ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
2024-05-29
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ, ᓄᓇᕗᒻᒥ ᓯᓚᑦᑐᖅᓴᕐᕕᒃ, ᐊᒻᒪ ᐱᐅᕚᓐᑯᑦ ᐃᒡᓗᓕᐅᖅᑎᑦ ᐊᑎᓕᐅᖅᐳᑦ ᐱᓕᕆᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥᒃ ᐅᓄᖅᓯᒋᐊᖁᓪᓗᒋᑦ ᓴᓇᑐᓕᖅᓴᕐᕕᖕᒥ ᐱᓕᒻᒪᒃᓴᖅᑎᑦᑎᓂᖅ ᐊᒻᒪ ᐊᑭᑐᓗᐊᙱᑦᑐᓂᒃ ᐃᓕᓐᓂᐊᖅᑎᓄᑦ ᐃᒡᓗᓕᐅᕐᓗᑎᒃ ᑲᖏᖅᖠᓂᕐᒥ
ᐅᓪᓗᒥ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ (NHC) ᖁᐊᓴ ᑯᓱᒐᖅ ᑲᑎᖃᑎᖃᓚᐅᖅᐳᖅ ᒥᓂᔅᑕᒥᒃ ᑲᒪᒋᔭᒃᓴᖃᖅᑎᑕᐅᔪᒥᒃ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥᒃ (NAC−ᒥᒃ) ᑭᐅᕋᓐ ᓄᑕᕋᖅ ᑐᑭᒧᐊᖅᑎᑦᑎᔨᒋᔭᐅᔪᕐᓗ ᐊᑖᔅᑯᐊᕕᓐ ᐃᓕᓐᓂᐊᕐᓂᕐᒧᑦ ᐃᓕᓐᓂᐊᖅᑐᓕᕆᓂᕐᒧᓪᓗ ᐱᓕᕆᔨᖏᑕ ᑎᒥᖁᑖᓂᒃ. (ATEC) ᐊᒻᒪ ᐲᕙᓐ ᐃᒡᓗᓕᐅᖅᑎᑦ ᑲᑎᒪᔨᖓ ᔨᒻ ᒧᐊ, ᐊᑎᓕᐅᖃᑎᒋᓪᓗᒋᑦ ᐱᓕᕆᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥᒃ.
ᐊᖏᕈᑎ ᐱᒋᐊᖅᑎᑦᑎᕗᖅ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᑲᖏᖅᖠᓂᕐᒥ ᐅᓄᖅᓯᒋᐊᖁᓪᓗᒋᑦ ᐊᑭᑐᓗᐊᙱᑦᑐᑦ ᐃᓕᓐᓂᐊᖅᑎᑦ ᐃᒡᓗᖏᑦ ᐊᒻᒪ ᐊᑐᐃᓐᓇᐅᑎᑦᑎᒃᑲᓐᓂᕐᓗᑎᒃ ᓴᓇᑐᓕᖅᓴᕐᕕᖕᒥ ᐱᓕᒻᒪᒃᓴᐅᑎᒃᓴᓂᒃ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑎᓄᑦ.
"ᑕᐅᖕᓂᕆᔭᖏᑦ ᐃᑲᔪᖅᓱᐃᔪᓐᓇᕐᓂᖏᓐᓂᒃ ᐊᒻᒪᓗ ᐱᔪᓐᓇᕐᓂᑖᖅᐹᓪᓕᖅᑎᑦᑎᔪᓐᓇᕐᓂᕆᔭᖏᑦ ᐃᖅᑲᓇᐃᔭᖅᓯᓐᓈᑦ ᐱᓕᒻᒪᒃᓴᓂᒃᑯᑦ ᐱᒃᑯᒍᓱᒃᐳᖓ ᐱᓕᕆᔭᕆᐊᖑᔪᖅ ᐃᔾᔪᐊᒐᒃᓴᑦᑎᐊᕙᐅᓂᖓᓂᒃ, ᑲᖏᖅᖠᓂᕐᒧᑐᐊᖑᙱᑦᑐᖅ, ᑭᓯᐊᓂᓕ ᓄᓇᕗᓕᒫᒥᑦ," ᐅᖃᖅᑐᕕᓂᖅ ᒥᓂᔅᑕ ᑯᓱᒐᖅ. "ᐃᒡᓗᓕᐅᕐᓂᐊᕐᓗᓂ, ᓄᓇᓕᖕᓂ ᐱᔪᓐᓇᕐᓂᖅᑖᖅᑎᑦᑎᔭᕆᐊᖃᖅᐳᒍᑦ. ᐃᔾᔪᐊᖅᓯᓂᖅ ᐱᕚᓐ ᐱᓕᒻᒪᒃᓴᓂᕐᒥ ᐃᓕᓐᓂᐊᕐᓂᕐᒧᓪᓗ ᐊᑐᒐᒃᓴᖓ ᐱᕈᖅᐸᓪᓕᐊᑎᑦᑎᑐᐃᓐᓇᔾᔮᙱᑦᑐᖅ ᑭᓯᐊᓂ ᐱᑎᑦᑎᓂᐊᕐᒥᔪᖅ ᑎᓕᐅᕆᓂᕐᒥᒃ ᒪᒃᑯᒃᑐᓄᑦ ᐃᓱᒪᒋᔭᖃᖅᑐᓄᑦ ᐃᖅᑲᓇᐃᔮᓂᒃ ᓴᓇᔪᓕᕆᓂᕐᒥ ᐃᖅᑲᓇᐃᔭᕐᕕᖕᒥ."
ᐆᒃᑑᒪᔭᒍᑕᐅᔪᖅ ᐱᓕᕆᐊᖅ, ᐱᒋᐊᖅᑕᐅᓂᐊᖅᑐᖅ ᔪᓚᐃ 2024−ᒥ, ᑐᕌᒐᖃᖅᐳᖅ 6−ᓂᒃ ᓄᑖᓂᒃ ᐱᖓᓱᓂᒃ ᐃᒡᓗᕈᓯᓕᖕᓄᑦ ᐃᒡᓗᒃᓴᓂᒃ ᐊᑐᐃᓐᓇᐅᑎᑦᑎᔪᒪᓪᓗᑎᒃ ᐃᓕᓐᓂᐊᖅᑎᓄᑦ ᐃᓚᒌᓄᑦ ᑲᖏᖅᖠᓂᕐᒥ, 2025−ᒥ ᐊᐅᔭᒃᑯᑦ ᐃᓐᓄᒃᑕᐅᓛᖅᖢᑎᒃ. ᐲᕙᐅᓐ ᐱᑎᑦᑎᓂᐊᖅᐳᖅ $3 ᒥᓕᐊᓂᒃ ᐱᖁᑎᓂᒃ ᐱᑐᐃᓐᓇᐅᙱᑦᑐᓂᒡᓗ ᐃᑲᔪᖅᑐᐃᓂᕐᓂᒃ ᐃᒡᓗᓕᐅᖅᑐᖃᕐᓂᖓᓂ, ᑕᒪᒃᑯᐊᓗ ᐃᒡᓗᐃᑦ ᓴᓇᔭᐅᓂᐊᖅᖢᑎᒃ ᐃᓕᓐᓂᐊᖅᑎᓄᑦ ᐃᓕᓴᐃᔨᓄᓪᓗ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐊᔪᙱᓐᓂᓕᖕᓄᑦ ᐃᖅᑲᓇᐃᔭᖅᑎᕈᖅᓴᓂᕐᒧᑦ ᐱᓕᕆᐊᖑᕙᒃᑐᓄᑦ.
"ᐱᓕᕆᖃᑎᖃᕐᓂᕆᔭᕗᑦ ᐱᕚᓐ ᐃᒡᓗᓕᐅᖅᑎᑦ ᐱᓂᐊᕐᓂᕋᖅᓯᒪᔪᑦ ᐃᖅᑲᓇᐃᔭᕐᓂᒃᑯᑦ−ᑐᙵᕕᓖᑦ ᐃᓕᓐᓂᐊᖅᐸᓪᓕᐊᓗᓂ ᐃᖅᑲᓇᐃᔮᖅᑖᕐᓂᕐᒧᑦ 20-40-ᓄᑦ ᐃᓕᓐᓂᐊᖅᑎᓄᑦ ᐃᓚᐅᔪᓄᑦ ᓴᓇᔪᓕᕆᓂᕐᒧᑦ ᐱᓕᕆᐊᒃᓴᑦᑎᓐᓂ," ᐅᖃᖅᑐᖅ ᒥᓂᔅᑕ ᓄᑕᕋᖅ. "ᑖᓐᓇ ᐱᕕᒃᓴᖅ ᐊᔪᙱᑎᑦᑎᔪᖅ ᐃᓕᓐᓂᐊᖅᑎᓂᒃ ᐱᑐᐃᓐᓇᙱᓪᓗᑎᒃ ᖃᐅᔨᒪᓂᕐᓂ ᐊᔪᙱᓐᓂᕐᓂᒃᓗ ᐃᑲᔪᕐᓗᖏᑦ ᓇᖕᒥᓂᖅ ᐱᓕᕆᔨᒻᒪᕆᐅᓂᕐᒧᓪᓗ ᐱᕈᖅᐸᓪᓕᐊᓂᕐᒥ, ᑭᓯᐊᓂᑦᑕᐅᖅ ᐃᓚᐅᖃᑕᐅᑦᑎᐊᕐᓂᒃᑯᑦ ᓄᓇᓕᖕᓂ ᐱᕙᓪᓕᐊᓂᕐᒥ. ᑖᓐᓇ ᐱᓕᕆᔾᔪᓯᖅ ᒪᓕᒃᐳᖅ ᑐᕌᒐᕆᔭᐅᔪᓄᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ."
ᐱᓕᕆᐊᖑᕙᓪᓕᐊᔪᖅ ᑐᕌᒐᖃᖅᑐᖅ ᐊᑐᐊᒐᐅᖃᑦᑕᓕᕐᓂᐊᕐᓗᓂ ᑲᔪᓯᓂᖃᕈᓐᓇᕐᒪᖔᑕ ᖃᐅᔨᓴᕈᑕᐅᔪᓄᑦ ᐱᓕᕆᔾᔪᑕᐅᕙᒡᓗᓂ ᓯᕗᒧᐊᒋᐊᖅᐸᓪᓕᐊᑎᓪᓗᑕ. ᐃᑲᔪᖅᑐᕐᓗᒋᑦ ᐃᓕᓐᓂᐊᖅᑏᑦ ᐃᖅᑲᓇᐃᔭᐅᔮᕐᔪᒡᓗᓂ ᐊᔪᕈᓐᓃᖅᓴᖅᑎᑕᐅᓂᒃᑯᑦ, ᑕᒪᒃᑯᐊ ᐱᓕᕆᐊᒃᓴᐃᑦ ᐊᖏᒡᓕᒋᐊᖅᑎᑦᑎᔪᓐᓇᖅᐳᑦ ᓄᓇᕗᒻᒥᐅᑦ ᐊᔪᙱᓐᓂᖃᖅᑐᓂᒃ ᐃᖅᑲᓇᐃᔭᖅᑎᖏᓐᓂᒃ ᐅᖓᕙᕆᐊᖅᑎᑦᑎᓗᓂᓗ ᐃᒡᓗᓕᕆᓂᕐᒧᑦ ᐋᖅᑭᒃᓯᒪᓕᕈᑕᐅᔪᓐᓇᖅᑐᓂᒃ ᓄᓇᓕᖕᓄᑦ.
“ᐊᒃᓱᒻᒪᕆᐊᓗᒃ ᐱᔪᒪᓂᖅᑖᖅᑎᑕᐅᒃᑲᓐᓂᖅᑐᒍᑦ ᓄᓇᕗᒻᒥᐅᑦ ᑲᑐᔾᔨᖃᑎᒋᓗᒋᑦ ᓄᑖᒥᒃ ᐃᓕᖅᑯᓯᖅᑖᕐᓂᒃᑯᓪᓘᓃᑦ ᐋᖅᑭᒃᓱᐃᔨᑦᑎᐊᕙᙳᕈᓐᓇᕐᓂᖃᕐᒪᑕ ᐱᐅᔪᒧᑦ ᐊᓯᔾᔩᔪᓐᓇᖅᑐᓂᒃ,” ᐅᖃᓚᐅᖅᑐᖅ ᒧᐊ. “ᐊᑕᐅᓯᐅᖃᑎᒌᖕᓂᖅ ᐃᒃᐱᒋᓪᓗᑎᒍᑦ ᑲᑐᔾᔨᖃᑎᒌᒍᓐᓇᕐᓂᕗᓪᓗ, ᐃᒡᓗᕐᔪᐊᓕᐅᑐᐃᓐᓇᙱᓐᓇᑕ, ᓯᕗᓂᒃᓴᕆᔭᐅᔪᓂᒃ ᐊᔪᙱᓐᓂᕐᒥᒃᑕᐅᖅ ᐱᕗᒍᑦ. ᐱᓕᕆᖃᑎᒌᖕᓂᒃᑯᑦ ᐊᒃᓱᕈᖅᑐᐃᓐᓇᐅᓂᑦᑎᓐᓄᓪᓗ ᑐᕌᖅᑕᑦᑎᓐᓄᑦ, ᐱᔪᓐᓇᕐᓂᖅᑖᖅᑎᑦᑎᕙᓪᓕᐊᕗᒍᑦ ᒪᒃᑯᒃᑐᓂᒃ, ᐱᕙᓪᓕᐊᑎᑦᑎᓪᓗᑕ ᓴᓇᔪᓕᕆᓂᒃᑯᑦ ᐱᓕᕆᐊᖃᐃᓐᓇᕈᓐᓇᕐᓂᕐᒥᒃ, ᐊᒻᒪ ᐃᒡᓗᑖᕆᐊᖃᐅᖅᑐᑦ ᐃᓄᒋᐊᖕᓂᖏᓐᓄᑦ ᐋᖅᑭᒍᑎᒃᓴᖏᓐᓂᒃ. ᐊᑕᐅᑦᑎᒃᑯᑦ, ᖃᐅᒃᐸᒧᑦ ᑲᔾᔮᕐᓇᖅᑐᓕᐊᖅᐸᓪᓕᐊᓕᖅᐳᒍᑦ, ᓄᓇᓖᑦ ᐊᑐᓂᐅᑦᑕᖅᖢᒋᑦ."
ᐲᕙᐸᓐ ᓴᓇᔪᓕᕆᔨᖏᑕ ᑎᒥᖁᑖ ᑭᒃᑯᑐᐃᓐᓇᓄᑦ ᓇᖕᒥᓂᕆᔭᐅᕗᑦ ᓴᖅᑭᑎᑕᐅᓚᐅᖅᓯᒪᓪᓗᓂ 2016−ᒥ ᐅᑯᓇᓂᑦ, ᐊᓪᓚᓄᑦ ᐊᑎᓖᑦ ᓂᓯᓴᕙᔭᓯᒃ ᑯᕇ ᓃᓴᓐ ᒪᓂᑑᐸᒥ ᓇᖕᒥᓂᕆᔭᐅᖃᑕᐅᔪᖅ ATEC−ᑯᓐᓄᑦ. ᐲᕙᐸᓐ ᑐᕌᕆᔭᖓ ᓴᖅᑭᑎᑦᑎᔪᒪᓂᐅᕗᖅ ᑲᔪᓯᐊᖏᓐᓇᕈᓐᓇᖅᑐᓂᒃ ᐃᓅᔾᔪᑕᐅᔪᓐᓇᖅᑐᓂᒃ ᓄᓇᖃᖅᑳᖅᑐᓄᑦ ᐃᓄᖕᓄᑦ ᐱᑎᑦᑎᓂᒃᑯᑦ ᐊᔪᕈᓐᓃᖅᓴᕐᓂᕐᒥᒃ, ᐃᓕᓐᓂᐊᕐᓂᕐᒥᒃ, ᐃᖅᑲᓇᐃᔭᕐᓂᕐᒥᒃ, ᓇᖕᒥᓂᕐᓗ−ᐃᖅᑲᓇᐃᔭᕐᓂᕐᒧᑦ ᐱᕕᒃᓴᐅᕙᒃᑐᓂᒃ.
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᖃᐅᔨᓇᓱᒃᐸᓪᓕᐊᖏᓐᓇᖅᐳᑦ ᖃᓄᖅ ᑐᓗᖅᑕᕈᑎᖃᙱᓐᓂᖅᓴᐅᔪᓐᓇᕐᒪᖔᑕ ᐃᒡᓗᓂᒃ ᓇᖕᒥᓂᖅᑖᕐᓂᕐᒧᑦ ᓴᖅᑭᑦᑎᓗᑎᒃ ᓄᑖᓂᒃ ᐊᒻᒪ ᒫᓐᓇᓕᓴᕐᓂᒃ ᐃᒡᓗᓂᒃ ᐊᒻᒪ ᐃᒡᓗᓂᒃ ᓇᖕᒥᓂᖅᑖᕐᓂᕐᒧᑦ ᐱᓕᕆᐊᓂᒃ. ᑐᑭᓯᒋᐊᒃᑲᓐᓂᕈᒪᒍᕕᑦ ᐊᓯᖏᓐᓂᑦ ᐱᓕᕆᐊᒃᓴᓂᑦ ᐊᑐᐃᓐᓇᐅᔪᓂᑦ, ᐅᕗᙵᐅᓗᑎᑦ ᓄᓇᕗᒻᒥᑦ ᐃᒡᓗᓕᕆᔨᕐᔪᐊᒃᑯᑦ ᐃᑭᐊᖅᑭᕕᐊᓄᑦ.
