ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
2024-08-21
ᓴᖅᑭᑕᐅᓂᖓ ᓄᑖᙳᕆᐊᖅᑕᐅᔪᑦ ᓄᓇᕗᒻᒥ ᐃᒡᓗᓂ ᓇᖕᒥᓂᖃᕐᓂᕐᒧᑦ ᐃᑲᔫᑎᑦ (NHAP)
ᐃᖃᓗᐃᑦ, ᓄᓇᕗᑦ (ᐋᒌᓯ 21, 2024) − ᐅᓪᓗᒥ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥᑦ ᐃᒡᓗᓕᕆᔨᕐᔪᐊᒃᑯᑦ (NHC) ᖁᐊᓴᖅ ᑯᓱᒐᖅ ᑐᓴᖅᑎᑦᑎᖃᐅᕗᖅ ᓴᖅᑭᑕᐅᓂᖓᓂᒃ ᒫᓐᓇᓕᓵᖅ ᓄᓇᕗᒻᒥᑦ ᐃᒡᓗᒧᑦ ᐃᑲᔫᑎᒥᒃ (NHAP).
"ᓇᖕᒥᓂᖅ ᐃᒡᓗᑖᕋᓱᖕᓂᖅ ᐊᒃᓱᕈᕐᓇᖅᑑᕗᖅ ᑭᓇᑐᐃᓐᓇᕐᒧᑦ ᐅᕝᕙᓘᓐᓃᑦ ᐃᓚᒌᓄᑦ, ᑭᓯᐊᓂ ᐱᓗᐊᖅᑐᒥᒃ ᓄᓇᕗᒻᒥᐅᓄᑦ, ᐃᒡᓗᑖᕆᔭᐅᖔᕈᓐᓇᖅᑐᑦ ᒥᑭᑦᑐᑯᓘᑎᓪᓗᒋᑦ ᐊᒻᒪ ᐊᑭᖏᑦ ᐊᑭᑐᓗᐊᖅᑎᓪᓗᒋᑦ," ᒥᓂᔅᑕ ᑯᓱᒐᖅ ᐅᖃᖅᑐᖅ. "ᐱᔪᓐᓇᕐᓂᖅᑖᖅᑎᓪᓗᒋᑦ ᓄᓇᓕᖕᒥᐅᑦ ᐱᓕᕆᖃᑕᐅᔪᓐᓇᕐᓗᑎᒃ ᐃᒡᓗᓕᐅᖅᐸᓪᓕᐊᓗᑎᒃ ᐊᒻᒪ ᐃᒡᓗᒥᓂᒃ ᑲᒪᔪᓐᓇᕐᓗᑎᒃ, ᑖᓐᓇ ᐱᓕᕆᐊᖅ ᑐᕌᒐᖃᖅᐳᖅ ᐊᔪᕈᓐᓃᖅᐹᓪᓕᖅᑎᑦᑎᔪᒪᓪᓗᑎᒃ ᐅᓄᖅᓯᒋᐊᖅᑎᓪᓗᒋᓪᓗ ᓄᑖᑦ ᐃᒡᓗᐃᑦ ᓇᖕᒥᓂᕆᔭᐅᔪᑦ ᓄᓇᕗᒥᐅᓄᑦ."
ᑖᓐᓇ NHAP−ᒋᔭᐅᔪᖅ ᐱᑎᑦᑎᓂᐊᖅᐳᖅ ᑲᔪᓯᓂᖃᑦᑎᐊᖅᑐᓂᒃ ᐱᓇᔪᒃᓯᒪᔪᓂᒃ $250,000−ᓂᒃ ᐊᑐᖅᑐᐊᕐᓂᕐᒥᒃ, ᐃᓱᒪᒋᔭᐅᔪᓐᓃᕈᓐᓇᖅᑐᒥᒃ ᐊᕐᕌᒍᐃᑦ ᖁᓕᑦ ᐅᖓᑖᓄᑦ, ᓂᐅᕕᕐᓂᐊᕐᓗᓂ ᐊᐅᓪᓚᖅᑎᑦᑎᓂᐊᕐᓗᓂᓗ NHC-ᑯᓐᓄᑦ-ᐊᖏᖅᑕᐅᓯᒪᔪᒥᒃ ᐃᒡᓗᕐᔪᐊᒧᑦ ᐃᓚᒃᓴᖏᓐᓂᒃ. ᑖᓐᓇ ᐱᓕᕆᐊᖅ ᐃᓚᖃᕐᓂᐊᕐᒥᔪᖅ ᓇᖕᒥᓂᖃᕐᓂᕐᒧᑦ ᐃᒡᓗᒥᒃ ᐃᓕᓐᓂᐊᖅᑎᑦᑎᓂᕐᒥᒃ ᐊᒻᒪ ᐱᓕᕆᐊᒃᒥᒃ ᐊᒻᒪ ᑲᒪᔨᐅᓂᕐᒥᑦ ᓴᓇᔭᐅᑎᓪᓗᒍ.
ᐱᓇᔫᑎᑦ ᐱᔭᐅᔪᓐᓇᖅᑐᑦ ᐅᑐᐱᕆ 18, 2024 ᑎᑭᓐᓇᓱᖕᓂᖓᓂ.
ᐱᓇᕆᓗᒍ ᑐᒃᓯᕋᐅᑎ ᑕᑕᑎᕆᐊᓕᒃ ᑐᑭᓯᒋᐊᒃᑲᓐᓂᕈᒪᒍᕕᓪᓘᓐᓃᑦ, ᖃᐅᔨᒋᐊᕈᓐᓇᖅᐳᑎᑦ ᐃᒡᓗᓕᕆᔨᕐᔪᐊᒃᑯᑦ ᐃᑭᐊᕿᕕᖓᒍᑦ ᐅᕝᕙᓘᓐᓃᑦ ᐃᕐᒌᓐᓈᖅᑕᐅᒃᑯᑦ homeownership@nunavuthousing.ca.
