ᓄᓇᕗᑦ ᒐᕙᒪᒃᑯᑦ ᐃᑲᔪᖅᑐᐃᔾᔪᑎᓂᒃ ᐊᑐᐃᓐᓇᐅᑎᑦᑎᕗᑦ ᐃᑭᑦᑐᒧᑦ ᐊᒃᑐᖅᑕᐅᓚᐅᖅᑐᓕᒫᓄᑦ 1088 ᓅᐳᓪ ᐃᒡᓗᒥ ᐃᖃᓗᖕᓂ. ᐃᑭᓚᐅᖅᖢᓂ 36 ᐃᓚᒌᑦ ᐃᒡᓗᖃᕈᓐᓃᓚᐅᖅᑐᑦ ᖃᔅᓯᑲᓪᓚᐃᓪᓗ ᓇᖕᒥᓂᖁᑎᓕᑦ.

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᓯᕗᓕᖅᑎᐅᔪᑦ ᓄᓇᕗᑦ ᒐᕙᒪᒃᑯᑦ ᐱᓇᔪᒍᑎᒋᔭᖓᓂ ᐃᖅᑲᓇᐃᔭᖅᑎᓂᑦ ᐊᖏᕐᕋᖃᕈᓐᓃᖅᑐᓂᑦ ᐃᑲᔪᕋᓱᒃᖢᑎᒃ. ᐃᖅᑲᓇᐃᔭᖅᑏᑦ ᐱᓕᕆᓪᓚᕆᒃᑐᑦ ᐊᑐᖅᑐᐊᖅᑎᓕᒫᓂᒃ ᐃᓂᖃᖅᑎᑕᐅᓚᐅᑲᖁᓪᓗᒋᑦ ᑐᔪᕐᒥᕕᖕᓂᑦ ᓅᑎᑕᐅᓂᐊᕐᓗᑎᓪᓗ ᐊᓯᖏᓐᓄᑦ ᐃᓪᓗᓄᑦ, ᐱᓕᕆᖃᑎᖃᖅᖢᑎᒃ Northview-ᑯᓐᓂ ᐃᒡᓗᒋᔅᓲᔭᕐᓂᐊᖅᑕᖏᓐᓂᒃ ᐃᓂᑖᖅᑎᑕᐅᖁᓪᓗᒋᑦ ᕿᓚᒻᒥᐅᓂᖅᐹᒃᑯᑦ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐃᓚᖏᓐᓂᒃ ᐃᒡᓗᓂᒃ ᐊᑐᖅᑐᐊᖅᑎᓂᒃ ᓅᑎᑦᑎᕙᓪᓕᐊᓂᐊᕋᓱᒋᔪᑦ ᐊᓯᖏᓐᓄᑦ ᐃᒡᓗᓄᑦ ᐱᓇᓱᐊᕈᓯᐅᑉ ᓄᙳᐊᓂ.

ᐊᑐᖅᑐᐊᖅᑏᑦ ᑐᔪᕐᒥᕕᖕᒧᐊᖅᑕᐅᓚᐅᙱᑦᑐᑦ ᐅᓐᓄᒃ ᖃᐅᔨᒋᐊᖁᔭᐅᕗᑦ ᓛᓇ ᑐᕉᓗᑦᒧᑦ ᐅᕗᖓ 867-975-7210 ᐅᕝᕙᓘᓐᓃᑦ ldrouillard@gov.nu.caᒪᐃᑯᓪ ᓯᒥᑦ ᐅᕙᓂ 867-975-7204 ᐅᕝᕙᓘᓐᓃᑦ msmith11@gov.nu.ca, ᐅᕝᕙᓘᓐᓃᑦ ᑐᐊᕕᕐᓇᖅᑐᓄᑦ ᐅᖃᓗᒡᕕᒃᓴᖅ 867-222-1304−ᒧᑦ ᐋᖅᑭᒃᓯᓯᒪᒃᐸᑕ ᐊᑐᖅᑕᐅᓚᐅᑲᖕᓂᐊᖅᑐᒥᒃ ᑐᔪᕐᒥᕕᒃᓴᒥᒃ, ᑐᔪᕐᒥᕕᖃᕆᐊᖃᕐᓗᑎᒃ, ᐅᕝᕙᓘᓐᓃᑦ ᐃᑲᔪᖅᑕᐅᒃᑲᓐᓂᕆᐊᖃᕐᓗᑎᒃ.

ᐱᓕᕆᕝᕕᓕᒫᑦ ᐊᒻᒪ ᑐᑦᑕᕐᕖᑦ ᐃᖏᕐᕋᓯᑎᑦᑎᓯᒪᓕᖅᑐᑦ ᐃᑲᔫᑎᒃᓴᓂᒃ ᐃᖅᑲᓇᐃᔭᖃᑎᖏᑦ ᐊᒻᒪ ᓄᓇᕗᒥᐅᖑᖃᑎᕗᑦ ᖃᓄᐃᑦᑐᓐᓃᖅᐸᓪᓕᐊᑦᑎᐊᖁᓪᓗᒋᑦ ᐊᓯᐅᔨᕐᔪᐊᓚᐅᖅᑎᓪᓗᒋᑦ.

ᐳᔪᕐᒥᑦ ᓂᐅᖅᓯᓂᖅ (ᐋᓐᓂᐊᖅᑐᓕᕆᓂᖅ)

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖃᓗᖕᒥᐅᓂᒃ ᐃᖅᑲᐃᓯᔪᒪᕗᑦ ᐅᔾᔨᖅᓱᑦᑎᐊᖁᔨᓪᓗᑎᒃ ᐳᔪᕐᒥᑦ. ᑭᒃᑯᑐᐃᓐᓇᐃᑦ ᐆᒪᑎᕐᓗᒃᑐᑦ ᐅᕝᕙᓗᓃᑦ ᐳᕙᒡᓗᒃᑐᑦ, ᐃᔾᔭᖑᑕᐅᑎᓖᑦ, ᐃᓐᓇᐃᑦ, ᓱᕈᓰᓪᓗ ᐊᒻᒪᓗ ᓯᖓᐃᔪᑦ ᐳᔪᕐᒦᓗᐊᖁᔭᐅᖏᑦᑐᑦ. ᐃᑭᑦᑑᑉ ᖃᓂᒋᔮᓃᑦᑐᖃᕆᐊᖃᖏᑦᑐᖅ ᐊᒻᒪ ᐃᓯᖅᓯᒪᔪᓐᓇᕌᖓᑦᓯ ᐃᓯᖅᓯᒪᕙᓪᓗᓯ ᐊᒻᒪ ᐹᑦ ᐃᖓᓛᓪᓗ ᒪᑐᓯᒪᓗᑎᒃ. ᐋᓐᓂᐊᕕᓕᐊᖁᔭᐅᔪᑦ ᐃᔾᔭᖑᓂᐅᓴᔪᑦ ᐊᓂᕐᓂᑭᑦᑐᑦ ᐅᕝᕙᓗᓃᑦ ᐆᒪᑏᑦ ᐃᒃᐱᒋᒍᕕᐅᒃ.

ᑐᐊᕕᕐᓇᖅᑐᒧᑦ ᓄᖅᑲᖓᓂᖅ ᐃᖅᑲᓇᐃᔭᖅᑎᓄᑦ (ᐃᖅᑲᓇᐃᔭᖅᑐᓕᕆᔨᒃᑯᑦ)

ᐃᖅᑲᓇᐃᔭᖅᑏᑦ ᐊᒃᑐᖅᑕᐅᓯᒪᔪᑦ ᐃᑭᑦᑐᒧᑦ ᐱᔪᓐᓇᖅᑐᑦ ᑐᐊᕕᕐᓇᖅᑐᒧᑦ ᓄᖅᑲᖓᓂᕐᒧᑦ ᔭᓐᓄᐊᓕ 19-ᒧᑦ ᑎᑭᓪᓗᒍ. ᓄᖅᑲᖓᔪᑦ ᓄᖅᑲᖓᔾᔪᑎᖏᑦ ᐊᒃᑐᖅᑕᐅᔾᔮᙱᑦᑐᑦ. ᐃᖅᑲᓇᐃᔭᖅᑏᑦ ᓄᖅᑲᖓᒃᑲᓐᓂᕆᐊᖃᕋᓱᒋᒃᐸᑕ ᔭᓄᐊᕆ 19 ᐊᓂᒍᓚᐅᖅᑎᓪᓗᒍ, ᐊᖓᔪᖅᑳᓯ ᖃᐅᔨᒋᐊᕐᕕᒋᓗᒍ ᐊᒻᒪ/ᐅᕝᕙᓘᓐᓃᑦ ᐃᖅᑲᓇᐃᔭᖅᑐᓕᕆᔨᒃᑯᑦ ᐊᐅᓚᑦᑎᔨᖓᑦ ᐅᖃᖃᑎᒌᒃᓗᑎᒃ ᖃᓄᖅᑑᕈᑎᒃᓴᓂᒃ. ᑎᓕᐅᕆᕗᒍᑦ ᑕᐃᒃᑯᓄᖓ ᐊᒃᑐᖅᑕᐅᓯᒪᔪᓂᑦ ᐊᑐᖁᓪᓗᒋᑦ ᓄᖅᑲᖓᓂᕐᒧᑦ ᒪᓕᒋᐊᓕᖕᓂᑦ ᖃᓄᐃᖏᑦᑎᐊᖁᓪᓗᒋᑦ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ.

ᑐᐊᕕᕐᓇᖅᑐᓄᑦ ᐃᑲᔫᓯᐊᑦ (ᐃᓄᓕᕆᔨᒃᑯᓐᓂ)

ᑐᐊᕕᕐᓇᖅᑐᓄᑦ ᐃᑲᔫᓯᐊᖅᑐᓕᕆᔨᑦ ᐃᓇᖐᔪᓐᓇᖅᐳᑦ ᐊᑯᕆᐊᖃᓪᓚᕆᒃᑐᓂᑦ ᐱᖁᑎᓂᒃ ᓲᕐᓗ ᐊᓐᓄᕌᓂᒃ, ᐅᐊᓴᐅᑎᕈᔪᖕᓂᒃ, ᓂᕿᓂᒃ, ᓄᑕᕋᓛᑦ ᐊᒫᒪᐅᑎᖏᓐᓂᒃ ᐃᒻᒧᖏᓐᓂᒡᓗ, ᐊᓯᖏᓐᓂᒡᓗ ᐱᔭᕆᐊᓕᖕᓂᒃ.

ᑐᐊᕕᕐᓇᖅᑐᓄᑦ ᐃᑲᔫᓯᐊᑦ ᐊᑐᐃᓐᓇᐅᕗᑦ ᓄᓇᕗᒻᒥᐅᓕᒫᓄᑦ ᐱᖁᑎᒥᓂᒃ ᐃᒡᓗᒥᒃᓘᓐᓃᑦ ᐊᓯᐅᔨᔪᓂᑦ, ᓂᖃᐃᓱᖃᑦᑕᕋᓗᐊᕈᑎᒃ ᐋᒃᑲᓘᓐᓃᑦ.

ᑎᓕᐅᕆᕗᒍᑦ ᐊᒃᑐᖅᑕᐅᓯᒪᔪᓕᒫᓂᒃ ᓄᓇᖅᑲᑎᒌᓂᒃ ᐃᑲᔪᖅᑕᐅᔪᒪᖃᑦᑕᖁᓪᓗᒋᑦ ᐱᔭᕆᐊᖃᕌᖓᑕ:

• ᓄᓇᓕᖕᓂ ᓂᖃᐃᓱᖅᑐᓕᕆᔨᑦ ᑎᑎᕋᕐᕕᖓᓄᑦ ᖃᐅᔨᒋᐊᕐᓗᑎᑦ.
• ᐃᖃᓗᖕᓂᑦ, ᓂᖃᐃᓱᕐᕕᐊᓗᖕᒧᑦ ᑕᑯᒋᐊᕐᓗᑎᑦ ᐃᒡᓗ 607.
• ᐃᖃᓗᖕᒥᐅᑦ ᐊᒃᑐᖅᑕᐅᔪᑦ ᐃᒡᓗᕐᔪᐊᖅ 1088−ᒧᑦ ᐅᖃᓗᒍᓐᓇᕐᒥᔪᑦ (867) 975-5278 ᐃᕐᖐᓐᓈᖅᑕᐅᒃᑯᓪᓘᓐᓃᑦ AOqallak@gov.nu.ca ᐃᑲᔪᖅᑕᐅᔪᒪᓗᑎᒃ.

ᐃᓱᒪᓕᕆᓂᕐᒧᑦ ᐃᑲᔪᖅᑕᐅᔪᒪᓂᕐᒧᑦ (ᐋᓐᓂᐊᖅᑐᓕᕆᔨᑦ)

ᐱᒻᒪᕆᐅᖕᒪᑦ ᑲᒪᒋᑦᑎᐊᕐᓗᒍ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖅ ᐊᒻᒪ ᐃᓅᓯᖃᑦᑎᐊᕐᓂᖅ. ᐃᕝᕕᓪᓘᓐᓃᑦ ᑭᓇᒥᒡᓘᓐᓃᑦ ᖃᐅᔨᒪᔭᕐᓂᒃ ᐊᒃᓱᕈᖅᑐᖃᖅᐸᑦ, ᐳᐃᒍᖅᑕᐃᓕᒋᑦ ᐃᓄᑑᙱᓐᓂᕐᓂ. ᐃᓅᓯᓕᕆᔨᒧᑦ ᖃᐅᔨᒋᐊᕆᐊᖃᕈᕕᑦ, ᐅᕗᖓ ᐅᖃᓗᒍᓐᓇᖅᐳᑎᑦ 867-975-5900. ᐃᓅᓯᓕᕆᔨᑕᖃᖅᐳᖅ ᐅᖄᓚᐅᑎᒃᑯᑦ ᐅᕝᕙᓘᓐᓃᑦ ᐃᓂᒃᓴᓕᐅᖅᓯᒪᔪᒃᑯᑦ. ᐃᑲᔫᑎᒃᓴᒃᑲᓐᓃᑦ, ᑕᑯᒋᐊᕐᓗᒋᑦ ᐅᕙᓂ https://www.gov.nu.ca/en/health/mental-health-resources.

ᐃᖅᑲᓇᐃᔭᖅᑏᑦ ᐃᓚᒌᓪᓗ ᐃᑲᔪᖅᑕᐅᔪᓐᓇᖅᑐᑦ (ᐃᖅᑲᓇᐃᔭᖅᑐᓕᕆᔨᒃᑯᑦ)

ᐃᖅᑲᓇᐃᔭᖅᑏᑦ ᐃᓚᒌᓪᓗ ᐃᑲᔪᖅᑕᐅᔪᓐᓇᖅᑐᑦ (EFAP) ᐊᑐᐃᓐᓇᐅᑎᑦᑎᔪᑦ ᑐᓴᖅᑕᐅᔭᕆᐊᖃᖏᑦᑐᓂᑦ, ᓇᖕᒥᓂᖅ ᐃᓅᓯᓕᕆᓂᕐᒧᑦ ᐱᔨᑦᑎᕋᖅᑎᓂᑦ ᐋᖅᑭᒃᓯᒪᔪᖅ ᐃᑲᔪᕈᒪᓪᓗᑎᒃ ᐊᒃᓱᕈᕐᓇᖅᑐᒃᑰᖅᑎᓪᓗᑎᑦ ᐊᐅᓚᑦᑎᔪᓐᓇᑦᑎᐊᖁᓪᓗᑎᑦ. ᐃᑲᔪᖅᑕᐅᔪᒪᒍᕕᑦ ᐃᖅᑲᓇᐃᔭᖅᑏᑦ ᐃᓚᒌᓪᓗ ᐅᖄᓚᔪᓐᓇᖅᑐᑦ ᐊᑭᖃᙱᑦᑐᒧᑦ 1-800-663-1142−ᒧᑦ.

ᓇᓗᓇᐃᖅᓯᓂᖅ ᐊᓯᔾᔨᕆᐊᓕᖕᓂᑦ (ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ)

ᑭᓇᑐᐃᓐᓇᖅ ᐊᖁᑦᑐᓐᓇᐅᑎᒥᓂᒃ ᐊᓯᐅᔨᔪᖅ ᐅᕝᕙᓘᓐᓃᑦ ᑭᓇᐅᓂᕐᒧᑦ ᓇᓗᓇᐃᒃᑯᑕᕐᒥᑦ ᐃᑭᑦᑐᖃᖅᑎᓪᓗᒍ ᐅᐸᒍᑎᔪᓐᓇᖅᑐᖅ ᓄᓇᓯᐅᑎᓕᕆᔨᒃᑯᑦ ᑎᑎᕋᕐᕕᖓᓄᑦ ᐅᕗᖓ 1104C−ᒧᑦ ᐱᑎᑕᐅᓂᐊᕐᒪᑦ ᓇᓗᓇᐃᒃᑯᑕᕐᒥᑦ ᐊᔾᔨᖓᓂᑦ ᑖᒃᑯᐊ ᑎᑎᖅᑲᑦ ᐊᑐᕐᓂᐊᕐᓗᒋᑦ ᒐᕙᒪᒃᑯᓐᓂᑦ−ᑐᓂᔭᐅᓗᓂ ᐊᔾᔨᙳᐊᖅ ᓇᓗᓇᐃᒃᑯᑕᕐᒥᑦ ᑭᓯᐊᓂ ᐊᓯᔾᔨᖅᑕᐅᔪᖅ ᐊᐅᒃᑕᔫᖅ ᑎᑭᑉᐸᑦ.

ᑲᓇᑕᒥ ᑐᐊᕕᕐᓇᖅᑐᖃᖅᑎᓪᓗᒍ ᐃᑲᔪᖅᑎᑦ (ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᑎᕋᖅᑎᒃᑯᑦ)

ᓄᓇᕗᑦ ᒐᕙᒪᖓ ᐃᑲᔪᖅᑐᐃᕗᖅ ᐃᖃᓗᖕᓂ ᓄᓇᓕᐸᐅᔭᒃᑯᓐᓂᒃ ᐊᐅᓚᑦᑎᖃᑎᖃᖅᖢᑎᒃ ᑲᓇᑕᒥᐅᓄᑦ ᑐᐊᕕᕐᓇᖅᑐᖃᖅᑎᓪᓗᒍ ᐃᑲᔪᕆᐊᖅᑎᓂᒃ. ᑭᓇᑐᐃᓐᓇᖅ ᖃᑕᙳᑎᒋᔭᐅᔪᖅ ᐊᒃᑐᖅᑕᐅᔪᖅ ᐃᑭᓚᐅᖅᑐᒧᑦ ᑎᑎᕋᖁᔭᐅᕗᖅ ᓄᓇᓕᐸᐅᔭᒃᑯᓐᓄᑦ ᐃᖃᓗᖕᓂ ᑐᐊᕕᕐᓇᖅᑐᖃᖅᑎᓪᓗᒍ ᐃᑲᔪᕆᐊᖅᑎᓂᑦ ᐱᔪᓐᓇᖅᑎᑕᐅᖁᓪᓗᒍ ᑕᒻᒪᖅᓯᒪᙱᑦᑐᓂᒃ ᖃᐅᔨᒋᐊᕐᕕᒃᓴᖏᓐᓂᒃ ᐃᓚᐅᑎᑦᑐᒪᓪᓗᒋᑦ ᐃᓄᐃᑦ ᖃᐅᔨᓂᐊᕐᒪᑕ ᑭᓱᓂᒃ ᐃᑲᔪᖅᑐᐃᔾᔪᑎᓂᒃ ᐱᔭᕆᐊᖃᕐᒪᖔᑕ.

ᐃᓄᐃᑦ ᐅᖄᓚᖁᔭᐅᕗᑦ ᐃᖃᓗᖕᓂ ᓄᓇᓕᐸᐅᔭᕐᒧᑦ ᐅᖄᓚᕝᕕᒃᓴᒧᑦ ᐅᕗᖓ 867-979-5650 ᑐᓂᓯᓗᑎᒡᓗ:

• ᐃᒡᓘᑉ ᓈᓴᐅᑖ.
• ᖃᔅᓯᐅᓂᖏᑦ ᐃᒡᓗᒥᐅᖃᑎᒌᑦ.
• ᐃᓪᓗᒥᐅᖃᑎᒌᑦ ᐅᑭᐅᖏᑦ.

ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᖁᔭᓕᕗᑦ ᐱᓕᕆᖃᑕᐅᔪᓐᓇᕋᔅᓯ ᑕᒪᓐᓇ ᑲᒪᒋᓇᓱᐊᖅᑎᓪᓗᑎᒍᑦ.