ᐃᖃᓗᐃᑦ, ᓄᓇᕗᑦ (ᓄᕕᐱᕆ 8, 2024) - ᓄᓇᓕᖕᓂ ᑲᑐᔾᔨᖃᑎᒌᑦ ᐱᔪᓐᓇᖅᓯᓛᓕᖅᑐᑦ ᐊᑭᑐᔫᑎᓄᑦ ᑮᓇᐅᔭᓂᒃ ᐃᑲᔪᕈᑕᐅᓗᑎᒃ ᓴᓇᔭᐅᑎᓪᓗᒋᑦ ᓇᔪᖅᑕᐅᓚᐅᑲᒍᓐᓇᖅᑐᑦ ᐃᒡᓗᐃᑦ, ᐊᖏᕐᕋᖃᙱᑦᑐᒃᑯᕕᑦ, ᐊᖏᕐᕋᑦ ᐃᓐᓇᕐᓄᑦ ᐊᓯᖏᓐᓄᓪᓗ ᐃᑲᔪᖅᓱᐃᔪᓄᑦ ᐃᒡᓗᓄᑦ ᓄᑖᒃᑯᑦ ᐊᖏᖅᑕᐅᓯᒪᔪᒃᑯᑦ ᐃᑲᔪᖅᓱᖅᑕᐅᓪᓗᑎᒃ ᐃᒡᓗᓕᕆᓂᕐᒧᑦ ᐊᑭᑐᔪᓄᑦ ᐱᓕᕆᐊᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ.

"ᑲᔪᓯᑎᑦᑎᔪᒍᑦ ᓱᓕᓂᐊᕐᓂᕋᕈᑎᒥᒃ ᐱᑎᑦᑎᒃᑲᓐᓂᕐᓗᑕ ᐃᒡᓗᓂᑦ ᓂᕈᐊᒐᓂᑦ ᑕᐃᒃᑯᓄᖓ ᐃᑲᔪᖅᑕᐅᔭᕆᐊᓕᖕᓄᑦ ᐃᓄᑑᓗᑎᒃ ᐃᓅᓗᑎᒃ," ᐅᖃᖅᑐᖅ ᒪᓕᒐᓕᐅᖅᑎ ᓗᐊᓐ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. "ᓄᑖᑦ ᐃᑲᔪᖅᓱᖅᑕᐅᔪᑦ ᐃᒡᓗᐃᑦ ᐃᓄᖃᖅᑎᑕᐅᓂᐊᖅᑐᑦ ᐃᓐᓇᕐᓄᑦ, ᐊᕐᓇᓄᑦ, ᓄᑕᖅᑲᓄᑦ, ᐃᓄᖕᓄᑦ ᑎᒥᒥᒍᑦ ᐊᔪᕈᑎᓕᖕᓄᑦ, ᑕᐃᒃᑯᓄᖓ ᐊᖏᕐᕋᖃᙱᑦᑐᓄᑦ ᐊᓯᖏᓐᓄᓪᓗ ᓄᓇᓕᖕᓄᑦ."

ᐃᑲᔪᖅᓱᖅᑕᐅᔪᑦ ᐃᒡᓗᓕᕆᓂᕐᒧᑦ ᐊᑭᑐᔪᑦ ᐱᓕᕆᐊᑦ ᐊᑐᐃᓐᓇᕈᖅᑎᑦᑎᓲᖑᕗᑦ ᐊᔪᖅᑎᑕᐅᙱᑦᑐᓂᒃ ᐱᓕᕆᐊᓂᒃ $150,000-ᒧᑦ ᑎᑭᖦᖢᒍ ᐃᒡᓗ ᐊᑕᐅᓯᖅ ᐃᒡᓗ ᐊᑕᐅᓯᖅ ᐃᓱᒪᒋᔭᐅᔪᓐᓃᒐᒃᓴᐅᓪᓗᓂ ᐊᑐᖅᑐᐊᕈᑎᑦ ᐅᑭᐅᓄᑦ ᖁᓕᓄᑦ ᑭᒡᓕᖃᕐᓗᒍ. ᐱᔪᓐᓇᕈᑎᓕᖕᓄᑦ ᐱᓕᕆᐊᒃᓴᑦ ᐱᔪᓐᓇᖅᑐᑦ:

• $100,000 ᐊᑕᐅᓯᕐᒧᑦ ᐃᒡᓗᕈᓯᕐᒧᑦ ᐃᓐᓄᒃᑕᐅᓯᒪᓂᖓ ᐃᒡᓗᒧᑦ ᐅᕝᕙᓘᓐᓃᑦ ᐃᒡᓕᕐᒧᑦ; ᐊᒻᒪᓗ/ᐅᕝᕙᓘᓐᓃᑦ
• $150,000 ᐊᑕᐅᓯᕐᒧᑦ ᐃᒻᒥᒥᒃ−ᐃᓗᓕᖃᖅᑐᒧᑦ ᐃᒡᓗᒧᑦ.

ᓄᓇᓕᖕᓂ ᑲᑐᔾᔨᖃᑎᒌᑦ ᑮᓇᐅᔭᑎᒍᑦ ᐃᑲᔪᖅᓱᖅᑕᐅᔪᓐᓇᕐᒥᔪᑦ ᐱᕙᒌᔭᖅᑎᓪᓗᒋᑦ ᐃᑲᔪᖅᓱᐃᔪᓂᒃ ᐃᒡᓗᓕᕆᓂᕐᒧᑦ ᐱᓕᕆᐊᓄᑦ ᐸᕐᓇᐅᑎᓂᒃ ᐊᖅᑯᑎᒋᔭᐅᓗᑎᒃ ᓄᓇᓕᖕᓂ ᐱᕈᖅᐹᓪᓕᕈᑦ ᑮᓇᐅᔭᑦ (ᓄᓇᓕᖕᓂ ᐱᕈᖅᐹᓪᓕᕈᑦ ᐱᕈᖅᐸᓪᓕᐊᓂᕐᒧᑦ ᑮᓇᐅᔭᑦ) ᐊᑐᐃᓐᓇᐅᔪᑦ ᓄᓇᓕᖕᓂ ᐃᒡᓗᓕᕆᓂᕐᒧᑦ ᐊᓯᔾᔩᕝᕕᖕᒥ.

"ᓄᑖᖅ ᐃᑲᔪᖅᑐᖅᑕᐅᔪᖅ ᐃᒡᓗᓕᕆᓂᕐᒧᑦ ᐊᑭᑐᔪᓄᑦ ᐱᓕᕆᐊᒃᓴᖅ ᓇᓕᒧᑦᑎᐊᖅᑐᖅ ᐱᓕᕆᖃᑎᑦᑎᓐᓄᑦ ᓄᓇᓕᖕᓂ ᐃᒡᓗᓕᕆᔨᒃᑯᑦ ᐊᓯᔾᔩᕝᕕᖓᓂ," ᐅᖃᖅᑐᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᖓᔪᖅᑳᑉ ᑐᒡᓕᐊ ᐊᐅᓚᓂᕐᓄᑦ, ᔨᒥ ᒪᐃᓐ. "ᓄᓇᓕᖕᓂ ᑲᑐᔾᔨᖃᑎᒌᑦ ᐱᓇᔪᒍᓐᓇᖅᑐᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐱᕈᖅᐸᓪᓕᐊᔪᓄᑦ ᑮᓇᐅᔭᓂᒃ ᓄᓇᓕᖕᓂ ᐃᒡᓗᓕᕆᓂᕐᒧᑦ ᐊᓯᔾᔩᕝᕕᒃ ᐱᕙᒌᔭᕐᓗᑎᒃ ᐃᑲᔪᖅᓱᐃᔪᓂᒃ ᐃᒡᓗᓕᕆᓂᕐᒧᑦ ᐱᓕᕆᐊᓄᑦ ᐸᕐᓇᐅᑎᓂᒃ ᑮᓇᐅᔭᓂᒃ ᐱᓇᔫᑎᓂᒃ ᐃᒡᓗᓕᕆᔨᕐᔪᐊᒃᑯᓐᓄᑦ ᐊᓯᖏᓐᓄᓪᓗ ᐃᓄᖕᓄᑦ ᐃᒡᓗᓕᕆᓂᕐᒧᑦ ᑮᓇᐅᔭᖃᖅᑎᑦᑎᔨᓄᑦ."

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᐱᓕᕆᔨᐅᖃᑎᖏᑦ ᐃᑲᔪᖅᓱᖅᑕᐅᔪᓄᑦ ᐃᒡᓗᓕᕆᓂᕐᒧᑦ ᐱᓕᕆᖃᑎᒌᓄᑦ, ᐃᓚᒋᔭᐅᓪᓗᑎᒃ ᓄᓇᕗᑦ ᒐᕙᒪᒃᑯᑦ ᐃᓄᓕᕆᔨᒃᑯᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᒪᓕᒐᓕᕆᔨᒃᑯᑦ, ᕿᓂᖅᐳᑦ ᓄᑖᓂᒃ ᓴᖅᑭᑦᑎᔾᔪᑎᒃᓴᓂᒃ ᒪᓕᒋᐊᓕᖕᓂᒃ ᐃᖏᕐᕋᐃᓐᓇᕈᓐᓇᖅᑐᓄᑦ ᐃᑲᔪᖅᓱᖅᑕᐅᔪᓄᑦ ᐃᒡᓗᓄᑦ ᐱᕙᓪᓕᐊᑎᑕᐅᔪᒃᓴᓄᑦ, ᐊᐅᓚᑕᐅᓗᑎᒃ ᐊᒻᒪ ᑲᒪᒋᔭᐅᓗᑎᒃ. ᑕᒪᑐᒧᖓ ᐃᓱᒪᒋᔭᖃᖅᓯᔪᑦ ᓄᓇᓕᖕᓂ ᑲᑐᔾᔨᖃᑎᒌᑦ ᑐᙵᓱᒃᑎᑕᐅᕗᑦ ᖃᐅᔨᒋᐊᖁᔭᐅᓪᓗᑎᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐃᓱᒪᒋᔭᖏᓐᓄᑦ ᐅᕙᓂ SHCapital@nunavuthousing.ca

ᑖᓐᓇ ᓄᑖᖅ ᐱᓕᕆᐊᖑᔪᖅ ᐃᓚᒋᔭᐅᕗᖅ ᐃᒡᓗᓕᐅᖃᑎᒌᖕᓂᕐᒧᑦ ᐅᕝᕙᓘᓐᓃᑦ ᓄᓇᕗᒻᒥ 3000-ᒧᑦ, ᐱᓕᕆᐊᖑᔪᖅ ᐃᒪᐃᑎᑦᑎᕗᖅ, ᓄᓇᕗᒻᒥᐅᑦ ᐱᓕᕆᖃᑎᒌᖁᓪᓗᒋᑦ ᐃᓚᓯᔪᒪᓪᓗᑎᒃ 3000-ᓂᒃ ᓄᑖᓂᒃ ᐃᒡᓗᒋᔭᐅᓂᐊᓕᖅᑐᓂᒃ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ 2030 ᑎᑭᓯᒪᓕᖅᐸᑦ. ᑐᑭᓯᒋᐊᒐᒃᓴᖅᑕᖃᒃᑲᓐᓂᖅᑐᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐃᑭᐊᖅᑭᕕᖓ.