ᐃᖃᓗᐃᑦ, ᓄᓇᕗᑦ— ᑭᒃᑯᓕᒫᑦ ᑲᓇᑕᒥ ᐊᑦᑕᓇᖏᑦᑐᓂᑦ ᐊᒻᒪ ᑮᓇᐅᔭᖅᑐᓗᐊᖏᑦᑐᓂ ᐊᖏᕋᖃᕆᐊᖃᖅᑐᑦ. ᓄᕙᒡᔪᐊᕐᓇᖅ-19 ᓇᓗᓇᐃᖅᓯᓯᒪᔪᖅ ᑮᓇᐅᔭᖅᑐᓗᐊᖏᑦᑐᓂᑦ ᐃᓪᓗᖃᖅᑎᑦᑎᓂᕐᒧᑦ ᐱᓪᓗᐊᑕᕆᔭᖓ ᑲᓇᑕᒥ ᐅᑎᕐᓂᖓᓄᑦ, ᐱᖃᓯᐅᑎᓪᓗᓂ ᓄᓇᕗᑦ.

ᐅᓪᓗᒥ, ᒪᓕᒐᓕᐅᕐᑎᖅᔪᐊᖅ ᐊᒫᑦ ᕼᐅᓯᐊᓐ, ᒥᓂᔅᑕ ᐃᓪᓗᓂᕆᓂᕐᒧᑦ ᐊᒻᒪ ᐊᔾᔨᒌᖏᑦᑐᓄᑦ ᐊᒻᒪ ᐱᖃᓯᐅᔾᔨᓂᕐᒧᑦ, ᐃᓚᒋᓪᓗᒋᑦ ᒪᓕᒐᓕᐅᕐᑎᖅᔪᐊᖅ ᑖᓐᓂᐅᓪ ᕚᓐᑐᓪ, ᒥᓂᔅᑕ ᐅᑭᐅᑕᖅᑐᓕᕆᓂᕐᒧᑦ ᐊᒻᒪ ᒪᓕᒐᓕᐅᕐᑎᖅᔪᐊᖅ ᓴᐃᓐᑦ ᐹᓂᕙᔅᒧᑦ −− ᓴᐃᓐᑦ ᕙᐃᑐ, ᐊᒻᒪ ᒪᓕᒐᓕᐅᖅᑎ ᓗᐊᓐ ᑯᓱᒐᖅ ᑲᒪᒋᔭᖃᖅᑐᖅ, ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ, ᑐᓴᖅᑎᑦᑎᓚᐅᖅᑐᑦ ᒐᕙᒪᑐᖃᒃᑯᓐᓄᑦ ᐱᓕᕆᑎᑕᐅᔪᑦ ᖃᓂᒋᔭᖏᓐᓂ $45 ᒥᓕᐊᓐ ᐃᑲᔪᕐᓗᑎ ᓴᓇᔭᐅᓂᖏᓐᓄᑦ 101 ᐊᖏᕋᕆᔭᐅᔪᓂᑦ ᓄᓇᕗᒻᒥ ᐱᓕᕆᐊᑎᒍᑦ ᓱᑲᑦᑐᒥ ᐃᓪᓗᖃᖅᑎᑦᑎᓂᕐᒧᑦ ᐱᓕᕆᐊᖅ (RHI).

ᑖᓐᓇ ᐊᖏᓂᖓ ᐱᕈᖅᑎᑦᑎᔪᖅ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᑐᓂᓯᓂᖏᓐᓄᑦ $30 ᒥᓕᐊᓐ, ᑲᑎᓕᒫᖅᑐᒋᑦ ᖃᓂᒋᔭᐸᓗᐊᓂ $75 ᒥᓕᐊᓐ ᑐᕌᖅᑐᑦ ᑎᓴᒪᐅᔪᖏᒑᖅᑐᑦ ᐱᓕᕆᐊᓄᑦ.

ᐱᓕᕆᐊᑦ ᐅᕙᓃᑦᑐᑦ ᔫᒥ ᓄᓇᖓ ᐊᒻᒪ ᓂᐊᖁᖕᖒᓯᐊᕆᐊᖅ ᖁᑦᓯᓂᕐᓴᖅ, ᓴᓂᕋᔭᒃ, ᑭᒻᒥᕈᑦ, ᓇᐅᔮᑦ, ᑰᒑᕐᔪᒃ ᐊᒻᒪ ᒥᑦᑎᒪᑕᓕᒃ. ᐃᓪᓗᖃᖅᑎᑦᑎᓂᐅᔪᖅ ᐱᔨᑦᑎᓂᐊᖅᑐᖅ ᐃᓄᓐᓂᑦ, 50 ᐳᓴᓐᑎᖏᑦ ᐊᖏᕋᖃᕐᕕᐅᔪᑦ ᑐᕌᖓᔪᑦ ᐊᕐᓇᓄᑦ ᐊᒻᒪ ᕿᑐᖓᖏᓐᓄᑦ. ᓄᑖᑦ ᐱᓕᕆᑎᑕᐅᔪᑦ ᐊᑖᓂ ᓱᑲᑦᑐᒥ ᐃᓪᓗᖃᖅᑎᑦᑎᓂᕐᒧᑦ ᐱᓕᕆᐊᖅ ᓴᖅᑮᓂᐊᖅᑐᖅ ᑕᐅᔭᖏᓐᓃᑦᑐᓂᑦ ᐃᖅᑲᓇᐃᔮᓂᑦ ᐃᓪᓗᓕᕆᓂᕐᒥᑦ ᐊᒻᒪ ᓴᓇᔭᐅᓂᖏᓐᓄᑦ, ᐱᕈᖅᑎᓪᓗᒋᑦ ᑮᓇᐅᔭᔅᓴᓂᖃᕐᓂᖅᓴᐅᔪᑦ ᐃᓚᒌᑦ ᐊᒻᒪ ᐱᕈᖅᑎᑦᑎᓗᑎ ᓄᓇᓕᓐᓂ ᓴᖏᓂᖅᓴᓂᑦ, ᐅᕙᑦᑎᓐᓂ ᖃᓪᓕᑎᑦᑎᑲᓐᓂᓂᖅᓴᓗᓂ ᐅᕙᒍᑦ ᑐᕌᒐᖓᓂ ᐱᑕᖃᕈᓐᓃᖅᑎᑕᐅᓂᖓ ᐊᖏᕋᖃᖏᓐᓂᖅ ᑲᓇᑕᒥ.

ᓴᓇᔭᐅᓂᖏᑦ ᐊᒥᓱᓂᑦ ᐱᓕᕆᐊᑦ ᐱᓕᕆᔭᐅᕙᓪᓕᐊᓕᕇᖅᑐᑦ, ᐊᒥᓱᒐᓚᐃᑦ ᐱᔭᕇᖅᓯᒪᔪᑦ ᐊᒻᒪ ᓇᔪᖅᑕᐅᓕᖅᑐᑦ.

ᐅᖃᖅᑕᐅᓯᒪᔪᑦ:

“ᐱᓕᕆᖃᑎᒌᓐᓂᐅᔪᑦ ᐱᒻᒪᕆᐅᖏᓐᓇᖅᑐᑦ ᒐᕙᒪᑦᑎᓐᓄᑦ ᓴᓂᐊᓂ ᓄᓇᖃᖅᑳᖅᓯᒪᔪᑦ ᐃᓄᖏᓐᓄᑦ. ᑕᐃᒪᐃᓐᓂᖓᓄᑦ ᑲᔪᖏᖅᓯᒪᔪᒍᑦ ᐃᑲᔪᓂᕐᒧᑦ ᐱᐅᓂᖅᓴᒥᑦ ᐃᓪᓗᓕᓄᕆᓂᒧᑦ ᖃᓄᐃᓐᓂᕆᔭᖏᓐᓂ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ ᓱᑲᑦᑐᒥ ᓴᖅᑭᑎᑦᑎᓪᓗᑎ ᐊᑦᑕᓇᖏᑦᑐᓂᑦ ᐊᒻᒪ ᑮᓇᐅᔭᖅᑐᓗᐊᖏᑦᑐᓂ ᐊᖏᕋᕆᔭᐅᔪᓂᑦ ᑲᓇᑕᓕᒫᒥᑦ ᑕᐃᒃᑯᓄᖓ ᐃᓪᓗᑖᕆᐊᖃᖅᑐᓄᑦ. ᑕᐃᒪᐃᓐᓂᖓᓄᑦ ᐅᓪᓗᒥ, ᑲᑐᑎᖃᑎᒋᓗᒋᑦ ᐱᓕᕆᖃᑎᕗᑦ, ᑲᔪᓯᑎᑦᑎᓂᖃᖅᑐᒍᑦ ᐊᒥᓲᓂᖅᓴᓂᑦ ᐃᓪᓗᖃᖅᑎᑦᑎᓂᕐᒧᑦ ᓇᓖᕌᕋᔅᓴᓂᑦ ᓄᓇᖃᖅᑳᖅᓯᒪᔪᓄᑦ ᓄᓇᓕᖏᓐᓄᑦ ᓄᓇᕗᒻᒥ.ᑲᓇᑕᓕᒫᒥᑦ. ᑕᒪᓐᓇ ᐃᓚᒋᔭᖓ ᒐᕙᒪᑦᑕ ᑲᓇᑕᒥ ᐃᓪᓗᓕᕆᓂᕐᒧᑦ ᐸᕐᓇᐅᒻᒥᑦ ᑭᓇᑐᐃᓐᓇᕐᒥ ᐃᓚᒋᔭᐅᔪᐃᓐᓇᐅᑎᓪᓗᒋᑦ –ᒪᓕᒐᓕᐅᕐᑎᖅᔪᐊᖅ ᐊᒫᑦ ᕼᐅᓯᐊᓐ, ᒥᓂᔅᑕ ᐃᓪᓗᓂᕆᓂᕐᒧᑦ ᐊᒻᒪ ᐊᔾᔨᒌᖏᑦᑐᓄᑦ ᐊᒻᒪ ᐱᖃᓯᐅᔾᔨᓂᕐᒧᑦ

“ᓄᓇᕗᒻᒥᐅᑦ ᐱᔭᕆᐊᖃᖅᑐᑦ ᐱᐅᔪᓂᑦ, ᐊᑦᑕᓇᖏᑦᑐᓂ ᐃᓪᓗᖃᖅᑎᑕᐅᓂᕐᒧᑦ ᐱᓕᕆᔭᐅᓪᓗᑎᑦ 101 ᑮᓇᐅᔭᖅᑐᓗᐊᖏᑦᑐᓂᑦ ᐊᖏᕋᕆᔭᐅᔪᓂᑦ ᓄᓇᓕᓐᓂᑦ ᓄᓇᕗᒻᒥ ᒐᕙᒪᕗᑦ ᐃᖅᑲᓇᐃᔭᕐᓂᖃᖅᑐᑦ ᐱᓕᕆᖃᑎᖏᓐᓂ ᐱᕈᖅᑎᑦᑎᓗᑎ ᓄᓇᓕᒻᒥ ᑮᓇᐅᔭᓕᕆᓂᕐᒥᑦ ᐊᒻᒪ ᐱᐅᓯᑎᒋᐊᕐᓗᒋᑦ ᐱᐅᓂᖓ ᐃᓅᓯᕐᒧᑦ ᐅᑭᐅᑕᖅᑐᒥᐊᑕᓄᑦ ᐊᒻᒪ ᐅᑭᐅᑕᖅᑐᒥ. ᒐᕙᒪᕗᑦ ᐱᓕᕆᐊᖃᐃᓐᓇᖅᑐᑦ ᐃᓪᓗᑭᔅᓴᓂᕐᒥᑦ ᐅᑭᐅᑕᖅᑐᒥᑦ ᐊᒻᒪ ᐃᖅᑲᓇᐃᔭᖅᑐᒍᑦ ᖃᐅᑕᒫᑦ ᐱᐅᓯᑎᒋᐊᖅᑐᒋᑦ ᑮᓇᐅᔭᓕᕆᓂᖅ ᐊᒻᒪ ᐃᓅᖃᑎᒌᓐᓂᕐᒧᑦ ᖃᓄᐃᖏᑎᐊᓂᕐᒧᑦ ᑲᓇᑕᒥᐅᑕᓂᑦ ᑖᓐᓇ ᑲᓇᑕᒥ ᐃᓪᓗᓕᕆᓂᕐᒧᑦ ᐸᕐᓇᐅᑦ ᐃᖅᑲᓇᐃᔮᕆᔭᖓ.” –ᒪᓕᒐᓕᐅᕐᑎᖅᔪᐊᖅ ᑖᓐᓂᐅᓪ ᕚᓐᑐᓪ, ᒥᓂᔅᑕ ᐅᑭᐅᑕᖅᑐᓕᕆᓂᕐᒧᑦ ᐊᒻᒪ ᒪᓕᒐᓕᐅᕐᑎᖅᔪᐊᖅ ᓴᐃᓐᑦ ᐹᓂᕙᔅᒧᑦ - ᓴᐃᓐᑦ ᕙᐃᑐ

“ᑖᓐᓇ ᑕᑯᓐᓇᖅᑕᕗᑦ ᐃᓕᓴᖅᓯᓂᕐᒧᑦ ᐃᓱᒪᓕᐅᓂᕐᒧᑦ ᐅᖃᖃᑎᒌᓐᓂᒃᑯᑦ ᐊᒻᒪ ᐊᖏᖃᑎᒌᓐᓂᒃᑯᑦ − ᐋᔩᖃᑎᒌᓐᓂᖅ – ᐅᕙᑦᑎᓂ ᐊᒻᒪ ᒐᕙᒪᑐᖃᒃᑯᓄᑦ ᐱᓕᕆᖃᑎᕗᑦ. ᓴᓇᔭᐅᓂᖏᓐᓄᑦ ᐊᑭᖏᑦ ᓇᓗᓇᖅᓯᕙᓪᓕᐊᓂᖅᓴᐅᑎᓪᓗᒍ, ᕿᓕᒃᑲᓐᓂᕋᓱᐊᕐᓂᖅ ᑮᓇᐅᔭᖃᖅᑎᑕᐅᓂᕐᒧᑦ ᐱᒻᒪᕆᐅᖏᓐᓇᓕᖃᑦᑕᖅᑐᖅ. ᖁᔭᓐᓇᒦᖅᑕᕗᑦ ᐱᓕᕆᖃᑎᕗᑦ ᒐᕙᒪᑐᖃᒃᑯᓐᓂᑦ ᐊᒻᒪ ᑖᓐᓇ ᑮᓇᐅᔭᖃᖅᑎᑦᑎᓂᐅᔪᖅ ᓇᓗᓇᐃᖅᓯᖁᓇᖅᑐᖅ ᑲᔪᓰᓐᓇᖅᑐᑦ ᑲᔪᖏᖅᓯᒪᓂᖏᑦ ᐱᐅᓯᑎᒋᐊᖅᑕᐅᓂᖏᓐᓄᑦ ᐃᓪᓗᖃᖅᑎᑦᑎᓂᕐᒧᑦ ᓄᓇᕗᒻᒥᐅᓄᑦ. ” – ᒪᓕᒐᓕᐅᖅᑎ ᓗᐊᕐᓐ ᑯᓱᒐᖅ, ᒪᓕᒐᓕᐅᖅᑎ ᑎᒍᒥᐊᖅᑐᖅ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓂᒃ

ᓇᓗᓇᐃᖅᓯᒍᑏᑦ:

• ᓱᑲᑦᑐᓂᒥᑦ ᐃᓪᓗᖃᖅᑎᑦᑎᓂᕐᒧᑦ ᐱᓕᕆᐊᖅ (RHI) $2.5 ᐱᓕᐊᓐ ᐱᓕᕆᐊᖅ ᐊᑖᓂ NHS ᐃᑲᔪᕐᓗᑎ ᐱᓕᕆᐊᖃᕐᓗᑎ ᑐᐊᕕᕐᓇᖅᑐᓂᑦ ᐃᓪᓗᖃᖅᑎᑦᑎᓂᕐᒧᑦ ᐊᑦᑕᓇᖅᑐᒦᑦᑐᓄᑦ ᑲᓇᑕᒥᐅᑕᓄᑦ ᐱᓗᐊᓐᑐᒥ ᓄᕙᒡᔪᐊᕐᓇᖅ-19, ᓴᑲᑦᑐᒃᑯᑦ ᓴᓇᔭᐅᓂᖏᓐᓄᑦ ᑮᓇᐅᔭᖅᑐᓗᐊᖏᑦᑐᓂᑦ ᐃᓪᓗᖃᖅᑎᑦᑎᓂᕐᒧᑦ. • RHI ᐱᓯᒪᔪᑦ ᐊᒥᓱᓂᑦ ᐱᔪᒪᓂᖃᖅᑐᓂᑦ ᓄᓇᖃᖅᑳᖅᓯᒪᔪᓂᑦ ᑎᒥᐅᔪᓂᑦ, ᓴᖅᑭᑎᑦᑎᓚᐅᖅᑐᑦ ᐅᖓᑖᓂ 40 ᐳᓴᓐᑎᒥ ᐊᖏᕋᕆᔭᐅᔪᓕᒫᓄᑦ ᓴᖅᑭᖅᑎᑕᐅᔪᑦ ᐊᑖᓂ ᐱᓕᕆᐊᒥᑦ ᑐᕌᖓᑎᑕᐅᓂᐊᖅᑐᑦ ᓄᓇᖃᖅᑳᖅᓯᒪᔪᓄᑦ ᐃᓄᖏᓐᓄᑦ. • ᐊᖏᕋᕆᔭᐅᔪᑦ ᓴᓇᔭᐅᓂᐊᖅᓯᒪᔪᑦ ᐃᓗᐊᓂ 12 ᑕᖅᑭᓂᑦ ᑮᓇᐅᔭᖃᖅᑎᑕᐅᓕᕈᓂ ᐱᓕᕆᐊᒧᑦ ᑐᔅᓯᕋᐅᑎᓕᐅᖅᑐᓄᑦ (ᐃᓚᖏᑦ ᐱᔪᓐᓇᖅᑎᑕᐅᓪᓗᑎ, ᐊᖏᕋᕆᔭᐅᔪᑦ ᐅᑭᐅᑕᖅᑐᒥ ᐊᒻᒪ ᓄᓇᓕᒻᒨᕋᔅᓴᐅᓂᖓᓄ ᓴᓇᔭᐅᓂᐊᖅᓯᒪᔪᑦ ᐃᓗᐊᓂ 18 ᑕᖅᑭᓂᑦ. • ᖃᓂᒋᔭᐸᓗᖓᓂ 33 ᐳᓴᓐᑎᑦ ᓱᑲᑦᑐᒥ ᐃᓪᓗᖃᖅᑎᑦᑎᓂᕐᒧᑦ ᐱᓕᕆᐊᖅ ᑮᓇᐅᔭᖃᖅᑎᑕᐅᓂᖅ ᐊᑖᓂ ᒪᕐᕈᐊᖅᑎᓕᖅᑐᒥ ᑐᕌᖓᓂᐊᖅᑐᑦ ᐊᕐᓇᓄᑦ−ᑐᕌᖓᔪᑦ ᐃᓪᓗᖃᖅᑎᑦᑎᓂᕐᒧᑦ ᐱᓕᕆᐊᑦ ᐊᖏᕋᕆᔭᐅᔪᑦ ᓴᓇᔭᐅᓗᑎ ᐃᓗᐊᓂ 12 ᑕᖅᑭᓂᑦ ᑮᓇᐅᔭᖃᖅᑎᑕᐅᓕᕈᓂ ᐱᓕᕆᐊᒧᑦ ᑐᔅᓯᕋᐅᑎᓕᐅᖅᑐᓄᑦ. • RHI ᐃᓄᓐᓄᑦ ᐱᔪᓐᓇᐅᑎᓂᑦ ᑐᓐᖓᕕᖃᖃᑦᑕᖅᑐᑦ ᐃᓪᓗᓕᕆᓂᕐᒧᑦ, ᐱᔨᑦᑎᖅᑐᒋᑦ ᐃᓄᐃᑦ ᐊᑐᕐᓂᖃᖅᑐᑦ ᐅᕝᕙᓘᓐᓃᑦ ᐊᑦᑕᓇᖅᑐᒦᑦᑐᑦ ᐊᖏᖃᕋᖃᖏᓐᓂᕐᒧᑦ ᐊᒻᒪ ᐊᓯᖏᑦ ᐃᓚᒋᔭᐅᔪᑦ ᐊᑦᑕᓇᕐᓂᖅᐹᖑᔪᓂᑦ, ᐱᖃᓯᐅᑎᓪᓗᑎ ᐊᕐᓇᐃᑦ ᐊᒻᒪ ᓱᕈᓰᑦ ᕿᒫᔪᑦ ᐊᖏᕋᒥ ᐋᓐᓂᖅᑎᕆᓂᕐᒥᑦ, ᐃᓐᓇᑐᖃᐃᑦ, ᒪᒃᑯᑦᑐᑦ ᐃᓐᓇᐃᑦ, ᐊᒻᒪ ᐃᓄᐃᑦ ᑎᒥᒥᒍᑦ ᐊᔪᕈᑎᓖᑦ, ᐃᓄᐃᑦ ᐃᓱᒪᔮᕐᓂᖃᖃᑦᑕᖅᑐᑦ ᐊᒻᒪ ᐊᔪᓕᕈᑎᖃᖅᓯᒪᔪᓄᑦ ᐃᓱᒫᓘᑕᐅᔪᑦ, ᐅᓇᑕᖅᑎᑐᖃᐃᑦ, LGBTQ2+, ᐃᓚᐃᓐᓈᖅᑕᐅᔪᑦ ᐅᕕᓂᐅᖃᑎᒋᖏᑕᖓᓄᑦ, ᐳᐊᑎᑮᑦ ᑲᓇᑕᒥᐅᑕᐃᑦ, ᐊᒻᒪ ᑲᓇᑕᒨᕋᑖᖅᓯᒪᔪᑦ ᐅᕝᕙᓘᓐᓃᑦ ᕿᒫᓯᒪᔪᑦ. • ᑲᓇᑕᐅᑉ ᑲᓇᑕᒥ ᐃᓪᓗᓕᕆᓂᕐᒧᑦ ᐸᕐᓇᐅᑦ (NHS) 10-ᐊᕐᕌᒍᓄᑦ, $72 ᐱᓕᐊᓐ ᐸᕐᓇᐅᑦ ᐊᒥᓲᓂᖅᓴᓂᑦ ᑲᓇᑕᒥᐅᑕᓂᑦ ᐊᖏᕋᖃᕈᓐᓇᑎᑦᑎᓂᐊᖅᑐᑦ. • ᓴᖅᑭᖅᑎᑕᐅᔪᖅ 2000−ᒥ ᓄᓇᕗᒻᒥ ᒪᓕᒐᓕᐅᕐᕕᑎᒍᑦ ᓄᓇᑦᓯᐊᒥ ᐃᓪᓗᓕᕆᔨᒃᑯᑦ ᑯᐊᐳᕇᓴᓐ ᐱᖁᔭᖅ (ᓄᓇᕗᑦ), ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᑐᕌᒐᖓ ᐃᓄᓐᓄᑦ ᑎᒥᐅᓪᓗᓂ ᓄᓇᕗᑦ ᒐᕙᒪᒃᑯᓐᓄᑦ (GN) ᓴᖅᑭᑎᑦᑎᓗᑎ, ᐊᐅᓚᑦᑎᓗᑎ ᐊᒻᒪ ᐊᐅᓚᑦᑎᔨᐅᓗᑎ ᐃᓪᓗᓕᕆᓂᕐᒧᑦ ᐱᖠᕆᐊᒥᓂᑦ ᐱᑕᖃᖅᑎᑦᑎᔪᓐᓇᓂᐊᕐᖓᑕ ᓈᒻᒪᓂᖅᓴᓂᑦ ᐱᔭᔅᓴᐅᓂᖏᓐᓄᑦ ᐊᔾᔨᒌᖏᑦᑐᑦ ᑮᓇᐅᔭᖅᑐᓗᐊᖏᑦᑐᓂ ᐊᖏᕋᖃᖅᑎᑦᑎᓂᕐᒧᑦ ᓇᓖᕌᕋᔅᓴᓂᑦ ᐃᓚᒌᓄᑦ ᐊᒻᒪ ᐊᑕᐅᓯᒡᒍᑎᓄᑦ ᐃᓄᓐᓄᑦ ᓄᓇᕗᒻᒥ.