ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
2024-06-18
ᒥᓂᔅᑕ ᑯᓱᒐᖅ ᑐᓴᖅᑎᑦᑎᕗᖅ ᐊᓯᔾᔨᖅᑕᐅᔪᓂᒃ ᐃᖃᓗᖕᓂ ᐃᒡᓗᓕᕆᔨᒃᑯᑦ ᑲᑎᒪᔨᖏᓐᓂᑦ
ᐅᓪᓗᒥ ᒪᓕᒐᓕᐅᖅᑎ ᖁᐊᓴ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂᑦ , ᑐᓴᖅᑎᑦᑎᖅᑲᐅᕗᖅ ᐊᓯᔾᔨᖅᑐᓂᑦ ᐃᖃᓗᐃᑦ ᐃᒡᓗᓕᕆᔨᒃᑯᖏᑦᑕ (IHA) ᑲᑎᒪᔨᖏᓐᓄᑦ.
"ᐊᓕᐊᓇᐃᒍᓱᒃᐳᖓ ᑐᙵᓱᒃᑎᑦᑐᒪᓪᓗᒋᑦ ᓄᑖᑦ ᑲᑎᒪᔩᑦ ᐱᓕᕆᐊᒃᓴᖏᓐᓄᑦ ᖁᓱᙱᖦᖢᑕᓗ ᓄᑖᓂᒃ ᑕᐅᑐᖅᑰᖅᑕᐅᔪᓂᒃ ᐊᔾᔨᒌᙱᑦᑐᓂᒃ ᐊᔪᙱᓐᓂᖏᓐᓂᒃ ᐊᒻᒪ ᐱᓕᕆᖃᑦᑕᖅᓯᒪᔭᖏᓐᓂᒃ ᐊᑐᐃᓐᓇᐅᑎᑦᑎᓂᐊᕐᓂᖏᓐᓂᒃ ᐃᒡᓗᓕᕆᓂᕐᒧᑦ ᐱᓕᕆᐊᓂᒃ ᐃᖃᓗᖕᓂ", ᒥᓂᔅᑕ ᑯᓱᒐᖅ ᐅᖃᖅᑐᖅ. "ᖁᔭᓐᓇᒦᕈᒪᖕᒥᔭᒃᑲ ᑲᑎᒪᔨᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᐃᑲᔫᑎᖃᑦᑎᐊᓚᐅᕐᒪᑕ ᐋᔩᖃᑎᒌᒃᑎᓪᓗᒋᑦ. ᑖᒃᑯᐊ ᐅᖃᖃᑎᒌᖕᓂᐅᔪᑦ ᐱᒻᒪᕆᐅᔪᒥᑦ ᐱᓕᕆᐊᖃᓚᐅᖅᑐᑦ ᐊᐅᓚᑦᑎᓪᓗᑎᒃ ᐱᕙᓪᓕᐊᓂᐅᔪᒥᑦ ᐊᖏᖅᑕᐅᓂᕐᒧᑦ ᓄᑖᒧᑦ ᐃᓚᐅᖃᑕᐅᔪᓕᒫᓄᑦ ᐊᖏᖃᑎᒌᒍᑎᒥᑦ".
ᖃᖓᑦᑎᐊᖅ ᑎᒃᑯᐊᖅᑕᐅᓚᐅᖅᑐᑦ ᑲᑎᒪᔩᑦ ᐃᓱᒪᖕᒪᑕ ᐱᓕᕆᐊᖑᖃᑦᑕᓵᓚᐅᖅᑐᓂᒃ ᑲᑎᒪᔨᐅᓚᐅᑲᒃᑐᓄᑦ ᓴᖅᑭᑕᐅᓚᐅᖅᓯᒪᔪᓄᑦ 2023−ᒥ ᐊᐅᔭᒃᑯᑦ ᓴᖅᑭᔾᔪᑎᒃᓴᓂᒃ ᐃᖅᑲᓇᐃᔭᖅᑎᓄᑦ ᓈᒻᒪᙱᓪᓕᐅᕈᑕᐅᖏᓐᓇᖅᑐᓄᑦ ᐃᖃᓗᖕᓂ ᐃᒡᓗᓕᕆᔨᒃᑯᓐᓄᑦ ᐊᒻᒪ ᓄᓇᕗᒻᒥ ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᓄᑦ. ᐊᐅᓚᑕᑦ ᐋᖅᑭᐅᒪᑦᑎᐊᖅᑎᓪᓗᒋᑦ ᐊᑲᐅᙱᓕᐅᕈᑕᐅᔪᕐᓗ ᐋᖅᑭᒃᑕᐅᓪᓗᓂ, ᐃᖃᓗᖕᓂ ᐃᒡᓗᓕᕆᔨᒃᑯᑦ (IHA) ᒫᓐᓇ ᐅᑎᕐᐸᓪᓕᐊᓕᖕᒪᑕ ᑎᒃᑯᐊᖅᑕᐅᓯᒪᔪᓄᑦ ᑲᑎᒪᔨᓄᑦ ᐋᖅᑭᒃᓯᒪᔪᒧᑦ.
ᒪᐃ 1-ᒥ ᐱᒋᐊᖅᖢᓂ, ᑎᒃᑯᐊᖅᑕᐅᓵᓚᐅᖅᑐᑦ ᐃᖃᓗᖕᓂᑦ ᐃᒡᓗᓕᕆᔨᒃᑯᑦ ᑲᑎᒪᔨᖏᑦ ᐅᑯᐊᖑᕗᑦ ᔫᑎ ᑑᑐᓪ ᐊᕙ (ᐃᒃᓯᕙᐅᑕᐅᑉ ᑐᒡᓕᐊ), ᑳᑎ ᕼᐋᓐᓴᓐ (ᐃᒃᓯᕙᐅᑕᐅᑉ ᑐᒡᓕᖓ), ᑯᕆᔅᑕ ᑯᓄᒃ, ᓇᔭᓴ ᑲᒧᕋ, ᔮᑯᑉ ᒑᕐᐹᓯᒃ, ᒪᓄ ᑯᓄᒃ, ᐊᒻᒪ ᓯᐅᕆ ᕌᐳᑦᓴᓐ.
