ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
2024-05-23
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᒻᒪ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᑐᓴᖅᑎᑦᑎᕗᑦ ᐱᓕᕆᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥᒃ
ᐃᖃᓗᒃᑑᑦᑎᐊᖅ, ᓄᓇᕗᑦ (ᒪᐃ 23, 2024) – ᕿᑎᖅᑰᒻᒥ, ᒪᐃ 16, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ (NHC) ᐊᒻᒪ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑦᑎᓚᐅᖅᐳᑦ ᐱᓕᕆᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥᒃ ᐋᖅᑭᒃᓯᒪᓂᒃᓴᖓᓄᑦ ᐊᒻᒪ ᓴᖅᑭᑎᑦᑎᔪᒪᓪᓗᑎᒃ ᓄᑖᒥᒃ ᐱᓕᕆᐊᖑᕙᓪᓕᐊᔪᒪᔪᒥᒃ ᑕᐃᔭᐅᔪᒥᒃ ᓄᓇᕗᒻᒥ ᐊᖅᑯᓯᓂᖅ ᓇᖕᒥᓂᖅ ᐃᒡᓗᖃᕐᓂᕐᒧᑦ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᕿᑎᕐᒥᐅᓂ.
ᐱᓕᕆᖃᑎᒌᓐᓂᕐᒧᑦ ᐊᖏᖃᑎᒌᒍᑎ ᑲᑎᑎᑦᓯᔪᖅ ᖃᐅᔨᒪᔪᒻᒪᕆᐅᓂᖏᓐᓂᑦ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑐᕌᒐᖃᖅᓱᑎᒃ ᐅᓄᖅᓯᑎᑦᓯᓂᕐᒥᑦ ᐃᓪᓗᒥ ᓇᒻᒥᓂᖃᕐᓂᕐᒥᑦ ᓄᓇᕗᒻᒥ ᐅᖃᐅᓯᖃᕐᓂᕐᒥᑦ ᐱᔭᕆᐊᖃᕐᓂᕐᒥᑦ ᒪᑭᑕᑦᓯᐊᓂᖅᓴᒥᑦ, ᐊᑯᓂᐅᔪᒧᑦ ᐃᓪᓗᓕᕆᓂᕐᒧᑦ ᐋᖅᑭᒋᐊᕈᑎᑦᓴᓂᑦ. ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᐋᖅᑭᒃᓯᒪᕗᖅ ᐃᓚᐅᔪᓂᒃ ᐱᕕᖃᖁᓪᓗᒋᑦ ᐊᑭᓖᕙᒌᕈᓐᓇᖁᓪᓗᒋᑦ ᐃᒡᓗᒥᒃ ᓂᐅᕕᕐᓂᐊᕐᓗᓂ ᐊᒻᒪ ᑮᓇᐅᔭᒃᑯᕕᖕᒧᐊᖅᓯᔪᓐᓇᕐᓗᑎᒃ ᑮᓇᐅᔭᓂᒃ.
"ᓄᓇᕗᒻᒥ ᐊᖅᑯᓯᓂᖅ ᓇᖕᒥᓂᖅ ᐃᒡᓗᖃᕐᓂᕐᒧᑦ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᐱᑕᖃᙱᓐᓂᐅᔪᒥᑦ ᐃᒡᓗᓕᕆᓂᕐᒧᑦ ᑲᔪᓯᓂᐅᔪᒥᑦ ᐊᑐᖅᑐᐊᕐᓂᕐᒥᑦ ᐊᒻᒪᓗ ᓇᖕᒥᓂᖅ ᐃᒡᓗᖃᕐᓂᕐᒥᑦ," ᐅᖃᖅᑐᖅ ᖁᐊᓴ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. "ᐱᓕᕆᖃᑎᖃᕐᓗᑕ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᒃᑯᓐᓂᒃ ᑲᔪᓯᑎᑦᑎᔪᒪᓪᓗᑎᒃ ᑮᓇᐅᔭᓕᕆᓂᕐᒧᑦ ᐅᖃᓕᒫᕈᓐᓇᑦᑎᐊᕐᓂᕐᒥᒃ ᐃᒡᓗᒥᒡᓗ ᓇᖕᒥᓂᖅᑖᖅᐸᓪᓕᐊᓂᕐᒧᑦ ᐊᔪᕈᓐᓃᖅᑕᐅᕙᒃᑐᓄᑦ ᐊᔪᕈᓐᓃᖅᓴᕐᓂᕐᒥᒃ ᐊᒃᑐᐊᓂᖃᖅᑐᓂᒃ ᐃᓄᐃᑦ ᖃᐅᔨᒪᔭᑐᖃᖏᑦᑕ ᑐᙵᕕᖏᓐᓂᒃ, ᐱᐅᓂᖅᓴᒃᑯᑦ ᐊᑐᕈᓐᓇᖅᐳᒍᑦ ᓯᕗᓂᒃᓴᒥ ᓇᖕᒥᓂᖅ ᐃᒡᓗᖃᕋᔭᖅᑐᓂᒃ, ᐃᑲᔪᖅᑐᕐᓗᒋᓪᓗ ᐊᖅᑯᓯᓂᕆᔭᖏᓐᓄᑦ ᓇᖕᒥᓂᖅ ᐃᒡᓗᖃᕐᓂᕐᒧᑦ."
ᓯᕗᓪᓕᖅᐹᒥ ᖃᐅᔨᓴᕈᑕᐅᔪᖅ ᐃᓚᖃᕐᓂᐊᖅᑐᖅ ᑎᓴᒪᓂᒃ ᐃᓄᖕᓂᒃ ᖃᑕᙳᑎᒌᓂᒃ ᐃᖃᓗᒃᑑᑦᑎᐊᒥ. ᐊᑐᓂ ᐃᓚᒌᑦ ᐱᑎᑕᐅᓂᐊᖅᑐᑦ ᐊᑐᖅᑐᐊᖅᑕᐅᔪᒥᒃ ᐃᒡᓗᒥᒃ ᓄᑖᒥᒃ ᓴᓇᔭᐅᓵᖅᑐᒥᒃ ᑎᓴᒪᓂᒃ ᑲᑎᙵᔪᓂᒃ, ᑕᖅᑭᑕᒫᑦ ᐃᒡᓗᒧᑦ ᐊᑐᖅᑐᐊᕈᑎᒧᑦ ᐊᑭᓕᐅᑎᓂᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᐃᓚᐅᖃᑕᐅᓂᐊᖅᖢᑎᒡᓗ ᐋᖅᑭᒃᓯᒪᔪᒥᒃ ᑮᓇᐅᔭᓕᕆᓂᕐᒧᑦ ᐅᖃᓕᒫᕈᓐᓇᑦᑎᐊᕐᓂᕐᒥᒃ ᐊᒻᒪ ᐃᒡᓗᒥᒃ ᓇᖕᒥᓂᖃᕐᓂᕐᒧᑦ ᐱᓕᒻᒪᒃᓴᕐᓂᕐᒥᒃ ᐊᕐᕌᒍᓄᑦ ᐱᖓᓱᓄᑦ ᐊᑐᖅᑎᓪᓗᒍ. ᐃᓕᓐᓂᐊᖅᑕᑎᒃ ᐱᐊᓂᒃᐸᑕ, ᐊᔪᙱᑦᑐᑦ ᐃᓚᐅᔪᑦ ᓂᐅᕕᕈᓐᓇᖕᓂᐊᖅᑐᑦ ᓇᖕᒥᓂᖅ ᐃᒡᓗᒥᑦ ᐱᑐᐃᓐᓇᕆᐊᖃᖅᖢᑎᒡᓗ ᓄᓇᕗᒻᒥ ᐊᖅᑯᓯᓂᖅ ᓇᖕᒥᓂᖅ ᐃᒡᓗᖃᕐᓂᕐᒧᑦ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᐊᐃᑦᑑᑎᒥᑦ ᑎᑭᓪᓗᒍ $30,000 ᐃᒡᓗᖓ ᓂᐅᕕᖕᓂᐊᕐᓗᒍ.
"ᕿᑎᕐᒥᐅᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓕᑕᖅᓯᐅᒪᖕᒪᑕ ᐱᒻᒪᕆᐅᓂᖓᓂᒃ ᓇᖕᒥᓂᖅ ᐃᒡᓗᖃᕐᓂᖅ ᐃᓄᖕᓄᑦ ᓄᓇᓂᒃ ᐊᕕᒃᑐᖅᓯᒪᔪᓂ ᖁᕕᐊᓱᒃᖢᑎᒡᓗ ᐱᓕᕆᖃᑎᖃᕆᐊᒃᓴᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᓴᖅᑭᑦᑎᓂᐊᖅᑎᓪᓗᒋᑦ ᑖᔅᓱᒥᖓ ᓄᑖᒥᒃ ᐆᒃᑑᒪᔭᒍᑕᐅᔪᒥᒃ ᐱᓕᕆᐊᒥᒃ," ᐅᖃᓚᐅᖅᐳᖅ ᕌᐸᑦ ᒍᕇᓐᓕ, ᐊᖓᔪᖅᑳᖅ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᓄᑦ. "ᐃᑲᔪᖅᑐᐃᓂᖅ ᐃᓄᓐᓂᑦ ᐃᓪᓗᑖᕋᓱᐊᖅᑎᓪᓗᒋᑦ ᐊᒻᒪᓗ ᕿᓂᖅᑎᓪᓗᒋᑦ ᐱᕕᖃᕐᓂᐅᔪᓂᑦ ᓇᒻᒥᓂᖅ ᐃᓪᓗᑖᕐᓂᕐᒧᑦ ᐃᑲᔪᕐᓂᐊᖅᑐᑦ ᐱᐅᓯᕚᓪᓕᑎᑦᓯᓂᕐᒥᑦ ᖃᓄᐃᖏᑦᓯᐊᕐᓂᖏᓐᓄᑦ ᐃᓚᒌᑦ ᐊᕕᑦᑐᖅᓯᒪᔪᓂᑦ".
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᖃᐅᔨᓇᓱᒃᐸᓪᓕᐊᖏᓐᓇᖅᐳᑦ ᖃᓄᖅ ᑐᓗᖅᑕᕈᑎᖃᙱᓐᓂᖅᓴᐅᔪᓐᓇᕐᒪᖔᑕ ᐃᒡᓗᓂᒃ ᓇᖕᒥᓂᖅᑖᕐᓂᕐᒧᑦ ᓴᖅᑭᑦᑎᓗᑎᒃ ᓄᑖᓂᒃ ᐊᒻᒪ ᒫᓐᓇᓕᓴᕐᓂᒃ ᐃᒡᓗᓂᒃ ᐊᒻᒪ ᐃᒡᓗᓂᒃ ᓇᖕᒥᓂᖅᑖᕐᓂᕐᒧᑦ ᐱᓕᕆᐊᓂᒃ. ᑐᑭᓯᒋᐊᒃᑲᓐᓂᕈᒪᒍᕕᑦ ᐊᓯᖏᓐᓂᑦ ᐱᓕᕆᐊᒃᓴᓂᑦ ᐊᑐᐃᓐᓇᐅᔪᓂᑦ, ᐅᕗᙵᐅᓗᑎᑦ ᓄᓇᕗᒻᒥᑦ ᐃᒡᓗᓕᕆᔨᕐᔪᐊᒃᑯᑦ ᐃᑭᐊᖅᑭᕕᐊᓄᑦ.
