ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
2023-07-28
ᒥᓂᔅᑕ ᑯᓱᒐᖅ ᑐᓴᖅᑎᑦᑎᕗᖅ ᐊᓯᔾᔨᖅᑕᐅᔪᓂᒃ ᐃᖃᓗᖕᓂ ᐃᒡᓗᓕᕆᔨᒃᑯᑦ ᑲᑎᒪᔨᖏᓐᓂᑦ
ᐃᖃᓗᐃᑦ, ᓄᓇᕗᑦ (ᔪᓚᐃ 28, 2023) – ᒪᓕᒐᓕᐅᖅᑎ ᖁᐊᓴ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂᑦ , ᑐᓴᖅᑎᑦᑎᖅᑲᐅᕗᖅ ᐊᓯᔾᔨᖅᑐᓂᑦ ᐃᖃᓗᐃᑦ ᐃᒡᓗᓕᕆᔨᒃᑯᖏᑦᑕ (IHA) ᑲᑎᒪᔨᖏᓐᓄᑦ, ᐅᓪᓗᒥ ᐱᒋᐊᕐᓗᓂ.
ᐊᕐᕕᓂᓖᑦ ᑲᑎᒪᔩᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂᑦ ᑎᒃᑯᐊᖅᑕᐅᓚᐅᖅᑐᑦ ᐃᖃᓗᖕᓂ ᐃᒡᓗᓕᕆᔨᒃᑯᑦ ᑲᑎᒪᔨᖏᓐᓄᑦ. ᑕᒪᓐᓇ ᐊᑐᖅᑕᐅᓚᐅᑲᑐᐃᓐᓇᖅᐳᖅ ᑲᒪᒋᔭᖃᕈᑕᐅᓇᓱᐊᕐᓗᓂ ᑲᔪᓰᓐᓇᖅᑐᒥᒃ ᐃᖅᑲᓇᐃᔭᕐᓂᕐᒧᑦ ᐊᑲᐅᙱᓕᐅᕈᑎᒋᔭᐅᔪᒥᒃ.
"ᓄᑖᑦ ᑲᑎᒪᔩᑦ ᑐᕌᒐᖃᑲᐅᑎᒋᓂᐊᖅᑐᑦ ᐅᑎᕐᓗᑎᒃ ᐋᔩᖃᑎᒌᖕᓂᕐᒧᑦ ᐊᖏᖃᑎᒌᒐᓱᐊᕐᓗᑎᒃ ᐃᖃᓗᖕᓂ ᐃᒡᓗᓕᕆᔨᒃᑯᑦ ᐃᖅᑲᓇᐃᔭᖅᑎᓄᑦ ᐊᑲᐅᙱᓕᐅᕈᑎᓄᑦ," ᐅᖃᖅᑐᖅ ᒥᓂᔅᑕ ᑯᓱᒐᖅ. "ᐊᐱᕆᓯᒪᕙᒃᑲ ᓄᑖᑦ ᑲᑎᒪᔩᑦ ᓇᓗᓇᐃᖁᓪᓗᒋᑦ, ᐅᓪᓗᐃᑦ 90 ᐃᓗᐊᓂ, ᐋᖅᑭᑦᑎᐊᖅᓯᓗᑎᒃ ᐊᐅᓚᓂᕆᔭᐅᔪᓂᒃ ᐃᖃᓗᖕᓂ ᐃᒡᓗᓕᕆᔨᒃᑯᓐᓂ ᑕᐃᑲᙵᓗ ᕿᓂᕐᓗᑎᒃ ᓄᑖᓂᒃ ᑲᑎᒪᔨᒃᓴᓂᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐃᖅᑲᓇᐃᔭᖅᑎᒋᙱᑕᖏᓐᓂᒃ. "
ᒫᓐᓇ ᐱᓕᕆᖃᑎᒌᒍᓯᑦ ᐊᒻᒪ ᐊᖏᖃᑎᒌᒍᑏᑦ IHA−ᑯᓐᓄᑦ ᐊᒻᒪ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᐊᓯᔾᔨᔾᔮᙱᑦᑐᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐃᖅᑲᓇᐃᔭᖅᑎᖏᑦ ᐅᓄᕐᓂᖅᓴᐅᓪᓗᑎᒃ IHA−ᑯᑦ ᑲᑎᒪᔨᖏᓐᓄᑦ.
ᓄᑖᑦ ᑎᒃᑯᐊᖅᑕᐅᔪᑦ ᑲᑎᒪᔩᑦ ᐅᑯᐊᖑᕗᑦ: • ᐃᐅᕆᓐ ᑎᕕᕉ, ᐃᒃᓯᕙᐅᑕᖅ. • ᔪᐊᓐ ᐸᓪᓗᖅ, ᐃᒃᓯᕙᐅᑕᐅᑉ ᑐᒡᓕᐊ. • ᐃᑦᑐᖅ ᒍᕉᕝᔅ. • ᔮᔅᒥᓐ ᐴᑭᓐᔅ. • ᔨᒥ ᒪᐃᓐ. • ᑖᓂᐅ ᐱᓄᓕᐊᕐ.
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐱᖃᑕᐅᓯᒪᓐᖏᓚᑦ, ᐅᕝᕙᓘᓐᓃᑦ ᐃᓚᐅᖃᑕᐅᓯᒪᙱᓚᑦ, ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒐᓱᓐᓂᕐᒧᑦ ᐅᓪᓗᒥᒧᑦ. ᐊᑯᓂᐅᑎᒋᓂᖓ ᐱᓪᓗᒍ ᐃᖅᑲᓇᐃᔭᕐᓂᕐᒧᑦ ᐊᑲᐅᙱᓪᓕᐅᕈᑎᐅᑉ ᐱᕙᓪᓕᐊᓂᖃᑦᑎᐊᖏᓐᓂᖓᓄᓪᓗ, ᐃᓚᒋᔭᐅᓂᖅᓴᐅᒋᐊᖃᖅᑐᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᓇᓗᓇᐃᖅᓯᓂᕐᒥᑦ ᑲᔪᓯᓂᖃᑦᑎᐊᖅᑐᒥᑦ ᐃᖏᕐᕋᑎᑦᑎᓂᕐᒥᑦ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓄᑦ ᐱᓕᕆᐊᓂᑦ.
"ᖁᔭᓕᔪᒪᕙᒃᑲ ᑲᑎᒪᔨᐅᖏᓐᓇᖅᑐᑦ ᐱᓕᕆᑦᑎᐊᖅᓯᒪᓂᖏᓐᓄᑦ ᐱᔨᑦᑎᕋᑦᑎᐊᖕᓂᖏᓐᓄᓪᓗ," ᐅᖃᖅᑐᖅ ᒥᓂᔅᑕ ᑯᓱᒐᖅ. "ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐃᓕᑕᖅᓯᐅᒪᖕᒪᑕ ᐊᔪᕐᓇᕈᑎᖏᓐᓂᒃ ᐊᒻᒪ ᐊᒃᓱᕈᕐᓇᕐᓂᖏᓐᓂᒃ ᑕᖅᑭᐅᓵᖅᑐᓂᒃ ᐃᖅᑲᓇᐃᔭᖅᑎᓄᑦ ᓈᒻᒪᙱᓪᓕᐅᕈᑎᑦ ᐱᔾᔪᑎᒋᓪᓗᒋᑦ ᐃᖃᓗᖕᓂ ᐃᒡᓗᓕᕆᔨᒃᑯᓐᓂ ᐊᒻᒪ ᓄᓇᕗᒻᒥ ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᓄᑦ, ᐊᒃᑐᐃᔾᔪᑕᐅᖃᑦᑕᖅᓯᒪᓪᓗᓂᓗ ᐃᓄᖕᓄᑦ ᐃᓚᓕᐅᔾᔭᐅᓪᓗᑎᒃ ᐃᖅᑲᓇᐃᔭᖅᑎᑦ, ᐊᐅᓚᑦᑎᔨᑦ, ᑲᑎᒪᔩᑦ ᐊᒻᒪ ᐃᒡᓗᒥᒃ ᐊᑐᖅᑐᐊᖅᑎᑦ. ᓂᕆᐅᒃᐳᒍᑦ ᐋᖅᑭᒃᓯᓂᐊᕐᓂᕐᒥᒃ ᑖᔅᓱᒥᖓ ᐃᖅᑲᓇᐃᔭᖅᑎᓄᑦ ᐊᑲᐅᙱᓕᐅᕈᑎᒥᒃ ᕿᓚᒻᒥᐅᓂᖅᐹᒃᑯᑦ."
