ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
2022-10-18
ᓄᓇᕗᑦ ᒐᕙᒪᒃᑯᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓪᓗ ᐸᕐᓇᒍᑕᐅᔪᒥᒃ ᑐᓴᖅᑎᑦᑎᕗᑦ 3000−ᓂᒃ ᐊᖏᕐᕋᕆᔭᐅᓂᐊᖅᑐᓂᒃ ᐃᒡᓗᓕᐅᕈᒪᓪᓗᑎᒃ
ᑲᖏᖅᖠᓂᖅ, ᓄᓇᕗᑦ (ᐅᑐᐱᕆ 18, 2022) − ᓄᓇᕗᑦ ᒐᕙᒪᒃᑯᑦ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓪᓗ ᐅᓪᓗᒥ ᑐᓴᖅᑎᑦᑎᖅᑲᐅᕗᑦ ᓴᖅᑭᑕᐅᔪᒥᒃ ᓄᓇᕗᑦ 3000 ᐸᕐᓇᒍᑎᒥᒃ, ᐃᒡᓗᓕᐅᖃᑎᒌᖕᓂᖅ − ᐃᒡᓗᓕᐅᕐᓂᖅ ᑲᑐᔾᔨᖃᑎᒌᒡᓗᑕ. ᓄᓇᕗᑦ 3000 ᐸᕐᓇᒍᑎ ᐅᑯᓇᓂ ᑲᑐᔾᔨᖃᑎᒌᒍᑕᐅᕗᖅ ᒐᕙᒪᒃᑯᓐᓂ ᐱᓕᕆᖃᑎᒋᔭᖏᓐᓂᓪᓗ ᐃᒡᓗᑭᒃᓴᓗᐊᖅᑐᑦ ᓄᓇᕗᒻᒥ ᑲᒪᒋᔭᐅᖁᓪᓗᒋᑦ.
ᓇᓗᓇᐃᖅᓯᓗᑎᒃ ᓄᓇᕗᒻᒥᐅᓕᒫᑦ ᐃᓂᖃᑦᑎᐊᕆᐊᖃᕐᓂᖏᓐᓂᒃ, ᐊᑦᑕᕐᓇᙱᑦᑐᒥᑦ, ᐊᒻᒪᓗ ᐊᖏᕐᕋᑦᑎᐊᕙᖕᒥᑦ, ᓄᓇᕗᑦ 3000 ᐸᕐᓇᒍᑎ 3,000−ᓂᒃ ᓄᑖᓂᒃ ᐃᒡᓗᒃᓴᓂᒃ ᓇᓂᑐᐃᓐᓇᖅ ᓄᓇᕗᒻᒥ ᐃᒡᓗᓕᐅᖅᑎᑦᑎᓂᐊᖅᐳᑦ 2030 ᑐᖔᓂ.
"ᓄᓇᕗᒻᒥᐅᑦ ᐊᖏᕐᕋᖃᕆᐊᖃᖅᐳᑦ ᐃᑲᔪᖅᑐᐃᔪᒥᒃ ᖃᓄᐃᙱᓪᓗᑎᒃ, ᐊᑦᑕᕐᓇᙱᑦᑐᒦᓪᓗᑎᒃ, ᐊᒻᒪᓗ ᐃᒻᒥᒃᑯᑦ ᐃᓅᓯᖃᕈᓐᓇᕐᓗᑎᒃ," ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᒥᓂᔅᑕ ᖁᐊᓴ ᑯᓱᒐᖅ ᐅᖃᖅᑐᖅ. "ᐃᒡᓗᓕᕆᓂᖅ ᑐᐊᕕᕐᓇᕐᓂᖅᐹᖑᖃᑕᐅᓪᓗᓂ ᐊᒃᓱᕉᑕᐅᔪᓂᑦ ᓄᓇᕗᒻᒥ, ᑐᓴᖅᑎᑦᑎᔾᔪᑕᐅᔪᖅ ᐃᒡᓗᓕᐅᖃᑎᒌᖕᓂᖅ ᐅᕝᕙᓘᓐᓃᑦ ᓄᓇᕗᑦ 3000 ᐸᕐᓇᒍᑎ ᐃᓚᒋᐊᕈᑎᑦᑎᐊᕙᐅᕗᖅ ᓄᓇᓕᑦᑎᓐᓄᑦ ᐊᓯᔾᔨᕈᑕᐅᓗᓂᓗ ᓄᓇᕗᒻᒥᐅᑦ ᐃᓅᓯᖏᓐᓄᑦ."
"ᐃᒡᓗᓕᐅᖃᑎᒌᖕᓂᖅ ᐱᕚᓪᓕᕈᑕᐅᔪᓐᓇᖅᑐᓂᒃ ᕿᓂᖅᐳᑦ ᐃᓂᒋᔭᐅᔪᓐᓇᖅᑐᓂᒃ ᐃᒡᓗᓕᕆᔨᒃᑯᓐᓂ ᐱᓕᕆᖃᑕᐅᔪᓕᒫᓂᑦ ᑎᒍᒥᐊᖅᑎᐅᖃᑕᐅᔪᓂᓪᓗ ᓯᕗᒻᒧᐊᒃᑎᑦᑎᖁᓪᓗᒋᑦ ᓄᑖᓂᒃ ᐱᓕᕆᔾᔪᑎᓂᒃ ᐱᒋᐊᖅᑎᑦᑎᖁᓪᓗᒋᑦ, ᐋᖅᑭᒃᓱᐃᓗᑎᒃ, ᐃᒡᓗᓕᐅᕐᓗᑎᒡᓗ," ᐃᒡᓗᓕᕆᔨᕐᔪᐊᒃᑯᓐᓄᑦ ᑲᑎᒪᔨᐅᖃᑕᐅᔪᖅ ᔪᐊᔾ ᖁᓚᐅᑦ ᐅᖃᖅᑐᖅ. "ᐱᓕᕆᖃᑎᒌᖕᓂᖅ ᑐᙵᕕᒋᔭᐅᖏᓐᓇᐅᔭᖅᐳᖅ ᓄᓇᕗᒻᒥ, ᐃᒡᓗᓕᕆᔨᕐᔪᐊᒃᑯᑦ ᓄᓇᕗᒻᒥ ᐃᓄᖕᓄᓪᓗᑦ."
ᓄᓇᕗᑦ 3000 ᐸᕐᓇᒍᑎ ᑲᑐᔾᔨᓗᑕᒥᑦ ᑲᔪᓯᑎᑦᑎᓂᐊᖅᐳᖅ ᐱᓕᕆᐊᒃᓴᖅ ᓯᕗᓪᓕᐅᔾᔭᐅᔪᒪᔪᖅ ᓄᑖᓂᒃ ᐃᒡᓗᓕᐅᖁᓪᓗᒋᑦ ᓄᓇᕗᒻᒥᐅᓄᑦ ᑕᒪᐃᓐᓂ ᓄᓇᓕᖕᓂ ᐊᖏᕐᕋᕆᔭᐅᓂᐊᖅᑐᓂᑦ ᐊᕐᕌᒍᒐᓴᖕᓄᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ ᓄᓇᕗᑦ 3000 ᐸᕐᓇᐅᑎᐅᑉ ᒥᒃᓵᓄᑦ, ᐅᕗᖓ ᑕᑯᒋᐊᕐᓗᑎᑦ, www.Igluliuqatigiingniq.ca
