᒥᑦ ᐊᔾᔨᒌᙱᑦᑐᓂ ᐃᒡᓗᒥᒃ ᓇᖕᒥᓂᖃᕐᓂᕐᒧᑦ ᐱᓕᕆᐊᒃᓴᓂᑦ, ᐊᒻᒪᓗ ᐱᕙᓪᓕᐊᑎᑦᑎᓂᕐᒧᑦ ᐱᐅᔪᒥ ᐱᓕᕆᖃᑎᒌᑦᑎᐊᕐᓂᕐᒧᑦ ᐊᓯᖏᓐᓂ ᒐᕙᒪᓄᑦ ᐱᓕᕆᕕᐅᔪᓂᑦ ᐊᒻᒪᓗ ᑎᒥᖁᑕᐅᔪᓂᑦ.
ᓄᓇᓕᖕᓂ ᐃᒡᓗᓕᕆᔨᒃᑯᑦ ᑲᑐᔾᔨᖃᑎᒌᑦ (LHOs)
ᐃᒡᓗᓕᕆᔨᕐᔪᐊᒃᑯᑦ ᐱᓕᕆᖃᑎᒋᔭᖏᑦ ᓄᓇᓕᖕᓂ ᐃᒡᓗᓕᕆᔨᓂᑦ ᑲᑐᔾᔨᖃᑎᒌᖑᔪᓂᑦ ᓄᓇᓕᖕᓂ ᑭᒡᓕᐅᔪᓂᑦ, ᑐᓂᓯᕙᒃᑐᓂ ᑕᒪᕐᒥᒐᓚᖕᓂ ᖃᐅᑕᒫᖅᓯᐅᑎᓂᑦ ᐱᔨᑦᑎᕋᐅᑎᓂᑦ ᐃᓚᒋᔭᐅᔪᓂᑦ ᐱᓂᕆᐊᖑᔪᒧᑦ ᑐᓂᓯᓂᐅᔪᒥᑦ ᐃᓄᑐᐃᓐᓇᓄᑦ ᐊᒻᒪᓗ ᐃᓚᒌᓄᑦ. ᑕᒪᕐᒥᒐᓚᑦ ᓄᓇᓕᖕᓂ ᐃᒡᓗᓕᕆᔨᓂᑦ ᑲᑐᔾᔨᖃᑎᒌᖑᔪᑦ ᐋᖅᑭᒃᑕᐅᓯᒪᕗᑦ ᐃᒻᒥᒎᖅᖢᑎᒃ ᑲᑐᔾᔨᖃᑎᒌᖑᓪᓗᑎᒃ ᐅᕘᓇ ᑲᑐᔾᔨᖃᑎᒌᖑᔪᓄᑦ ᒪᓕᒐᕐᒥ (ᐃᒡᓗᓕᕆᔨᓂᑦ ᑲᑐᔾᔨᖃᑎᒌᖑᔪᑦ). ᐃᓚᐅᖃᑕᐅᙱᓐᓂᐅᔪᑦ ᑕᒪᑐᒧᖓ ᐅᑯᐊᖑᕗᑦ ᖃᒪᓂᑦᑐᐊᖅ, ᑭᙵᐃᑦ, ᓴᓪᓖᑦ, ᐃᖃᓗᐃᑦ, ᑰᒑᕐᔪᒃ, ᐊᒻᒪᓗ ᑕᓗᕐᔪᐊᖅ ᐃᒡᓗᓕᕆᔨᒃᑯᖏᑦ ᐋᖅᑭᒃᑕᐅᓯᒪᓪᓗᑎᒃ ᐅᕘᓇ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᒪᓕᒐᖓᓐᓂ.
