ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
2024-04-05
ᒥᓂᔅᑕ ᑯᓱᒐᖅ ᑐᓴᖅᑎᑦᑎᕗᖅ ᐊᓯᔾᔨᖅᑐᓂᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᑦ
ᒪᓕᒐᓕᐅᖅᑎ ᖁᐊᓴ ᑯᓱᒐᖅ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᒥᓂᔅᑕ, ᑐᓴᖅᑎᑦᑎᕗᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᑦ ᐊᓯᔾᔨᖅᑐᓂᒃ.
ᒫᑦᓯ 1, 2024−ᒥ ᐱᒋᐊᖅᖢᓂ, ᑎᐅᕆᒃ ᐃᓚᐃᔭᔅ ᐃᖃᓗᒃᑑᑦᑎᐊᕐᒥᐅᑦ ᐊᒻᒪ ᐋᓂ ᐊᓐᓂᕐᒥᐅᖅ ᐃᖃᓗᖕᒥᐅᑦ ᑎᒃᑯᐊᖅᑕᐅᓚᐅᖅᐴᒃ ᑲᑎᒪᔨᐅᓂᐊᓕᖅᖢᑎᒃ, ᐊᕐᕌᒍᓄᑦ ᐱᖓᓱᓄᑦ.
"ᖁᕕᐊᓱᖃᑎᒋᕙᒃᑲ ᑎᒃᑯᐊᖅᑕᐅᓵᖅᑑᒃ ᑲᑎᒪᔨᒃᓴᒧᑦ," ᒥᓂᔅᑕ ᖁᐊᓴ ᑯᓱᒐᖅ ᐅᖃᖅᑐᖅ. "ᐃᓚᐃᔭᔅ ᓯᕗᓕᖅᑎᐅᖃᑦᑕᖅᓯᒪᔪᖅ, ᐅᑭᐅᓄᑦ 17-ᓄᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᐃᖅᑲᓇᐃᔭᖅᑎᐅᓪᓗᓂ ᒪᐃᔭᐅᓚᐅᖅᓯᒪᓪᓗᓂᓗ ᐃᖃᓗᒃᑑᑦᑎᐊᒥ. ᐋᓂ ᐊᓐᓂᕐᒥᐅᖅ ᐊᔾᔨᒌᙱᑦᑐᓂᒃ ᐃᓕᓐᓂᐊᖅᓯᒪᔪᖅ ᐊᔾᔨᒌᙱᕈᓘᔭᖅᑐᓂᓪᓗ ᐊᔪᙱᖦᖢᓂ ᐱᓕᕆᐊᒥᓂ ᖃᔅᓯᑲᓪᓚᖕᓂᒃ ᐃᓄᐃᑦ ᑲᑐᔾᔨᖃᑎᒌᓂᑦ ᒫᓐᓇᓗ ᐊᖓᔪᖅᑳᒧᑦ ᑐᒡᓕᕆᔭᐅᓪᓗᓂ ᓄᓇᓯ ᑯᐊᐳᕇᓴᒃᑯᓐᓄᑦ. ᐊᔪᙱᓐᓂᖏᑦ ᖃᐅᔨᒪᓂᖏᓪᓗ ᐊᑑᑎᖃᑦᑎᐊᕐᓂᐊᖅᑐᑦ ᖃᐅᔨᒪᔾᔪᑎᒋᓗᓂᒋᑦ ᐃᒡᓗᓕᕆᔨᕐᔪᐊᒃᑯᑦ ᐸᕐᓇᒍᑎᖏᓐᓂᒃ, ᓄᓇᕗᒻᒥ ᐃᓪᓗᓕᕆᔨᔾᔪᐊᒃᑯᓐᓂᑦ ᐊᔾᔨᒌᒥᒃ ᐊᑐᐃᓐᓇᐅᑎᑦᑎᔪᓐᓇᕐᓗᑎᒃ ᐊᑭᑐᓗᐊᖏᑦᑐᓂᒃ ᐃᓪᓗᒋᔭᐅᔪᓐᓇᖅᑐᓂᒃ ᐃᓚᒌᓄᑦ ᐃᓄᑐᐊᓄᓪᓗ."
ᔮᓐ ᐋᑉ ᐃᒃᓯᕙᐅᑕᐅᖏᓐᓇᕐᓂᐊᖅᑐᖅ, ᐲᑕ ᑖᐸᑕᐃ, ᔮᓐ ᕼᐊᓯ, ᐊᒻᒪᓗ ᐋᓚᓐ ᕋᒻᐴᑦ ᑲᑎᒪᔨᐅᖏᓐᓇᕐᓂᐊᖅᖢᑎᒃ. ᐊᕐᕕᓂᓖᑦ 7-ᖑᔪᓂᑦ ᑲᑎᒪᔨᓄᑦ ᐃᒃᓯᕙᐅᑕᑦ ᐃᓐᓄᒃᑕᐅᕗᑦ.
"ᖁᔭᓕᕙᒃᑲ ᑲᑎᒪᔨᐅᖃᑕᐅᔪᑦ ᓄᖅᑲᕐᓂᐊᓕᖅᑐᑦ ᔪᐊᔾ ᖁᓚᐅᑦ ᐃᒡᓗᓕᖕᒥᐅᑕᖅ, ᐹᑐᕆᒃ ᑕᒍᕐᓈᖅ ᑲᖏᖅᖠᓂᕐᒥᐅᑕᖅ, ᐊᒻᒪ ᐃᐊᒪ ᐸᐅᓗᓯ ᐅᖅᓱᖅᑑᕐᒥᐅᑦ ᐱᔨᑦᑎᕋᓚᐅᕐᓂᖏᓐᓄᑦ ᐊᒻᒪ ᐃᑲᔪᑦᑎᐊᓚᐅᕐᓂᖏᓐᓄᑦ ᐃᒡᓗᓕᕆᔨᕐᔪᐊᒃᑯᓐᓄᑦ," ᒥᓂᔅᑕ ᑯᓱᒐᖅ ᐅᖃᖅᐳᖅ.
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᑲᑎᒪᔨᙳᓵᖅᑐᑦ ᑲᑎᓐᓂᐊᖅᑐᑦ ᐊᐃᕆᓕ 23-ᒥᑦ 25−ᒧᑦ, 2024 ᐋᖅᑭᒃᓯᓗᑎᒃ ᐃᒃᓯᕙᐅᑕᒧᑦ ᑐᒡᓕᕆᔭᐅᓂᐊᖅᑐᒥᒃ ᓯᕗᒻᒧᐊᒃᐸᓪᓕᐊᑎᓪᓗᒋᑦ.
