ᐅᓪᓗᒥ, ᐱᓕᕆᖃᑎᒌᑦ ᐃᓪᓗᓕᕆᔨᒃᑯᓐᓄᑦ ᑲᑎᒪᔭᖅᑐᖅᓯᒪᔪᑦ ᓄᓇᓕᓐᓄᑦ ᐳᓚᕋᕈᒪᓯᒪᔪᑦ ᓄᓇᕗᓕᒫᒥ ᐃᓚᒋᔭᐅᓗᓂ ᐃᒡᓗᓕᐅᖃᑎᒌᓐᓂᖅ ᐅᕝᕙᓘᓐᓃᑦ ᓄᓇᕗᑦ 3000. ᑲᑎᒪᔭᖅᑐᕐᓂᐊᖅᑐᑦ ᖁᓕᓄᑦ ᓄᓇᓕᓐᓄᑦ ᑲᑎᖃᑎᖃᕆᐊᖅᑐᕐᓗᑎᒃ ᓄᓇᓕᓐᓂ ᐃᓪᓗᓕᕆᔨᓂᒃ ᐊᒻᒪ ᕼᐋᒻᒪᓚᒃᑯᓐᓂ ᑐᑭᓯᐊᑦᓯᐊᒃᑲᓐᓂᕈᒪᓗᑎᒃ ᑕᒪᐃᓐᓂᒃ ᓄᓇᓕᓐᓂ ᐊᑐᐃᓐᓇᐅᒋᐊᖃᕐᓂᕐᒧᑦ ᐃᓪᓗᓕᕆᓂᕐᒧᑦ ᐱᕙᓪᓕᐊᔾᔪᑎᓄᑦ ᐱᕙᒌᔭᖅᑎᓪᓗᒋᑦ ᐃᓪᓗᓕᕆᔨᒃᑯᑦ ᐃᓪᓗᖁᑎᒃᓴᖏᓐᓂᒃ.

"ᑖᒃᑯᐊ ᓄᓇᓕᓐᓄᑦ ᐳᓚᕋᕐᓃᑦ ᐱᒻᒪᕆᐅᖃᑕᐅᕗᑦ ᒐᕙᒪᑦᑕ ᐅᐸᓗᖓᐃᔭᐅᑎᖏᓐᓄᑦ ᐊᖏᓪᓕᒋᐊᖅᑎᑦᓯᓂᕐᒧᑦ ᓄᓇᕗᒻᒥ ᐃᓪᓗᖃᖅᑎᑦᓯᓂᕐᒥᒃ 3,000-ᓂ ᐃᓪᓗᒃᓴᓂᒃ 2030-ᕈᓚᐅᖅᑎᓐᓇᒍ," ᐅᖃᖅᑐᖅ ᒪᓕᒐᓕᐅᖅᑎ ᖁᐊᓴ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓄᑦ ( NHC). "ᑖᒃᑯᐊ ᐳᓚᕋᕐᓃᑦ ᐱᕕᒃᓴᑦᓯᐊᕙᐅᕗᑦ ᑐᓴᕆᐊᑦᓴᖅ ᓄᓇᒦᑦᑐᓂᒃ ᑕᒪᐃᓐᓂᒃ ᓄᓇᓕᓐᓂ ᐊᒻᒪ ᐅᖃᖃᑎᒌᒋᐊᖃᖅᓱᑎᒃ ᐱᕙᓪᓕᐊᔾᔪᑎᒃᓴᓂᒃ ᐸᕐᓇᐅᑎᑦᑎᓐᓄᑦ ᐅᓄᖅᓯᒋᐊᖅᑎᓪᓗᒋᓪᓗ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᑦ ᐊᑑᑎᖃᑦᓯᐊᖅᑐᒃᑯᑦ".

ᓄᓇᓕᓐᓄᑦ ᐳᓛᕆᐊᕐᓂᕆᔭᐅᔪᑦ ᐃᓚᖃᕐᓂᐊᖅᐳᑦ ᑲᑎᒪᔭᖅᑐᖅᓯᒪᔪᓂᒃ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓂᑦ, ᓄᓇᓕᓐᓂ ᒐᕙᒪᒃᑯᓐᓂᓪᓗ ᐱᔨᑦᓯᕋᖅᑎᒃᑯᓐᓂᒃ (CGS), ᓄᓇᕗᒻᒥ ᐃᓪᓗᓕᐅᖅᑏᑦ ᑯᐊᐳᕇᓴᖓᑕ ᐱᕙᓪᓕᐊᑎᑦᓯᔩᑦ (NCCD) ᓄᓇᒧᓪᓗ ᐊᖏᕐᕋᕆᔭᐅᔪᓄᑦ (L4H) ᐱᓕᕆᐊᖑᕙᓪᓕᐊᔪᒪᔪᓂᑦ ᐋᖅᑭᑦᓱᐃᓂᐊᖅᓱᑎᓪᓗ 17-ᓂ ᓄᓇᓕᓐᓄᑦ ᐳᓛᕆᐊᕐᓂᖃᖅᓯᒪᑦᓱᑎᒃ ᐅᑭᐊᑦᓵᖓᓂ 2023-ᒥ.

"ᓄᓇᓕᓐᓂ ᐸᕐᓇᐃᓂᖅ ᐃᖏᕐᕋᐃᓐᓇᖅᐳᖅ, ᐊᓯᔾᔨᖅᐸᓪᓕᐊᖏᓐᓇᖅᑐᖅ ᐱᕙᓪᓕᐊᓂᖓ ᑲᑐᔾᔨᖃᑎᒌᒍᑕᐅᔭᕆᐊᖃᖅᓱᓂ ᐱᖃᖃᑕᐅᔪᓄᑦ ᐊᒻᒪ ᓄᓇᓕᓐᓂᙶᖅᑐᓂᒃ ᐅᖃᐅᓯᐅᔪᓂᒃ," ᐅᖃᓚᐅᖅᐳᖅ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᐊᖓᔪᖅᑳᖓ ᐊᒻᒪ ᐊᐅᓚᑦᓯᔨᒻᒪᕆᒃ, ᐃᐅᕆᓐ ᑎᕗᕉ. "ᓄᓇᓕᓕᒫᑦ ᐳᓛᕆᐊᖅᓱᒋᑦ ᐃᓪᓗᓕᐅᖅᑐᖃᓚᐅᖏᑦᑎᓪᓗᒍ, ᖃᐅᔨᔪᓐᓇᖅᐳᒍᑦ ᑕᒪᐃᓐᓂᒃ ᕼᐋᒻᒪᓚᒃᑯᑦ ᓄᓇᓕᓐᓂ ᐸᕐᓇᐅᑎᖏᓐᓂᒃ, ᖃᐅᔨᓴᕐᓗᒋᑦ ᐊᑐᐃᓐᓇᐅᓂᖏᑦ ᐊᒻᒪ ᐊᑐᐃᓐᓇᐅᓂᖏᑦ ᓄᓇᐃᑦ, ᓇᓗᓇᐃᕐᓗᒋᑦ ᓱᓪᓗᓕᓐᓄᑦ ᐊᒻᒪ ᐱᔨᑦᓯᕋᐅᑎᓄᑦ ᓇᓗᓇᐃᕐᓗᒋᓪᓗ ᐊᑐᐃᓐᓇᐅᓂᖏᓐᓂᒃ ᐃᓚᒃᓴᐃᑦ, ᓲᕐᓗ ᑐᐊᐸᒃ."

2024−ᒥ ᕿᒥᕐᕈᑎᑕᐅᓛᖅᑐᑦ ᔪᓚᐃ 2-19, 2024−ᒥ, ᐅᑯᓂᖓᓗ ᓄᖅᑲᕐᕕᑦᓴᖃᖅᓱᑎᒃ:

ᑲᖏᖅᖠᓂᖅ, ᔪᓚᐃ 2-5

ᐊᕐᕕᐊᑦ, ᔪᓚᐃ 5-8

ᖃᒪᓂ'ᑐᐊᖅ, ᔫᓂ 8-10

ᖁᕐᓗᖅᑐᖅ, ᔪᓚᐃ 11-12

ᐃᖃᓗᒃᑑᑦᑎᐊᖅ, ᔪᓚᐃ 11-12

ᐅᖅᓱᖅᑑᖅ, ᔪᓚᐃ 12-13

ᑕᓗᕐᔪᐊᖅ, ᔪᓚᐃ 13-15

ᐃᒃᐱᐊᕐᔪᒃ, ᔪᓚᐃ 15-17

ᐸᖕᓂᖅᑑᖅ, ᔪᓚᐃ 17-18

ᑭᙵᐃᑦ, ᔪᓚᐃ 18-19

ᑐᓴᖅᑕᐅᔪᒃᓴᐃᑦ ᑲᑎᑕᐅᔪᑦ ᐳᓛᕆᐊᕐᓂᕆᔭᐅᔪᑎᒍᑦ ᑐᓴᖅᑎᑦᓯᓂᐊᖅᐳᑦ ᓂᕈᐊᕆᔭᖃᕐᓂᕐᒥᒃ ᐊᒡᒋᖅᐸᓪᓕᐊᔪᒥᒃ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᒃ ᐃᓪᓗᓕᐅᕐᓂᕐᒥᒃ 2025−ᒥ 2026−ᒥᓪᓗ ᐃᑲᔪᕐᓗᑎᓪᓗ ᐅᖃᐅᓯᖃᕐᓂᕐᒧᑦ ᐊᑦᓱᕈᓐᓇᖅᑐᓂᒃ ᐱᕕᑦᓴᖃᕐᓂᐅᔪᓂᓪᓗ ᑲᔪᓯᑎᑦᓯᓂᕐᒧᑦ ᐃᓪᓗᓕᕆᓂᕐᒧᑦ ᑐᕌᕆᔭᐅᔪᓂᒃ ᓴᖅᑭᖅᑎᑕᐅᔪᓂᑦ ᐊᑐᓂᑦ ᓄᓇᓕᓐᓄᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᐃᒡᓗᓕᐅᖃᑎᒌᖕᓂᐅᑉ ᒥᒃᓵᓄᑦ ᐃᓪᓗᓕᕆᓂᕐᒧᓪᓗ ᐱᓕᕆᐊᖑᓂᐊᖅᑐᓄᑦ ᐊᑐᐃᓐᓇᐅᑎᑕᐅᔪᓄᑦ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓄᑦ, ᐅᓇ ᑕᑯᓗᒍ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᐃᑭᐊᖅᑭᕕᖓ.